Resey prezidenti Vladimir Putin. Foto: primavera.ru

Europalıq Odaqtıñ sırtqı sayasat böliminiñ basşısı Jozep Borreldiñ Reseydegi kezdesui sarapşılar tarapınan sınğa wşıradı. Sebebi Borrell'diñ Mäskeuge saparı oppozicioner Aleksey Naval'nıydıñ ulanuına, qamaluına qatısı bar reseylik şeneunikter men magnattarğa qarsı sankciyalar mäselesimen twspa-tws keldi.

Borrel Resey Sırtqı ister ministri Sergey Lavrovpen kezdesip, naurızdıñ soñında ötetin EO sammitin, Kreml'diñ adam qwqıqtarın taptau äreketterin, Naval'nıy isin jäne basqa da negizgi mäselelerdi talqılağan. Sonımen qatar, Mäskeude jürgen Euroodaqtıñ sırtqı ister vedomstvosınıñ basşısı Jozep Borrel' Resey sırtqı ister ministri Sergey Lavrovpen kelissözde Naval'nıydı jäne onı qoldau şaraları kezinde wstalğandardı bosatu mäselesin tağı da köterdi. Degenmen, Europadağı sarapşılar «Reseyge boykot retinde Borrel' sapar jasamauı tiis edi» dep sanaydı.

Politico halıqaralıq basılımında osı taqırıp jöninde: «Borreldiñ Lavrovpen kezdesu «qoyılımı» apatqa wşıradı. Ol EO Naval'nıydıñ isine baylanıstı Reseyge qarsı jaña sankciyalar qabıldauğa eşqanday qadam jasamağanın moyındadı. Sodan keyin Ispaniyanıñ bwrınğı Sırtqı ister ministri bolğan Borrel Lavrovtıñ Euroodaqtı sınağanına eşqanday jauap bere almadı», – deydi.

Europalıq Parlamenttegi eñ ülken frakciyanıñ, europalıq halıq partiyası frakciyasınıñ atınan Borreldiñ Mäskeu saparın onıñ vice-törağası, Latviyanıñ bwrınğı Sırtqı ister ministri Sandra Kalniete qattı sınğa aldı. Şeneunik sözinde: «Borrel'diñ bwl kezdesui Euroodaqtı Reseyge jığıp bergendey. Sebebi ol Lavrovqa qarsı mälimdeme ayta almadı. Eger Borrel' türmedegi Aleksey Naval'nıyğa barıp, demokratiyanı jaqtauşılarmen egjey-tegjeyli söylesken bolsa ğana bwl sapar mağınalı bolar edi. Şındığında, Borrel' tipti Naval'nıymen kezdesuge de tırıspadı. Tipti Qırımdı da söz etken joq. Biz Borrel'di Kreml'di nasihattaudıñ qwralı emes, europalıq qwndılıqtardı qorğaytın sayasatker sanağan edik», – dedi.

Resey men Şığıs Europanıñ mamanı, sayasattanuşı Mark Galeotti britandıq «Spectator» jurnalındağı maqalasında: «Bwl – Euroodaq diplomatiyasındağı eñ naşar kezdesu boldı. Borreldiñ Mäskeuge saparı, ökinişke oray, orıstar üşin jeñis. Kreml' Euroodaqtıñ atınan barğan Borrel'di moyındamaytın da körsetti. Orıstar köbine Bayden äkimşiliginen qorqatın siyaqtı», – dep jazdı.

Galeotti, köptegen basqa kommentatorlar siyaqtı, Borrel Naval'nıymen de, onıñ seriktesterimen de kezdesuge tırıspağanın sınğa aldı.

«Nemis tolqını» orıs redakciyasınıñ basşısı Kristian Trippe tez arada Reseyge sankciya engizu kerek deydi. Al Estoniya parlamentiniñ sırtqı sayasat komitetiniñ basşısı Marko Mihkelson Naval'nıyğa qatıstı sot jäne basqa da oqiğalardı eskere otırıp, «EO men Resey arasındağı qarım-qatınastağı atmosfera tömengi deñgeyde», dep sanaydı.

Britandıq Telegraph gazeti Borreldiñ saparın «Euroodaqtı qorlau» dep atağan. Basılımda: «Borrel' mwnday jağdayğa dayın emes bolıp şıqtı. Lavrov öz erejesi boyınşa oynadı jäne sankciyadan qorıqpaytının aşıq bildirdi», – delingen.

Naval'nıy isi                                    

2 aqpanda Mäskeu qalalıq sotında Naval'nıydıñ «Iv Roşe» isindegi şarttı merzimin auıstırdı. Naval'nıy jazasın jalpı rejimdegi koloniyada öteydi. Şeşim küşine engenge deyin ol tergeu izolyatorında qaladı. Ükim şıqqannan keyin batıs elderi Resey biliginiñ bwl äreketin «erkindik qwqığı men zañ üstemdigine jasalğan auır soqqı» dep sınğa alıp, Naval'nıydı bostaudı talap etti. Batıs elderiniñ Naval'nıydı bosatu turalı dabılına Krmel'diñ atınan jauap bergen Resey SİM-niñ resmi ökili Mariya Zaharova «negizsiz şeşim» dep qısqa qayırdı.

Bwğan deyin bir top demokrat jäne respublikaşıl senator AQŞ kongresine «Reseydi qastıq äreketi üşin jauapqa tartu turalı» zañ jobasın wsınğan. Onda Naval'nıydı ulauğa jäne «Noviçok» uın jasağandarğa qatısı bar resmi twlğalarğa sankciya salu jağı qarastırılğan.

6 aqpanda Resey Europa odağınıñ üş diplomatın «zañsız şaralarğa qatıstı» dep ayıptap, el aumağınan şığarudı talap etti.

Keyinnen Euroodaq Reseydi diplomattardı şığarıp jiberu turalı şeşimin qayta qarauğa şaqırdı. Franciya prezidenti Emmanuel' Makronmen birge ötken baspasöz mäslihatında Germaniya kancleri Angela Merkel' Berlin men Parij Mäskeudiñ bwl şeşimin orınsız dep tanitının ayttı.

Şveciya sırtqı ister ministrligi öz diplomatiyalıq ökildigi qızmetkeri rwqsat etilmegen şarağa qatıstı degen aqparattı joqqa şığardı. Pol'şa şeşimniñ küşi joyılatınına ümit etetinin ayttı jäne bwğan qarımta şaralar qoldanatının eskertti.

"The Qazaq Times"