تارتىستى سوت: فلويدتىڭ قازاسىنا كىنالى وفيتسەردىڭ سوتى باستالدى

اقش-تا دجوردج فلويدتىڭ ولىمىنە تىكەلەي جاۋاپتى دەپ ايىپتالعان بۇرىنعى پوليتسيا قىزمەتكەرىنىڭ سوت وتىرىسى باستالدى.

دەرەك چاۆەننىڭ ءىسى بويىنشا سوت پروتسەسى ءالى دە ەكى اپتاعا دەيىن سوزىلۋى مۇمكىن. ەگەر ونىڭ كىناسى دالەلدەنسە، بۇرىنعى وفيتسەر 40 جىلعا دەيىن باس بوستاندىعىنان ايىرىلماق. ال دجوردج فلويدتىڭ ولىمىنە قاتىسى بار وزگە دە ءۇش وفيتسەردىڭ سوت وتىرىسى تامىز ايىندا وتەتىن بولادى.

سوتقا دەيىن جۇزدەگەن ادام قۇقىق قورعاۋ ورگاندارى تاراپىنان كورسەتىلەتىن زورلىق-زومبىلىققا قارسى بەيبىت ميتينگ وتكىزدى. وسىعان بايلانىستى ميننەاپوليس مەرياسى قالاداعى پوليتسيا بولىمشەلەرىنىڭ قورشاۋلارىن بەكىتۋگە 1 ميلليون دوللار قارجى بولگەن. سەبەبى بىلتىرعى تارتىپسىزدىكتەر كەزىندە ەرەۋىلشىلەر دجوردج فلويدتىڭ ولىمىنە قاتىسى بار وفيتسەر جۇمىس ىستەگەن جەرگە وت قويعان بولاتىن.

بىلتىر 25 مامىردا ميننەاپوليس قالاسىندا 46 جاستاعى دجوردج فلويد پوليتسەي وكىلدەرىنىڭ كوز الدىندا جان تاپسىرعان. دۇكەن كاسسيرى مارقۇم جالعان بانكنوتپەن ەسەپ ايىرىسپاق بولدى دەگەن ۋاجبەن پوليتسيا شاقىرادى. ارتىنشا وقيعا ورنىنا كەلگەن ءتارتىپ ساقشىلارى كۇدىكتىنىڭ قولىنا كىسەن سالعاننان كەيىن وفيتسەرلەردىڭ ءبىرى ونىڭ جەلكەسىن اياعىمەن 7 مينۋتتاي باسىپ تۇرعان. داۋىسى قارلىققان افروامەريكالىق ءوزىنىڭ دەم الا الماي جاتقانىن ايتادى، بىراق وعان پوليتسەيلەر قۇلاق اسپاعان. وسىدان كەيىن «مەن تۇنشىعىپ قالدىم!» تىركەسى شەرۋدىڭ باستى ۇرانىنا اينالدى.

29 مامىردا ميننەسوتادا دجوردج فلويدىڭ ولىمىنە تىكەلەي قاتىسى بار دەپ ايىپتالعان بۇرىنعى پوليتسەي دەرەك شوۆين تۇتقىندالدى. كۋاگەرلەر تۇسىرگەن ۆيدەوكادردى ساراپتاعان مامانداردىڭ ايتۋىنشا، دەرەك شوۆين دجوردج فلويدتىڭ «دەمالا الماي جاتىرمىن» دەگەنىنە قاراماستان موينىن قىسىپ ۇستاپ بىرنەشە مينۋت بوساتپاعان.

دجوردج فلويد ولىمىنە ۇقساس جاعداي 2014 جىلى ورىن العان. سول جىلى 17 شىلدەدە نيۋ-يوركتە اق ءناسىلدى پوليتسيا قىزمەتكەرى دانيەل پانتالەو قارا ءناسىلدى ەريك گارنەردى ۇستاۋ كەزىندە تۇنشىقتىرۋ ءادىسىن قولدانعان. پوليتسيانىڭ قارا ناسىلدىلەرگە كورسەتكەن زورلىق-زومبىلىعىنا قارسى كۇرەسىندە «مەن تۇنشىعىپ قالدىم» ءسوزى جاپپاي ۇرانعا اينالدى.

"The Qazaq Times"