اقش سەناتى مەملەكەتتىك حاتشى لاۋازىمىنا ەنتوني بلينكەننىڭ كانديداتۋراسىن بەكىتتى. ول باراك وباما كەزىندە ۇلتتىق قاۋىپسىزدىك بويىنشا كەڭەسشىنىڭ ورىنباسارى قىزمەتىن اتقارعان.

جاڭادان سايلانعان ەنتوني بلينكەن 2015-2017 جىلدار ارالىعىندا اقش مەملەكەتتىك حاتشىسىنىڭ ورىنباسارى بولىپ جۇمىس ىستەگەن. دجو بايدەننىڭ پرەزيدەنتتىك ناۋقانى كەزىندە سىرتقى ساياسات بويىنشا باس كەڭەسشىسى بولعان. كانديداتۋراسىن بەكىتۋ بويىنشا تىڭدالىم كەزىندە ول دونالد ترامپ اكىمشىلىگىنىڭ سىرتقى ساياسات بويىنشا ماڭىزدى سۇراقتارىن قايتا قاراستىرۋعا ۋادە بەردى.

بۇعان دەيىن اقش مەملەكەتتىك حاتشىسىنىڭ قىزمەتىن مايك پومپەو اتقارعان بولاتىن. پومپەونى اتالعان لاۋازىمعا 2018 جىلى ساۋىردە پرەزيدەنت دونالد ترامپ ۇسىنعان.

ترامپ اكىمشىلىگىندەگى پومپەو قىزمەتتىك كەزەڭى اياقتالار تۇستا، ەكى اپتا بۇرىن قىتايدىڭ شىڭجاڭ ساياساتىن «گەنوتسيد» دەپ ايىپتادى. پومپەونىڭ مالىمدەمەسىن جاڭادان سايلانعان مەملەكەتتىك حاتشى ەنتوني بلينكەن دە قولدايتىنىن مالىمدەدى.

بۇل ايىپتاۋدى ادەتتەگىدەي جوققا شىعارعان بەيجىڭ اقش-تىڭ 28 لاۋازىمدى تۇلعاسىنا سانكتسيا ەنگىزەتىنىن حابارلادى. ولاردىڭ قاتارىندا اق ءۇي جانىنداعى ۇلتتىق ساۋدا كەڭەسىنىڭ باسشىسى پيتەر ناۆاررو، پرەزيدەنتتىڭ ۇلتتىق قاۋىپسىزدىك جونىندەگى كومەكشىسى روبەرت و ' برايەن، اقش-تىڭ بۇۇ جانىنداعى تۇراقتى وكىلى كەللي كرافت، اقش دەنساۋلىق ساقتاۋ مينيسترلىگىنىڭ بۇرىنعى باسشىسى الەكس ازار جانە ترامپتىڭ ۇلتتىق قاۋىپسىزدىك جونىندەگى بۇرىنعى كەڭەسشىسى دجون بولتون بار.

"The Qazaq Times"