فوتو: ۆۆس

دجوزەف بايدەننىڭ جاڭا اكىمشىلىگى قىتايدىڭ اقش-تاعى 28 تۇلعاعا سانكتسيا ەنگىزۋ تۋرالى شەشىمىن نەگىزسىز دەپ تانىدى. بۇل تۋرالى اق ۇيدەگى ۇلتتىق قاۋىپسىزدىك كەڭەسىنىڭ (ۇقك) وكىلى ەميلي حورن مالىمدەدى.

رەسمي وكىل: «قىتاي بيلىگىنىڭ بۇل ارەكەتى جاڭا پرەزيدەنتتىڭ ۇلىقتاۋ راسىمىنە تۋرا كەپ تۇر جانە ولار ەكى پارتيا اراسىندا الاۋىزدىق تۋعىزۋ ماقساتىندا جاساپ وتىر دەپ سانايمىز. پرەزيدەنت بايدەن امەريكانىڭ قىتايمەن باسەكەلەستىكتە جەڭە الۋى ءۇشىن ەكى پارتيانىڭ جەتەكشىلەرىمەن بىرلەسە جۇمىس ىستەيدى»، – دەدى.

قىتاي ءسىم بۇعان دەيىن «قىتايدىڭ ەگەمەندىگىنە نۇقسان كەلتىرمەك بولعان» 28 ادامعا قارسى سانكتسيا ەنگىزەتىنىن حابارلاعان. بۇل تىزىمگە مەملەكەتتىك حاتشى مايك پومپەودان باسقا ساۋدا جونىندەگى ۇلتتىق كەڭەستىڭ باسشىسى پيتەر ناۆاررو، پرەزيدەنتتىڭ ۇلتتىق قاۋىپسىزدىك جونىندەگى كومەكشىسى روبەرت و ' برايەن، اقش-تىڭ بۇۇ جانىنداعى تۇراقتى وكىلى كەللي كرافت، اقش دەنساۋلىق ساقتاۋ مينيسترلىگىنىڭ بۇرىنعى باسشىسى الەكس ازار جانە اقش-تىڭ بۇرىنعى پرەزيدەنتى دونالد ترامپتىڭ ۇلتتىق قاۋىپسىزدىك جونىندەگى ەكس-كەڭەسشىسى دجون بولتون بار.

مالىمدەمەدە اتالعان ادامدارعا، ولاردىڭ وتباسى مۇشەلەرىنە، سونداي-اق ولارمەن بايلانىستى كومپانيالار مەن ۇيىمدارعا قىتاي، گونكونگ جانە ماكاو اۋماعىنا كىرۋگە، سونداي-اق قحر-دا ءىس جۇرگىزۋگە تىيىم سالىناتىنى ايتىلعان.

سەيسەنبىدە اقش مەملەكەتتىك حاتشىسى مايك پومپەو قىتايدىڭ شىڭجاڭداعى ساياساتىن «گەنوتسيد جانە "ادامزاتقا قارسى قىلمىس» دەپ مالىمدەگەن. مەملەكەتتىك حاتشىسى لاۋازىمىنا ۇمىتكەر ەنتوني بلينكەن دە بۇل باعالاۋمەن كەلىسەتىنىن ايتتى. وسىعان جاۋاپ رەتىندە قحر ءسىم وكىلى حۋا چۋنين پومپەو «الەمدەگى كۇلكىلى سايقىمازاققا اينالدى» دەگەن.

"The Qazaq Times"