بۇۇ قاۋىپسىزدىك كەڭەس مۇشەلەرى يران ماسەلەسىنە قاتىستى مالىمدەمە جاسادى

بۇۇ قاۋىپسىزدىك كەڭەسىنىڭ تۇراقتى مۇشەلەرى جانە وزگە دە بىرقاتار ەۋروپا ەلدەرى يرانعا قاراتا بىرلەسكەن مالىمدەمە جاسادى. بۇل مالىمدەمە بۇۇ قك-نىڭ يران ماسەلەسىن تاقىرىپ ەتكەن ارنايى وتىرىسىنان كەيىن جاسالعان. 

قاۋىپسىزدىك كەڭەستىڭ كەزەكتى وتىرىسى يران يادرولىق كەلىسىم تاقىرىبىنا ارنالعان. بريتانيا، فرانتسيا، گەرمانيا، پولشا، بەلگيا جانە ەستونيا ەلدەرى بىرلەسە وتىرىپ جاساعان مالىمدەمەدە، يراندى داعدارىستى كۇشەيتىپ، قاقتىعىسقا جول اشاتىن ارەكەتتەر مەن مالىمدەمەلەرىنەن باس تارتۋعا شاقىرعان.

مالىمدەمەدە، يران تارابىنان جاسالىپ جاتقان كەيبىر ارەكەتتەر اقش-تىڭ اسكەري شابۋىلىنا سەبەپ بولۋى مۇمكىن دەلىنگەن، بۇل ءوڭىردىڭ قاۋىپسىزدىگىنە قاتەر توندىرەتىن قادامدار رەتىندە باعالاعان. سونداي-اق، تەھران تارابىنان جاسالاتىن كەيبىر مالىمدەمەلەر دە شيەلەنىستى ۋشىقتىرىپ، تاراپتاردىڭ قايشىلىعىن كۇشەيتەتىنىن ەسكەرتكەن.

دەگەنمەن، اتالعان ەلدەر يرانمەن جاساسقان يادرولىق كەلىسىمدى ساقتاپ قالۋعا كۇش سالاتىنىن بىلدىرگەن. قازىرگى پارسى شىعاناعىنداعى قاۋىپسىزدىك پەن تۇراقتىلىق ماسەلەسىندە يرانمەن جاساسقان يادرولىق كەلىسىمنىڭ ساقتالۋى اسا ماڭىزدى ەكەنىن دە راستاعان.

شىنىن قۋعاندا، اقش-تىڭ يادرولىق كەلىسىمنەن بىرجاقتى شىعىپ كەتۋى جانە يرانعا ەكونوميكالىق، ساياسي قىسىمداردى ارتتىرۋى قازىرگى اقش-يران داعدارىسىنىڭ نەگىزگى سەبەپتەرى بولعانىمەن، تەھران بيلىگىنىڭ كەيبىر ۇشقارى ارەكەتتەرى مەن اسىرە مالىمدەمەلەرى دە قايشىلىقتى اسقىندىرىپ، ەكى ەل اراسىنداعى كەلىسسوز ديالوگىنا مۇمكىندىك بەرمەي كەلەدى.

“The Qazaq Times”