كورنەكى سۋرەت. الماتى اۋەجايىنداعى وقۋ-جاتتىعۋ ساتىنەن. 24 قاڭتار 2020 جىل. فوتو: Informburo.kz. / المازا تولەكە

ناۋرىز ايىندا ەلدە انىقتالعان 16 مىڭ ناۋقاستىڭ شيرەك بولىگى تىركەلگەن الماتى قالاسىندا بريتان، وڭتۇستىكافريكالىق جانە برازيليا شتامدارى تابىلدى.

بۇل تۋرالى دەنساۋلىق ساقتاۋ ءمينيسترلى الەكسەي تسوي 19 ناۋرىز تۇستە Facebook جەلىسىندەگى پاراقشاسىندا جازدى. ونىڭ ايتۋىنشا، ۇكىمەت ددسۇ-مەن بىرگە Covid-19 شتامدارىن انىقتايتىن ەكسپرەسس پتر-سكرينينگتىڭ جاڭا ادىستەمەسىن قولعا العان.

«بيىل 17 ناۋرىزدا ۇلتتىق قوعامدىق دەنساۋلىق ساقتاۋ ورتالىعى فيليالىنىڭ رەفەرەنس-زەرتحاناسى الماتى قالاسىنداعى ناۋقاستاردان الىنعان زەرتحانالىق ۇلگىلەردى زەردەلەدى. زەرتتەۋ ناتيجەسى «بريتان»، «وڭتۇستىك افريكا»، «برازيليا» شتامدارىنا ۇقساس بولجالدى مۋتاتسيا انىقتالدى»، – دەدى مينيستر.

ول ءبىر اي ىشىندە تولىق گەنومدىق سەكۆەنيرلەۋ اياقتالعاننان كەيىن مۋتاتسيانىڭ وسى شتامدارعا جاتار-جاتپاسىن ناقتىلاۋعا ۋادە بەردى.

«كوروناۆيرۋستىڭ الدىن الۋ جانە مۋتاتسيانى ەمدەۋ شارالارى قولدانىستاعى تاسىلدەرگە ۇقساس. بۇل ماسكا رەجيمىن جانە الەۋمەتتىك اراقاشىقتىقتى ساقتاپ، ادام كوپ جينالاتىن ورىندارعا بارماۋ، سونداي-اق حالىقتى جاپپاي ۆاكتسيناتسيالاۋ. ن.ف.گامالەيا اتىنداعى ەپيدەميولوگيا جانە ميكروبيولوگيا عىلىمي-زەرتتەۋ ورتالىعىنىڭ مالىمەتىنشە، قازىر قازاقستاندا قولدانىلاتىن گام-كوۆيد-ۆاك (سپۋتنيك V) ۆاكتسيناسىنىڭ «بريتاندىق» شتامعا توتەپ بەرەتىنى دالەلدەنگەن»، – دەپ تولىقتىردى الەكسەي تسوي.

كەيىنگى ەكى جارىم اپتادا ءبىر عانا الماتى قالاسىندا 4 مىڭعا تارتا ناۋقاس تىركەلىپ ۇلگەردى. قالادا ناۋرىز ايىنىڭ العاشقى دەكاداسىندا تاۋلىگىنە جۇزدەن كەم ەمەس جاعداي تىركەلدى، 10-ىنان بەرى بۇل سان ەسەلەنىپ وسۋدە. سونداي-اق، سىرقاتتار كوبەيگەن ايماقتار قاتارىندا استانا (2468) جانە الماتى (1332), قاراعاندى (1177), اقمولا (1129), پاۆلودار (1100), باتىس قازاقستان (1081) وبلىستارى بار. وسى سەبەپتى استانا مەن الماتىدا كارانتين شاراسى كۇشەيتىلىپ، دەمالىس كۇنى بىرقاتار نىسانداردىڭ جۇمىسىنا تىيىم سالىنىپ، قوعامدىق كولىكتەردىڭ گرافيگى شەكتەلدى.

ناۋرىز ايىنىڭ ەكى جارىم اپتاسىندا 16,5 مىڭ (كۆي+ 15 786, كۆي- 696) كەيس انىقتالعان. الماتىدا ناۋرىز ايى باستالعالى بەرى 237 اۋە رەيسى ارقىلى 3759 جولاۋشى پتر تەستىنىڭ انىقتاماسىنسىز كەلگەن. وسىنى العا تارتقان كەيبىر ساراپشىلار حالىقارالىق اۋە رەيستەرىن ءجيى قابىلدايتىن قالاداعى احۋالدىڭ بىردەن ۋشىعۋىن شەتەلدەن جاڭا شتامم كەلۋى مۇمكىن دەگەن دولبارمەن بايلانىستىرادى. الەكسەي تسوي مەن جانداربەك بەكشين بۇعان قاتىستى گەنومدىق زەرتتەۋ جالعاسىپ جاتقانىن مالىمدەگەن. وتكەن ۇكىمەت وتىرىسىندا مينيستر بىلتىر قىركۇيەك جانە بيىل قاڭتار ايلارىنىڭ ارالىعىندا اۋىرعانداردىڭ تالداۋ ماتەريالدارىنا گەنومدىق زەرتتەۋ جۇرگىزىلگەنىن جانە وندا بىردە-ءبىر بوتەن شتامم تابىلماعانىن مالىمدەگەن ەدى.

ەلدە قاڭتار ايىنىڭ ەكىنشى جانە اقپان-ناۋرىز ايلارىنىڭ العاشقى جارتىسىندا ناۋقاستار كۇرت كوبەيدى. ماسەلەن، كوروناۆيرۋس پەن وسىعان ۇقساس پنەۆمونيانى قوسا ەسەپتەگەندە وتكەن بەيسەنبى 954, جۇما 1054, سەنبىدە 1058, جەكسەنبى 1018, وسى دۇيسەنبى 1033, سەيسەنبى 1139, سارسەنبىدە 1236 ناۋقاس انىقتالعان.