سولتۇستىك كورەيا وڭتۇستىك كورەشىسىمەن سەنىم تەلەفونىن قايتا قوستى. فوتو: KCAN

بۇگىن، 4 قازان كۇنى سولتۇستىك كورەيا بيلىگى ءوزىنىڭ رەسمي اقپارات اگەنتتىگى KCNA ارقىلى حابارلاما تاراتىپ، وڭتۇستىك كورەيامەن اراداعى سەنىم تەلەفونىن قايتا قوساتىنىن مالىمدەدى جانە سەۋل بيلىگىن قارىم-قاتىناستى قالپىنا كەلتىرۋگە كۇش سالۋعا شاقىرعان.  

وتكەن اپتادا سولتۇستىك كورەيانىڭ ەڭ جوعارى جەتەكشىسى كيم جوڭ ۋن ءۇزىلىپ قالعان سەنىم تەلەفونى ارقىلى وڭتۇستىك كورەيامەن ديالوگتى قايتا جالعاۋعا دايىن ەكەنىن بىلدىرگەن بولاتىن. ەكى اي بۇرىن كحدر وڭتۇستىك كورەيا مەن اقش بىرىككەن ارمياسىنىڭ ورتاق اسكەري وقۋ-جاتتىعۋلارىنا نارازىلىعىن ءبىلدىرىپ اتالعان سەنىم تەلەفونىن جاۋىپ تاستاعان بولاتىن.

KCNA حابارىندا سولتۇستىك كورەيانىڭ سەنىم تەلەفونىن دۇيسەنبىنىڭ تاڭىندا، ساعات 09:00-دەن باستاپ قوساتىنى ايتىلعان. سونداي-اق، سەۋلدەن شەكارالىق قاقتىعىستاردى جەڭىلدەتۋدەگى «تاپسىرمالارىن» ورىنداۋدى تالاپ ەتكەن، الايدا ونىڭ قانداي تاپسىرمالار ەكەنىن اشىق ايتپاعان.

اتالعان سەنىم تەلەفونى وڭتۇستك-سولتۇستىك كورەيا اراسىنداعى بىردەن ءبىر رەسمي بايلانىس كانالى رەتىندە بەلگىلى. تامىزدىڭ باس شەنىندە سەنىم تەلەفونى ۇزىلگەننەن كەيىن كورەي تۇبەگىندەگى شيەلەنىس ۋشىعا تۇسكەن. سولتۇستىك كورەيا قاۋىپسىزدىك داعدارىسى تۋرالى ەسكەرتۋ جاسادى جانە ءتورت بىردەي زىمىران سىناعىن وتكىزىپ ۇلگەردى.

سولتۇستىك كورەيانىڭ زىمىران سىناقتارى سول ەلدەگى ۇزدىكسىز جەتىلدىرىلىپ جاتقان يادرولى قارۋ تاسىمالداۋعا قابىلەتتى قۇرلىقارالىق بالليستيكالىق زىمىران قۋاتىن ايگىلەدى. ونىڭ ۇستىنە بۇل كورەي حالىقتىق دەموكراتيالىق رەسپۋبليكاسىن يادرولىق قارۋدان باس تارقىزۋ ءۇشىن سالىنعان سانكتسيالار مەن كەلىسسوزدەردىڭ دە بەلگىلى دەڭگەيدە تىعىرىققا تىرەلگەنىن بايقاتتى.

ورىستار كيم چەن ىن دەپ اتاپ جۇرگەن كحدر جەتەكشىسى ءوز مالىمدەمەسىندە وڭتۇستىك كورشىلەرىن «سولتۇستىك كورەيانىڭ اسكەري ارانداتۋشىلىعى» دەيتىن «يلليۋزياسىنان» ارىلۋعا دا شاقىرعان.

The Qazaq Times