«امەريكانى قۇردىمعا كەتىرۋ؟»: بايدەننىڭ مالىمدەمەسى سىنعا ۇشىرادى

دجو بايدەن امەريكاعا 44-ءشى پرەزيدەنت باراك وباما اكىمشىلىگى كەزىندەگى سىرتقى ساياساتتى قايتارماۋى ءتيىس. بايدەننىڭ ساياساتى امەريكانىڭ قارسىلاستارىنا جول اشىپ بەرەدى. Fox News تەلەارناسىا سۇحبات بەرگەن اقش-تىڭ بۇرىنعى مەملەكەتتىك حاتشىسى مايكل پومپەو وسىلاي دەپ مالىمدەدى.

تاياۋدا دجو بايدەن العاش رەت رەسمي مالىمدەمە جاساپ، «امەريكا قايتىپ ورالدى. ديپلوماتيا ءبىزدىڭ سىرتقى ساياساتىمىزعا ورالدى»، – دەگەن بولاتىن. بايدەن اقش-تىڭ جاڭا اكىمشىلىگى دونالد ترامپ جۇرگىزگەن «وقشاۋلاۋ ساياساتىن» تۇبەگەيلى توقتاتىپ، رەسەي مەن قىتايدىڭ دەموكراتياعا قارسى ارەكەتتەرىنە توسقاۋىل بولاتىنىن ايتتى.

اق ءۇي باسشىسىنىڭ ايتۋىنشا، قازىر ۆاشينگتون «قاۋپى ارتقان اۆتوريتاريزمگە، ونىڭ ىشىندە قىتايدىڭ امەريكامەن باسەكەلەسۋ امبيتسيالارىنا، سونداي-اق رەسەيدىڭ دەموكراتياعا نۇقسان كەلتىرۋىنە تاپ بولدى. ديپلوماتيا دەگەنىمىز – ءبىزدىڭ نەگىزگى وداقتاستارىمىز بەن سەرىكتەستەرىمىزبەن يىق تىرەسە تۇرۋ. ءبىز بىرنەشە جىل ىشىندە جوعالعان سەنىمدىلىك پەن مورالدىق بەدەلىمىزدى قالپىنا كەلتىرگىمىز كەلەدى». بايدەن امەريكانىڭ جاڭا بيلىگى حالىقارالىق بايلانىستاردى تۇبەگەيلى قالپىنا كەلتىرىپ، الەمدەگى كوشباسشىلىق پوزيتسيانى قايتاراتىنىن ايتتى.

پرەزيدەنتتىڭ بۇل مالىمدەمەسىن ترامپ اكىمشىلىگى كەزىندە مەملەكەتتىك حاتشى بولعان مايك پومپەو سىنعا الدى. «بايدەن امەريكانى «يسلام مەملەكەتىن» قالپىنا كەلتىرىپ، احۋالدى ۋشىقتىرماق پا؟ پرەزيدەنت ترامپ پەن ءبىزدىڭ كوماندا بۇل ماسەلەنىڭ شەشىمىن جوعارى دەڭگەيدە شەشكەن بولاتىن. ال بايدەننىڭ جاڭا اكىمشىلىگى بۇل جوسپاردى قۇردىمعا كەتىرۋى مۇمكىن»، – دەدى پومپەو.

بايدەننىڭ «امەريكا ورالدى» دەگەن ءسوزىن مىسالعا كەلتىرگەن پومپەو: «بۇل ارەكەت قىتايدى قايتادان كۇشەيتىپ، كانزاس نەمەسە وڭتۇستىك كاروليناداعى ميلليونداعان جۇمىس ورىندارىن قۇرتاتىن بىلدىرە مە؟ بايدەن بۇل ءسوزى ارقىلى ءيزرايلدى ەلەمەي، يرانداعى تەرروريزمنىڭ دامۋىنا ۇلەس قوساتىنىن ءبىلدىردى. ياعني بايدەن امەريكادا 8 جىل بيلىك ەتكەن وباما كەزىندەگى ساياساتتى قايتارماق»، –  دەدى.

بۇرىنعى مەملەكەتتىك حاتشى سونىمەن بىرگە ترامپ اكىمشىلىگى رەسەيدىڭ اقش سايلاۋىنا اسەر ەتۋ ارەكەتتەرىنە كەدەرگى كەلتىرگەنىن دە ەسكە سالدى.

"The Qazaq Times"