Jastardıñ bilim ministri Ashat Aymağambetovpen kezdesui. 29 qañtar 2019 jıl. Fotokollaj: QT

29 qañtar Abay atındağı Qazaq wlttıq pedagogikalıq universitetinde ötken kezdesude 16-şı bilim ministri  Ashat Aymağambetov bolaşaq pedagog studentterdiñ ötkir swraqtarına jauap berdi.

Dialog formatındağı kezdesude ministr jartı sağattıq bayandamasında bilim beru salasındağı özgerister men pedagogtarğa jasalğan / jasalatın memlekettik qoldau turalı söyledi. Qalğan 40 minut boyı pedagogikalıq salada bilim alatın 3-4 kurs studentteri swraqtı qarşa boratı.

Kezdesuge Abay atındağı Qazaq wlttıq pedagogikalıq universiteti, äl-Farabi atındağı Qazaq wlttıq universiteti, Qazaq wlttıq qızdar pedagogikalıq universiteti jäne Abılay han atındağı Qazaq halıqaralıq qatınastar jäne älem tilderi universitetiniñ studentteri qatıstı.

«Pedagog märtebesi turalı» jaña zañda közdelgen ädep keñesi bolaşaqta direktorlar üşin «basqaşa» oylaytın, öziniñ qwqığın qorğay biletin belsendi mwğalimderdi jwmıstan bosatu tetigine aynalmay ma degen saualımızğa Ashat Qanatwlı:

– Ädep keñesi direktordıñ pedagogti ornınan bosatuğa qatıstı jalğız özi şeşim qabıldauına jol bermeydi, – dep jauap qayırdı.

Onıñ sözinşe, bıltır pedagogikalıq mamandıqtar üşin şekti ball 60 bolsa, al biıl mwnı vedomstvo 70 balğa deyin kötermek.

Jañartılğan mazmwndağı bilim beru bağdarlamasınıñ artıqşılığı men mümkindigin tüsindirdi. Himiya jäne biotehnologiya salasınıñ bilimgerleri JOO men mektepte tehnikalıq-zerthalıq bazanıñ sın kötermeytinin aytıp şağındı. «Naqtı ğılım bolğandıqtan, öndiristik qwrılğılarğa auaday zärumiz» degen jastar tek NZM jelisiniñ bilim oşağınada ğana zerthanalıq mümkindik barın ayttı. Sonımen qosa studenttiñ biri «oqulıqtağı olqılıqtar» men «ärtürli baspadan jarıq körgen mektepterdiñ birizdilenbeuin» aytıp sınğa aldı.

– 4 kurs studentimin. Sözdiñ şını kerek, himiya päninen mwğalim bolğandıqtan, oqıtu procesinde laboratoriyağa mwqtajbız. Bıltır Nazarbaev ziyatkerlik mektebinde täjiribeden öttik, sonda oquşılarğa tiisti deñgeyde bağdar bere almadıq. Tehnikalıq bazanıñ joqtığınan qajetti bilim-bilikti igere almay kelemiz. Sizderden ötinişim, jañartasañızdar eken, – dep ministrge saual joldadı himiya kafedrasınıñ studenti.

Ashat Aymağambetov jastardıñ swrauın orındı dep bağalay kele, «2020-2025 jıldarğa arnalğan bilim men ğılımdı damıtudıñ jaña memlekettik bağdarlaması» ayasında 2025 jılğa deyin barlıq mektep 4 kabinetpen (himiya, fizika, biologiya, stem) jäne JOO qajetti bazamen qamtıladı» dep uäde berdi.

Sonday-aq mektepke deyin bilim beru mamandığınıñ studentteri öz mamandığınıñ äleumettik ortadağı bedeli men oğan qoldau mäselesi jaylı swrau joldadı. Ministr mekteptiñ memlekettilik, wlttıq qwndılıq oşağı ekenin eske alıp, «bolaşaq sot, däriger, policey, ğalım, şeneunik te sol jerden şığadı, sondıqtan bilim beru salası qaşanda nazarda» dedi.

Tağı bir student «NZM sınıbında on oquşıdan, al orta mektepterde 30-35 oquşıdan bir sınıpta otıratının alğa tartıp, ayırmaşılıqtıñ sebebin» swradı. Sonday-aq jiında oqıtu üderisinde qoldanılatın ädistemelik kemşilikter söz bolıp, «Pedagog märtebesi turalı» zañnıñ röli men oğan qatıstı alıpqaşpa sözderge tüsindirme berdi.

Jiın soñında ministr «pedogikalıq bilim alıp jatqan studentterdi mektepke kelip eñbek etuge şaqırdı».

Juırda Qazaqstan «bala tärbiesi jöninde eñ üzdik elder» reytinginde 73 eldiñ arasında 73 orınğa, al «bilim beru salasındağı üzdik elder» reytinginde  73 eldiñ arasınan 70 orınğa jayğasqan bolatın.

"The Qazaq Times"