الەمدەگى بوسقىندار سانى كوبەيە ءتۇستى. فوتو: BBC/AFP.

بىرىككەن ۇلتتار ۇيىمىنا قاراستى بوسقىندار اگەنتتىگى ءبىر كۇن بۇرىن مالىمدەمە جاساپ الەمدەگى بوسقىندار سانى بىلتىرعىمەن سالىستىرعاندا 2,3 ملن ادامعا كوبەيگەنىن ايتتى. اتالعان اگەنتتىكتىڭ ەسەبىنە قاراعاندا، الەمدە قارۋلى قاقتىعىستار، ءتۇرلى جانجالدار مەن قىسىمداردان 70,8 ملن ادامنىڭ ءوز مەكەندەرىنەن قونىس اۋدارۋعا ءماجبۇر بولعان. 

اتالعان اگەنتتىكتىڭ كورسەتكەن ەسەبىندە، سوڭعى جيىرما جىلدا الەمدە بوسقىندار سانى ەكى ەسەگە دەيىن وسكەن. ءبىر جىلداعى بوسقىندار سانىن كۇنگە شاعاتىن بولساق، ءار كۇنى 37 مىڭ ادام مەكەنىن تاستاپ بوسىپ كەتۋگە ءماجبۇر بولادى ەكەن. زەرتتەۋشىلەر بۇل ەسەپ الداعى ۋاقىتتا قاقتىعىستار، قىسىمدار اسەرىنەن بوسقىندار سانىنىڭ ءتىپتى دە ارتا تۇسەتىنىن كورسەتەدى دەپ قارايدى.

الەم ەلدەرىندەگى بوسقىندار تۋرالى كەزەكتى ەسەپكە ۆەنەسۋەلاداعى داعدارىس قوسىلماعاندىقتان بوسقىندار سانى ەسەپتەگىدەن الدە قايدا كوپ بولۋى مۇمكىن. سەبەبى، ۆەنەسۋەلاداعى الەۋمەتتىك داعدارىس باستالعالى بەرى 4 ميلليونعا جۋىق ادام ەلدەن شىعىپ كەتكەن.

شاراسىز قونىس اۋدارۋشىلاردىڭ 3 ۇلكەن توبى 

بۇۇ-عا قاراستى اگەنتتىكتىڭ زەرتتەۋىنە سايكەس، بوسقىنداردى ءۇش توپقا بولۋگە بولادى.

ءبىرىنشى توبى قاشقىندار نەمەسە سوعىس قىسىمنان باس ساۋعالاپ ەرىكسىز قونىس اۋدارۋشىلار. بۇلاردىڭ سانى 25,9 ملن ادام. ءبىر عانا پالەستينالىق بوسقىنداردىڭ سانى 5,5 ملن ادامدى قۇرايدى.

ەكىنشى توبى ساياسي باسپانا سۇراپ قونىس اۋدارعان 3,5 ملن ادام. ولار ءوز مەملەكەتتەرىنىڭ شەت جەرلەردە جاسايدى، الايدا ولارعا رەسمي بوسقىن مارتەبەسى بەرىلمەگەن.

ءۇشىنشى توبى ءوز مەملەكەتى ىشىندە نەمەسە شەت مەملەكەتكە قونىس اۋدارۋعا ءماجبۇر بولعان 41,3 ملن ادام. ولار نەگىزىنەن ءسۇريا، اۋعانستان، ميانما، وڭتۇستىك سۋدان جانە سومالي ەلدەرىنەن كوبىرەك سىرتقا شىققان.

سوعىس سەبەبىنەن بوسقىن بولعاندار سانى ءسۇريادا ەڭ كوپ تىركەلگەن، ياعني 6,7 ملن سۇريالىق سوعىس سەبەبىنەن بوسقىن بولعان. اۋعانستاندا بۇل سان 2,7 ملن.

الەمدەگى بوسقىنداردىڭ نەبارى 7 پايىزى عانا مەكەندەرىنە قايتا العان.