ازەربايجان بيلىگىنىڭ "اقساقالى" بۇرىنعى پرەزيدەنت اتىنداعى وردەنمەن ماراپاتتالدى. فوتو: PRESIDENT.AZ

ازەربايجاننىڭ پرەزيدەنتتىك اكىمشىلىگىن باسقارىپ كەلگەن راميز مەحتيەۆ دوعارىسقا (وتستاۆكا) كەتتى. بىراق، پرەزيدەنت يلحام اليەۆ ونى اكەسى گەيدار اليەۆ اتىنداعى وردەنمەن ماراپاتتاپ، ۇلتتىق عىلىم اكادەمياسىنا جەتەكشى ەتىپ تاعايىندادى.

ازەربايجاندىق تاۋەلسىز ساراپشىلار مەحتيەۆتىڭ وتستاۆكاعا كەتۋى الدىن الا جوسپارلانعان جانە بۇعان وتكەن اپتا سوڭىنداعى نارازىلىق شارالارى دا تۇرتكى بولدى دەپ قارايدى. نازار اۋدارارلىعى ءبىر عانا راميز مەحتيەۆتىڭ قىزىمەتىنەن كەتۋى  ەمەس، جالپى ازەربايجان جوعارى بيلىگىندەگى وزگەرىستەر بولىپ وتىر. جاقىن بىرنەشە كۇندە ازەربايجاننىڭ لاۋازىمدى تۇلعالارى اراسىندا اۋىس-كۇيىس كوبەيدى. ەكى بىردەي ۆيتسە-پرەمەر دوعارىسقا كەتتى جانە ەكونوميكا ءمينيستىرى بولىپ 43 جاستاعى ميكايل جابباروۆ كەلدى. 

دەگەنمەن، ازەربايجاندىق تاۋەلسىز ساراپشىلار بۇل وزگەرىستەردى رەفورما قاتارىندا قارامايدى. ولار كەرىسىنشە ۇكىمەت مونوپوليا مەن اقشا جىمقىرۋدىڭ جاڭا تاسىلىنە كوشتى دەپ تۇسىندىرەدى. مۇناي، التىن، قۇرىلىس كاسىبى سىندى مونوپوليا مەن جەمقورلىقتىڭ "مايلى جىلىگىنە" جاڭا ادامدار شىعىپ جاتىر. وسى ارقىلى ۇكىمەت قارجى ۇرلاۋدىڭ جاڭا تاسىلىنە كوشكەن. بۇعان قوسا، وپپوزيتسيا تارابى ەلدەگى ساياسي وزگەرىستەردى رەسەي ىقپالىنىڭ ناتيجەسى دەپ سانايدى.

راميز مەحتيەۆ ازەربايجاندا كەڭەس وداعى تۇسىنان باستاپ لاۋازىمدى قىزمەتتەردە بولعان. گەيدار اليەۆ تۇسىندا، انىقتاي ايتقاندا 1995 جىلدان باستاپ جوعارى لاۋازىمدى ورىندارعا شىقتى. مەحتيەۆ بۇعان دەيىن ازەربايجان بيلىگىندەگى باستى يدەولوگ جانە اسا ىقپالدى ادام رەتىندە بەلگىلى بولعان. بۇعان دەيىن ول تۋرالى "رەسەي ادامى" دەگەن پىكىر دە بار، بۇعان نەگىز دە جوق ەمەس ەدى. ول وتستاۆكاعا كەتۋ ارقىلى رەسەيمەن قارىم-قاتىناستى رەتتەپ وتىرۋ سىندى جاڭا مىندەپ جۇكتەگەن بولۋى مۇمكىن دەگەن پىكىردە ساراپشىلار.

“The Qazaq Times”