سۇرياداعى سوڭعى جاعدايلارعا بايلانىستى تۇركيا مەن رەسەي قاتىناسى شيەلەنىسىپ كەتۋى مۇمكىن. سەبەبى، ءسۇريانىڭ سولتۇستىك باتىسىنداعى يدليب پروۆينتسياسىندا رەسەي قولداۋىنداعى باشار اساد كۇشتەرى مەن تۇركيا قولداۋىنداعى كوتەرىلىسشى قارۋلى توپتار اراسىندا قاقتعىس جالعاسىپ جاتىر.

رەسەي قورعانىس مينيسترلىگى تاراتقان مالىمدەمەدە تۇركيانى قارۋلى توپتارعا قولداۋ كورسەتىپ، ءسۇريا ۇكىمەتىنە سوققى جاسادى دەپ ايىپتاعان. بۇعان جاۋاپ رەتىندە ماسكەۋگە تيەسىلى كۇشتەر دە كوتەرىلىسشىلەرگە اياۋسىز سوققىلار جاساعان.

تۇركيا دا ءوز كەزەگىندە باشار اساد رەجيمىنە قاراستى قارۋلى كۇشتەرگە ارتيللەريالىق سوققى بەرگەنىن ناتيجەسىندە ونداعان سۇريالىق اسكەردىڭ كوزىن جويىپ، بەس تانك جانە ەكى اسكەري جۇك كولىگىن تالقانداعانىن مالىمدەدى. انكارا ءوز مالىمدەمەسىندە ەكى اسكەرى قازا تاپقاننان كەيىن سۇرياعا قارسى سوققى جاساماۋعا شاراسىز قالعانىن ايتتى.

اقپان ايى باستالعاننان كەيىن ءسۇريا ۇكىمەت ارمياسى ءيدليبتى كوتەرىلىسشى قارۋلى توپتاردان وزىنە قايتارىپ الۋ ءۇشىن اسكەري ارەكەتتەرگە كىرىسكەن ەدى. بۇعان تۇركيا ۇكىمەتى قاتتى الاڭدادى جانە قارسىلىق ءبىلدىردى. يدليب پروۆينتسياسى تۇركيا ءۇشىن ستراتەگيالىق ماڭىزدى ايماقتىڭ ءبىرى. ونىڭ ۇستىنە يدليبتە ءسۇريانىڭ جەر-جەرىنەن باس ساۋعالاي كەلگەن بوسقىنداردى قوسقاندا 3-4 ملن حالىق تۇرادى. ەگەر بۇل وڭىردە الەۋمەتتىك تۇراقسىزدىق باستالسا تۇركيا ءۇشىن ۇلكەن قاۋىپ الا كەلەدى.

بۇعان دەيىن تۇركيا پرەزيدەنتى ءسۇريا ماسەلەسى بويىنشا رەسەيمەن مامىلەنى قايتا قاراۋى مۇمكىن ەكەنىن ايتتى. ماسكەۋدىڭ تۇركيانى ايىپتاي جاساعان مالىمدەمەسىنەن كەيىن ەكى ەل اراسى الىستاپ، جانجالدار ورىن الۋى مۇمكىن دەگەن پىكىرلەر بار.

 

“The Qazaq Times”