برازيلياداعى ورمان ءورتى رەكوردتىق دەڭگەيگە جەتتى. امازوننىڭ جۇرەگى، دۇنيەنىڭ وكپەسى اتالعان ورماننىڭ ورتەنۋىنە الەم ەلدەرى باسا نازار اۋدارۋدا. ءتىپتى بۇل حالىقارالىق ساياسي ماسەلەگە دە اينالىپ كەتتى.

سوعان قاراماستان ەل ۇكىمەتى بىرنەشە كۇن بۇرىن «ۇلكەن جەتىلىك» ۇسىنعان 22 ملرد دوللار كولەمىندەگى كومەك قاراجاتىن الۋدان باس تارتقان ەدى. برازيليا فرانتسيانى وتارلىق مامىلەدە بولدى دەپ سىنداعان. ال، كەشە ورتكە ورانعان ەلدىڭ بيلىگى كومەك قاراجاتىن قابىل الاتىنىن، الايدا ونى باقىلاۋدى قاتاڭ ۇستايتىنىن جەتكىزگەن.

ورمان ءورتى شىتىرمان توعايدا جاساعان مىڭداعان جان-جانۋارلاردىڭ ءومىرىن جالماپ، ەندى امازوننىڭ بايىرعى تۇرعىندارى قونىستانعان ايماققا جاقىنداي تۇسكەن. ءبىر سوزبەن ايتقاندا جەرگىلىكتى تۇرعىنداردىڭ ءومىرى قىل ۇستىندە تۇر. ولار ۇكىمەتتىڭ ورتكە قارسى شارالارىنىڭ جەتەرسىزدىگىنە ناليدى. الايدا، برازيليانىڭ رەسمي مالىمدەمەسىندە: «ورمان ءورتىن برازيليا پرەزيدەنتى قويعان جوق. بىراق، ءتىلسىز جاۋدىق اۋىزدىقتاۋدى ۇكىمەت ءوزىنىڭ باستى مىندەتى رەتىندە قويىپ وتىر»، – دەگەن.

امازوننىڭ جەرگىلىكتى تۇرعىندارى «ەڭ ۇلكەن قورقىنىش ورماننىڭ ءورتى ەمەس، برازيليانىڭ ۇكىمەتى. ولار ءبىزدىڭ مەكەنىمىزدى، امازوندى تالقانداپ جوق قىلۋعا ارەكەت ەتىپ جاتىر»، – دەيدى.

شىن مانىسىندە، الەم جۇرتشىلىعى «پلانەتانىڭ وكپەسى» اتالعان ورماننىڭ ورتەنۋىنە قاپا بولىپ جاتسا، برازيليادا جەردىڭ زاڭدى يەلىك قۇقىعىنا تالاسۋ بولىپ جاتىر. ورمانداعى ءورتتىڭ سەبەبى دە سول دەگەن سىلتەۋلى ءسوز كوپ. جەرگىلىكتى تۇرعىنداردىڭ جەرىن تارتىپ الۋ ءۇشىن ۇكىمەتپەن استاسقان الدە كىمدەر ورماندى ورتەپ جىبەرگەن بولۋى مۇمكىن دەيدى سونداعى فەرمەرلەر.

“The Qazaq Times”