«امەريكا ورالدى!»: بايدەن ترامپ ساياساتىن تۇبەگەيلى وزگەرتۋگە بەت الدى

اقش-تىڭ جاڭا اكىمشىلىگى بۇرىنعى پرەزيدەنت دونالد ترامپ جۇرگىزگەن «وقشاۋلاۋ ساياساتىن» توقتاتىپ، شەتەلدەگى دەموكراتيالاندىرۋ ارەكەتتەرىن كۇشەيتەدى. رەسەي مەن قىتايدىڭ ادام قۇقىقتارىن تاپتاۋعا باعىتتالعان قادامدارىنا قارسى تۇرادى. بۇل – اقش-تىڭ قازىرگى پرەزيدەنتى دجو بايدەننىڭ سىرتقى ساياسات ماسەلەلەرى جونىندەگى العاشقى مالىمدەمەسى. الەمدىك باق-تىڭ نازارىن اۋدارعان بايدەننىڭ بۇل ءسوز سويلەۋىن اقش-تىڭ بۇرىنعى مەملەكەتتىك حاتشىسى مايك پومپەو سىنعا الدى.

امەريكا اكىمشىلىگىنىڭ باسشىسى مەملەكەتتىك دەپارتامەنتتە شامامەن 19 مينۋت ىشىندە امەريكانىڭ سىرتقى ساياساتىنا توقتالىپ ءوتتى. بايدەن ءسوزىن: «الەمگە دابىل: امەريكا قايتىپ ورالدى! ديپلوماتيا سىرتقى ساياساتىمىزعا ورالدى! بارلىق الەم ەلدەرى بۇل دابىلدى ەستىسىن»، – دەپ باستادى.

اق ءۇي باسشىسىنىڭ ايتۋىنشا، قازىر ۆاشينگتون «قاۋپى ارتقان اۆتوريتاريزمگە، ونىڭ ىشىندە قىتايدىڭ امەريكامەن باسەكەلەسۋ امبيتسيالارىنا، سونداي-اق رەسەيدىڭ دەموكراتياعا نۇقسان كەلتىرۋىنە تاپ بولدى. ديپلوماتيا دەگەنىمىز – ءبىزدىڭ نەگىزگى وداقتاستارىمىز بەن سەرىكتەستەرىمىزبەن يىق تىرەسە تۇرۋ. ءبىز بىرنەشە جىل ىشىندە جوعالعان سەنىمدىلىك پەن مورالدىق بەدەلىمىزدى قالپىنا كەلتىرگىمىز كەلەدى».

بايدەن امەريكانىڭ جاڭا بيلىگى حالىقارالىق بايلانىستاردى تۇبەگەيلى قالپىنا كەلتىرىپ،  الەمدەگى كوشباسشىلىق پوزيتسيانى قايتاراتىنىن ايتتى.

رەسەي-امەريكا قاتىناستارى تاقىرىبىنا توقتالعان بايدەن ماسكەۋ بىرنەشە ەرەجەلەرگە قايشى ارەكەت ەتىپ، ادام قۇقىقتارىن تاپتادى دەگەن مالىمدەمە جاسادى. سونىمەن قاتار، ول وپپوزيتسيونەر ناۆالنىيدى ەشقانداي شارتسىز، جاقىن ارادا بوساتۋدى تالاپ ەتتى.

وسى اپتادا اقش پەن رەسەي «ستراتەگيالىق شابۋىل قارۋىن ودان ءارى ازايتۋ جانە شەكتەۋ جونىندەگى شارالار تۋرالى كەلىسىمشارتى» ۇزارتۋ تۋرالى كەلىسىمگە كەلدى. بايدەن رەسەي مەن قىتاي بايلانىسىنا دا ەرەكشە توقتالىپ ءوتىپ، سىرتقى ساياساتتا باستى باسەكەلەس رەتىندە وسى ەكى دەرجاۆانى اتادى.

پرەزيدەنت قىتايدى امەريكا قۇراما شتاتتارىنىڭ باستى باسەكەلەسى دەپ سانايتىنىن ايتتى. «ءبىز ءوزىمىزدىڭ قاۋىپسىزدىگىمىز، وركەندەۋىمىز جانە دەموكراتيالىق قۇندىلىقتارىمىز ءۇشىن ەڭ ماڭىزدى قارسىلاس – قىتاي تاراپىنان ۇلكەن قيىندىقتارعا تاپ بولىپ وتىرمىز. ءبىز قىتايدىڭ ەكونوميكا سالاسىنداعى ەرەجەلەردى بۇزۋىنا قارسىمىز. بەيجىڭنىڭ اگرەسسيۆتى ارەكەتتەرىنە، ادام قۇقىقتارى مەن زياتكەرلىك مەنشىككە جاسالعان شابۋىلدارىنا توسقاۋىل بولۋىمىز كەرەك»، – دەپ ەسكەرتتى بايدەن.

بايدەن حالىقارالىق ساياساتتىڭ بىرقاتار ءىرى ماسەلەلەرىن، سونىڭ ىشىندە يران جانە كورەي تۇبەگىنىڭ يادرولىق قارۋسىزدانۋىن، پالەستينا-يزرايل قاقتىعىسىن، سيريا مەن اۋعانستانداعى جاعدايدى نازاردان تىس قالدىردى.

دەگەنمەن، بايدەن اسكەري توڭكەرىس بولعان ميانماداعى ازاماتتىق قوعام وكىلدەرىن بوساتۋعا شاقىردى.

"The Qazaq Times"