اقش پرەزيدەنتى دونالد ترامپ ەل تۋىن ورتەگەندەر 1 جىلعا باس بوستاندىعىنان ايىرىلۋى ءتيىس دەپ مالىمدەدى.

تۋلسا (وكلاحوما) قالاسىندا وتكەن كەزدەسۋدە ترامپ: «ەكى كۇن بۇرىن پورتلەندتە سولشىل راديكالدار دجوردج ۋاشينگتوننىڭ ءمۇسىنىن بۇزىپ، امەريكانىڭ تۋىن ورتەدى. بۇدان بىلاي تۋدى ورتەگەندەر 1 جىلعا قامالۋى ءتيىس. وسىنداي زاڭ ۇسىنامىن»، – دەدى.

امەريكا زاڭىنا سايكەس قازىرگى ۋاقىتتا اقش تۋىن ورتەۋگە تىيىم سالمىنبايدى، ويتكەنى جوعارعى سوتتىڭ تۇسىنىكتەمەسى بويىنشا بۇل قۇقىق العاشقى كونستيتۋتسياعا ءسوز بوستاندىعى بابى رەتىندە ەنگىزىلگەن.

بەيسەنبىگە قاراعان ءتۇنى امەريكانىڭ پورتلاند قالاسىندا نارازىلىق بىلدىرۋشىلەر اقش-تىڭ تۇڭعىش پرەزيدەنتى (1789-1797) دجوردج ۋاشينگتوننىڭ ەسكەرتكىشىن قيراتقان. قولا ەسكەرتكىشتى «نەمىس-امەريكا قوعامى» اتالاتىن كوممەرتسيالىق ەمەس ۇيىمى ورناتقان. نارازىلار اقش تۋىن مۇسىنگە وراپ، ورتەپ جىبەرگەن. سودان كەيىن ولار ەسكەرتكىشتى قۇلاتىپ، قىزىل بوياۋمەن «1619» دەپ جازعان. ءدال سول جىلى امەريكا قۇراما شتاتتارىنا العاش رەت افريكالىق قۇلدار كەلگەن.

دجوردج ۋاشينگتون – امەريكا قۇراما شتاتتارىنىڭ نەگىزىن قالاۋشىلاردىڭ ءبىرى. تاۋەلسىزدىك سوعىسى كەزىندە ول كونتينەنتالدى ارميانى باسقاردى، كەيىنىرەك 1787 جىلى اقش كونستيتۋتسياسىن دايىنداپ، كونستيتۋتسيالىق كونۆەنتسيانىڭ توراعاسى بولىپ سايلاندى. سوڭعى جىلدارى قارا ناسىلدىلەر قۇقىعىن قورعاۋشىلار د.ۋاشينگتوننىڭ قىزمەتىن سىنعا الىپ، «قۇلدىق جۇيەنى قولداۋشى» دەپ اتادى.

ميننەاپوليستە (ميننەسوتا) افروامەريكالىق دجوردج فلويدتىڭ ولىمىنە قارسى جاپپاي نارازىلىق شارالارى كەزىندە اقش-تا بيلىككە قارسى كۇرەستىڭ تاعى ءبىر تولقىنى باستالدى. 25 مامىردا فلويد پوليتسيا قىزمەتكەرلەرىنىڭ قولىنان قازا تاپقان. كەيىننەن بىرنەشە قالادا ءىرى شەرۋلەر ءوتتى. نارازىلار امەريكا ازاماتتىق سوعىسى (1861-1865) كەزىندە وڭتۇستىككە قۇل يەلەنۋشى مەملەكەتتەردى بىرىكتىرگەن كونفەدەراتسيا قايراتكەرلەرىنە ارنالعان ەسكەرتكىشتەردى ءبۇلدىردى. سونىمەن قاتار، زەرتتەۋشى كريستوفەر كولۋمبقا ارنالعان بىرنەشە ەسكەرتكىشتەر ءبۇلىندى.

"The Qazaq Times"