پۋتين مەن زەلەنسكيدىڭ كەلىسسوزى پاريجدە وتپەك. فوتو: Delo.ua

رەسەي مەن ۋكراينا باسشىلارى كەلەسى اپتادا پاريجدە ۋكراينانىڭ ۇكىمەت كۇشتەرى مەن ەل شىعىسىنداعى رەسەيشىل بۇلىكشىلەر اراسىنداعى بەس جىلدىق سوعىستى اياقتاۋ ءۇشىن العاشقى بەتپە-بەت كەزدەسۋلەر وتكىزەدى. بۇل ەۋروپالىق ءسامميتتىڭ كۇن تارتىبىندە ورىن العان.

ۋكراينا ۇكىمەت كۇشتەرى مەن ەل شىعىسىنداعى بولشەكتەۋشى رەسەيشىل كۇشتەر اراسىندا 5 جىلعا سوزىلعان قاقتىعىستاردان 13 مىڭنان استام ادامنىڭ قازا تاپقانى بەلگىلى. وسى جىلدار ىشىنەد ماسكەۋ تارابى ۋكراينا شىعىسىنداعى قاقتىعىستارعا رەسەيلىك اسكەرلەردىڭ قاتىسپاعانىن العا تارتىپ كەلدى. ءارى ونداعى بولشەكتەۋشى كۇشتەردى بەيتاراپ قاراستىرىپ كەلگەن. ەۋروپا تارابى ماسەلەنى كەلىسسوز ۇستەلىنە شىعارۋعا سان مارتە تىرىسقان. الايدا، بۇدان ناتيجە بولماعان.

ۋكراينا ماسەلەسى 5 جىلدىق شيەلەنىسكە جەتكەن تۇستا ەل بيلىگىنە زەلەنسكي كەلدى. ول سايلاۋ الدى ۋادەلەرىنىڭ بىرىندە ۋكراينانىڭ شىعىسىنداعى سوعىستى توقتاتاتىنىن ايتىپ ەدى. زەلەنسكي بيلىگىنىڭ ءوز ۋادەسى جونىندە العاشقى ادىمداعى جەتىستىگى دە جوق ەمەس. قىركۇيەك ايىندا رەسەي مەن ۋكراينا تۇتقىنداردى الماستىردى.

كەيبىر ساراپشىلاردىڭ پىكىرىنشە، زەلەنسكيدىڭ وسى ۋادەسى كرەملگە دە مۇمكىندىك بەرگەن. ايتالىق، ۋكراينانىڭ جاس پرەزيدەنتى بەرگەن ۋادە اسا سالماقتى جانە ول ونىڭ ورىندالۋىن ءۇمىت ەتەدى. بۇل رەسەي ءۇشىن جاڭا تالاپتار مەن كەلىسسوز شارتتارىن ۇسىنۋ ءۇشىن تاماشا وراي.

ەكى ەلدىڭ كەلىسسوزىنە اسەر ەتكەن فاكتورلاردىڭ ءبىرى – زەلەنسكي ەفەكتى.  زەلەنسكيدىڭ ساياساتقا كەلۋگە دەيىنگى بەينەسى جانە ونىڭ ازىلدەرى رەسەيگە دە كەڭ تاراعان. ونىڭ ءوزى رەسەيلىكتەردىڭ كوزقاراسىنا اسەر ەتكەنىن دە ايتا كەتۋ كەرەك. باسقا دا ماڭىزدى فاكتورلاردىڭ بار ەكەنى بەلگىلى.

ساراپشىلار پاريجدەگى كەلىسسوزدە رەسەي مۇنايى مەن گازىنىڭ ۋكراينا ارقىلى ەۋروپاعا ءوتۋى جانە لۋگانسك پەن دونباستاعى سوعىس سىندى ەكى ماسەلە «ساۋداعا ءتۇسۋى» مۇمكىن دەپ قارايدى.

“The Qazaq Times”