اقش-وڭتۇستىك كورەيا بىرلەسكەن اسكەري وقۋ-جاتتىعۋى. فوتو: South China Morning Post.

اقش مەملەكەتتىك دەپارتامەنتىنىڭ كەشە جاريا ەتكەن مالىمەتىندە، اقش-وڭتۇستىك كورەيا اراسىندا قورعانىس شىعىنىن ءبولىسۋ تۋرالى كەلىسىمگە كەلگەنى ايتىلدى. وڭتۇستىك كورەياداعى اقش اسكەرلەرىنىڭ قورعانىس شىعىندارىن ءبولىسۋ ماسەلەسىندە ەكى تاراپ 10 مارتە كەلىسسوز جۇرگىزىپ ناقتى ناتيجەگە جەتە الماعان بولاتىن.

مالىمدەمەدە: «امەريكا قۇراما شتاتتارى مەن وڭتۇستىك كورەيا اراسىندا كورەياداعى اقش اسكەرلەرىنىڭ قورعانىس شىعىندارىن ءبولىسۋ تۋرالى جاڭا ارنايى كەلىسىمى جاسالدى. تاراپتار وزگە تەحنيكالىق ماسەلەلەردى شەشۋ ءۇشىن بىرلەسە جۇمىس ىستەمەك»، – دەلىنگەن.

CNN تەلەارناسى اقش مەملەكەتتىك دەپارتامەنتىنىڭ رەسمي تۇلعالارىنىڭ سوزىنە سىلتەمە جاساي وتىرىپ، جاڭا كەلىسىم بويىنشا وڭتۇستىك كورەيا تارابى 1 ملرد اقش دوللارى كولەمىندەگى قورعانىس شىعىنىن كوتەرەتىنىن ايتادى. تاراپتار ناقتى كەلىسىمگە قول جەتكىزگەنگە دەيىن بارلىق شىعىنداردى وڭتۇستىك كورەيا وتەپ كەلگەن.

2014 جىلدان باستاپ بىلتىر جىل سوڭىنا دەيىنگى مەرزىمگە جاسالعان كەلىسىم بويىنشا، وڭتۇستىك كورەيا ءوز جەرىندەگى امەريكالىق اسكەرلەر ءۇشىن 848 ملن دوللار قاراجات ءبولىپ كەلگەن. وڭتۇستىك كورەيادا اقش-تىڭ 28 مىڭ 500 اسكەرى جانە 20-دان استام اسكەري بازاسى بار.

2014 جىلعى كەلىسىمنىڭ مەرزىمى اياقتالعان ۋاقىتتا قۇراما شتاتتار وڭتۇستىك كورەيادان 1,6 ملرد اقش دوللار كولەمىندەگى قورعانىس شىعىندارىن موينىنا الۋدى تالاپ ەتكەن. الايدا، بۇل وڭتۇستىك كورەيا جاعىنان تويتارىلدى. اقش جالپى 20 ملرد دوللار كولەمىندەگى شىعىن ءۇشىن بۇنىڭ ەشتەڭە ەمەس ەكەنىن ايتقانىمەن، وڭتۇستىك كورەيا جەردى پايدالانعان ءۇشىن امەريكالىقتاردىڭ اقى تولەپ وتىرماعانىن العا تارتتى.

“The Qazaq Times”