پۋتين مەن نازارباەۆتىڭ پەتروپاۆلداعى كەزدەسۋى قانداي تاقىرىپتاردى قوزعادى؟

8-9 قاراشا كۇندەرى پەتروپاۆل قالاسىندا XV وڭىرارالىق ىنتىماقتاستىق فورۋمى ءوتتى. اتالعان شارا سولتۇستىكتەگى شالعاي وبلىس ءۇشىن تاريحي وقيعالاردىڭ ءبىرى بولعاندىعى بەلگىلى. بۇل ءۇشىن قالانىڭ اۋەجايىنان باستاپ، قوناق ۇيلەرىنە دەيىن قايتادان جوندەۋدەن وتكىزىلىپ ءتۇرلى عيماراتتار جاڭاشا كۇيگە ەنگەن. تۋريزم مەن ساۋدا سەرىكتەستىكتى نىعايتۋ ماقساتىندا ۇيىمداستىرىلعان شارا بارىسىندا، رەسەي مەن قازاقستان پرەزيدەنتتەرى بىرقاتار جوبالارعا توقتالدى.

رەسەي فەدەراتسياسىن قازاقستان ءۇشىن ستراتەگيالىق وداقتاس ءارى ساۋدا-ەكونوميكا سالاسىنداعى ماڭىزدى سەرىكتەس ەكەندىگىن اتاپ وتكەن ن. نازارباەۆ، تۋريزم، تاۋار اينالىمى، مۇناي-گاز، تاۋ-كەن مەتاللۋرگياسى جانە اگروونەركاسىپ كەشەنى جاعىنان ىنتىماقتاستىقتى ودان ءارى نىعايتۋعا توقتالىپ ءوتتى. بۇدان بولەك، جاھاندىق ەكونوميكاداعى ماڭىزدىلىعىن ايتىپ، ەكى ەلدىڭ تۋريستىك الەۋەتىن ءتيىمدى پايدالانىپ، ونى ودان ءارى دامىتۋ ءۇشىن جۇيەلى شارالار قابىلداۋدى دا نازاردان تىس قالدىرمادى. بۇدان كەيىن قازاقستان پرەزيدەنتى كورشىلەس ەلدەرمەن ۆيزالىق جانە كوشى-قون رەجىمىن جەڭىلدەتە وتىرىپ، كاسپي تەڭىزىندە تۋريزم جونىندەگى ىنتىماقتاستىقتىڭ جۇيەسىن قۇرۋدى، سونداي-اق، مەديتسينا جانە ءبىلىم سالاسىنداعى ءتۋريزمدى دامىتۋ كەرەكتىگىن دە ۇسىندى.

بىراق، تۋريزم مەن ساۋدا-ساتتىق بۇرىننان جالعاسىپ كەلە جاتقاندىقتان، بۇل كەزدەسۋدىڭ تاعى ءبىر سەبەبى بار ەكەندىگى راس. ويتكەنى، سوڭعى ۋاقتتاردا ماسكەۋ ءوزىنىڭ ەۋرازيالىق ەكونوميكالىق وداق اياسىنداعى ارىپتەستەرىن بىرلەسىپ اقش-قا قارسى كونترسانكتسيا سالۋعا ءجيى شاقىرۋدا. الايدا، كوپ ۆەكتورلى ساياست ۇستانىپ وتىرعان قازاقستان جانە امەريكامەن سالىستىرعاندا ەكونوميكاسى تومەن قىرعىزستان، بەلارۋسسيا، ارمەنيا سىندى ەلدەر ءۇشىن بۇل ۇسىنىستىڭ ءتيىمسىز ەكەندىگى بەلگىلى. دەسە دە، ماسكەۋ ءوزىنىڭ اقش-پەن اراداعى باقتالاستىققا ەۋرازيالىق وداق ەلدەرىن تارتۋىن توقتاتار ەمەس. اتالعان كەزدەسۋ دە سونىڭ ءبىر ناتيجەلى جوسپارى بولۋى بەك مۇمكىن.

حالىقارالىق ساراپشىلاردىڭ سوزىنشە، رەسەيدىڭ سوڭعى ۋاقىتتارى قازاقستان تاۋارلارىن ءوز اۋماعىنا وتكىزبەي قويۋى ءدال وسى اقش-قا سالىنۋى ءتيىس كونترسانكتسيا توڭىرەگىندە بولىپ جاتقان ساياسي ويىنداردىڭ ءبىر بولىگى. رەسمي ماسكەۋ ءوزىنىڭ وسى ءىس-ارەكەتى ارقىلى استاناعا قىسىم كورسەتكىسى كەلەدى. بىراق وسى ۋاقىتقا دەيىن قازاقستان بيلىگى رەسەيدىڭ بۇل ارەكەتىنە قانداي دا ءبىر جاۋاپ قاتپاعان جانە ماسكەۋ باستاماسىن قولداۋعا ەشقانداي نيەت بىلدىرمەگەن.

الايدا، ءتيىمسىز ۇسىنىسقا ءتىل قاتپاي كەلە جاتقان استانا، بۇل جولى تاعى دا ءۇنسىز قالعان سىڭايلى. سوندىقتان، تەك تۋريزم مەن تاۋار اينالىمىنان اسا الماعان كەزدەسۋ بارىسىندا، ءپۋتيننىڭ تاعى ءبىر جوسپارى ناتيجەسىز اياقتالعان بولۋى مۇمكىن.

"The Qazaq Times"