نيكاراگۋا تايۋاندى قىتاي تەرريتورياسىنىڭ ءبىر بولىگى دەپ تانىدى

كەشە، 9 جەلتوقسان ورتالىق امەريكادان تاعى ءبىر ەل تايۋانمەن (تايۆان) ۇزاق جىلدىق ديپلوماتيالىق بايلانىستارىن توقتتاتىپ، بەيجىڭدى رەسمي مويىندادى. بۇل جاعداي تايبەيدىڭ (تايبەي) ونسىزدا از قالعان ديپلوماتيالىق بايلانىستاعى ەلدەرىنىڭ سانىن ءتىپتى دە قىسقارتا ءتۇستى.

نيكاراگۋا سىرتقى ىستەر مينيسترلىگى تايۋانمەن ديپلوماتيالىق بايلانىستى ۇزگەنى تۋرالى رەسمي مالىمدەمەسىن اعىلشىن جانە يسپان تىلدەرىندە جاريالادى. وندا: «نيكاراگۋا رەسپۋبليكاسىنىڭ ۇكىمەتى بۇگىن تايۋانمەن ديپلوماتيالىق قارىم-قاتىناستى توقتاتتى جانە كەز كەلگەن بايلانىس پەن رەسمي قارىم-قاتىناستى ءۇزدى»، – دەلىنگەن.

نيكاراگۋا تايۋانمەن رەسمي بايلانىستاردى ۇزۋمەن قاتار ونى قىتايدىڭ اجىراماس ءبىر بولىگى دەپ تانيتىنىن دا مالىمدەدى. اتالمىش مالىمدەمەدە: «قىتاي حالىق رەسپۋبليكاسى بۇكىل قىتايدى بىلدىرەتىن جالعىز زاڭدى ۇكىمەت، ال تايۆان قىتاي تەرريتورياسىنىڭ اجىراماس بولىگى بولىپ تابىلادى»، – دەلىنگەن.

تايۋان ءسىم تارابىدا مالىمدەمە جاساپ، نيكاراگۋانىڭ كەزەكتى شەشىمىنە «وكىنىش ءبىلدىردى». سونداي-اق، بارلىق ەكىجاقتى بايلانىستار مەن ىنتىماقتاستىق كەلىسىمدىرىن، كومەك ميسسيالارىن توقتاتاتىنىن، ەلشىلەرىمەن ازاماتتارىن شىعارىپ كەتەتىنىن جەتكىزدى.

بەيجىڭ ۇكىمەتى وزىمەن ديپلوماتيالىق بايلانىس ورتانقان كەز-كەلگەن ەلدەن «ءبىر قىتاي ءپرينتسيپىن» مويىنداۋدى تالاپ ەتەدى. اتالمىش پرينتسيپ تايۋان ارالى قىتايدىڭ اجىراماس ءبىر بولىگى جانە قحر قىتاي مەملەكەتىن بىلدىرەتىن بىردەن-ءبىر زاڭدى بيلىك دەگەن ۇستانىمداردى قامتيدى.

The Qazaq Times