«كومپلەكسسىز بولاشاق ۇستازدار» ءبىلىم ءمينيسترىن سۇراق استىنا الدى

29 قاڭتار اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە وتكەن كەزدەسۋدە 16-شى ءبىلىم ءمينيسترى  اسحات ايماعامبەتوۆ بولاشاق پەداگوگ ستۋدەنتتەردىڭ وتكىر سۇراقتارىنا جاۋاپ بەردى.

ديالوگ فورماتىنداعى كەزدەسۋدە مينيستر جارتى ساعاتتىق بايانداماسىندا ءبىلىم بەرۋ سالاسىنداعى وزگەرىستەر مەن پەداگوگتارعا جاسالعان / جاسالاتىن مەملەكەتتىك قولداۋ تۋرالى سويلەدى. قالعان 40 مينۋت بويى پەداگوگيكالىق سالادا ءبىلىم الاتىن 3-4 كۋرس ستۋدەنتتەرى سۇراقتى قارشا بوراتى.

كەزدەسۋگە اباي اتىنداعى قازاق ۇلتتىق پەداگوگيكالىق ۋنيۆەرسيتەتى، ءال-فارابي اتىنداعى قازاق ۇلتتىق ۋنيۆەرسيتەتى، قازاق ۇلتتىق قىزدار پەداگوگيكالىق ۋنيۆەرسيتەتى جانە ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ ستۋدەنتتەرى قاتىستى.

«پەداگوگ مارتەبەسى تۋرالى» جاڭا زاڭدا كوزدەلگەن ادەپ كەڭەسى بولاشاقتا ديرەكتورلار ءۇشىن «باسقاشا» ويلايتىن، ءوزىنىڭ قۇقىعىن قورعاي بىلەتىن بەلسەندى مۇعالىمدەردى جۇمىستان بوساتۋ تەتىگىنە اينالماي ما دەگەن ساۋالىمىزعا اسحات قاناتۇلى:

– ادەپ كەڭەسى ديرەكتوردىڭ پەداگوگتى ورنىنان بوساتۋعا قاتىستى جالعىز ءوزى شەشىم قابىلداۋىنا جول بەرمەيدى، – دەپ جاۋاپ قايىردى.

ونىڭ سوزىنشە، بىلتىر پەداگوگيكالىق ماماندىقتار ءۇشىن شەكتى بالل 60 بولسا، ال بيىل مۇنى ۆەدومستۆو 70 بالعا دەيىن كوتەرمەك.

جاڭارتىلعان مازمۇنداعى ءبىلىم بەرۋ باعدارلاماسىنىڭ ارتىقشىلىعى مەن مۇمكىندىگىن ءتۇسىندىردى. حيميا جانە بيوتەحنولوگيا سالاسىنىڭ بىلىمگەرلەرى جوو مەن مەكتەپتە تەحنيكالىق-زەرتحالىق بازانىڭ سىن كوتەرمەيتىنىن ايتىپ شاعىندى. «ناقتى عىلىم بولعاندىقتان، وندىرىستىك قۇرىلعىلارعا اۋاداي ءزارۋمىز» دەگەن جاستار تەك نزم جەلىسىنىڭ ءبىلىم وشاعىنادا عانا زەرتحانالىق مۇمكىندىك بارىن ايتتى. سونىمەن قوسا ستۋدەنتتىڭ ءبىرى «وقۋلىقتاعى ولقىلىقتار» مەن «ءارتۇرلى باسپادان جارىق كورگەن مەكتەپتەردىڭ بىرىزدىلەنبەۋىن» ايتىپ سىنعا الدى.

– 4 كۋرس ستۋدەنتىمىن. ءسوزدىڭ شىنى كەرەك، حيميا پانىنەن مۇعالىم بولعاندىقتان، وقىتۋ پروتسەسىندە لابوراتورياعا مۇقتاجبىز. بىلتىر نازارباەۆ زياتكەرلىك مەكتەبىندە تاجىريبەدەن وتتىك، سوندا وقۋشىلارعا ءتيىستى دەڭگەيدە باعدار بەرە المادىق. تەحنيكالىق بازانىڭ جوقتىعىنان قاجەتتى ءبىلىم-بىلىكتى يگەرە الماي كەلەمىز. سىزدەردەن ءوتىنىشىم، جاڭارتاساڭىزدار ەكەن، – دەپ مينيسترگە ساۋال جولدادى حيميا كافەدراسىنىڭ ستۋدەنتى.

اسحات ايماعامبەتوۆ جاستاردىڭ سۇراۋىن ورىندى دەپ باعالاي كەلە، «2020-2025 جىلدارعا ارنالعان ءبىلىم مەن عىلىمدى دامىتۋدىڭ جاڭا مەملەكەتتىك باعدارلاماسى» اياسىندا 2025 جىلعا دەيىن بارلىق مەكتەپ 4 كابينەتپەن (حيميا، فيزيكا، بيولوگيا، ستەم) جانە جوو قاجەتتى بازامەن قامتىلادى» دەپ ۋادە بەردى.

سونداي-اق مەكتەپكە دەيىن ءبىلىم بەرۋ ماماندىعىنىڭ ستۋدەنتتەرى ءوز ماماندىعىنىڭ الەۋمەتتىك ورتاداعى بەدەلى مەن وعان قولداۋ ماسەلەسى جايلى سۇراۋ جولدادى. مينيستر مەكتەپتىڭ مەملەكەتتىلىك، ۇلتتىق قۇندىلىق وشاعى ەكەنىن ەسكە الىپ، «بولاشاق سوت، دارىگەر، پوليتسەي، عالىم، شەنەۋنىك تە سول جەردەن شىعادى، سوندىقتان ءبىلىم بەرۋ سالاسى قاشاندا نازاردا» دەدى.

تاعى ءبىر ستۋدەنت «نزم سىنىبىندا ون وقۋشىدان، ال ورتا مەكتەپتەردە 30-35 وقۋشىدان ءبىر سىنىپتا وتىراتىنىن العا تارتىپ، ايىرماشىلىقتىڭ سەبەبىن» سۇرادى. سونداي-اق جيىندا وقىتۋ ۇدەرىسىندە قولدانىلاتىن ادىستەمەلىك كەمشىلىكتەر ءسوز بولىپ، «پەداگوگ مارتەبەسى تۋرالى» زاڭنىڭ ءرولى مەن وعان قاتىستى الىپقاشپا سوزدەرگە تۇسىندىرمە بەردى.

جيىن سوڭىندا مينيستر «پەدوگيكالىق ءبىلىم الىپ جاتقان ستۋدەنتتەردى مەكتەپكە كەلىپ ەڭبەك ەتۋگە شاقىردى».

جۋىردا قازاقستان «بالا تاربيەسى جونىندە ەڭ ۇزدىك ەلدەر» رەيتينگىندە 73 ەلدىڭ اراسىندا 73 ورىنعا، ال «ءبىلىم بەرۋ سالاسىنداعى ۇزدىك ەلدەر» رەيتينگىندە  73 ەلدىڭ اراسىنان 70 ورىنعا جايعاسقان بولاتىن.

"The Qazaq Times"