پومپەو قايتىپ بارىسىمەن كومەكشىسىن ازياعا اتتاندىردى

اقش مەملەكەتتىك حاتشىسى پومپەونىڭ شىعىس ازيا ساپارى اياقتالا سالىسىمەن ونىڭ حالىقارالىق قاۋىپسىزدىك جونىندەگى كومەكشىسى ازياعا اتتاندى. ساپارىنىڭ باستى ماقساتى ايماقتاعى ەلدەرمەن كەلىسسوزدەر جۇرگىزە وتىرىپ، سولتۇستىك كورەيانىڭ يادرولىق قارۋدان باس تارتۋىنا قولداۋ مەن قىسىمدى قاتار كورسەتۋ. بۇل تۋرالى اقش-تاعى WSJ باسىلىمى حابارلاعان بولاتىن.

اقش مەملەكەتتىك حاتشىسىنىڭ كومەكشىسى كريستوفەر فوردتىڭ ازيا ساپارى سينگاپۋر، ۆەتنام جانە تايلاندقا ەلدەرىنە جاسالادى. ول وسى ەلدەردە بۇۇ قاۋىپسىزدىك كەڭەسىنىڭ سولتۇستىك كورەياعا قاراتقان قىسىمدارىن جانە ەكونوميكالىق سانكتسيالاردى قاتاڭ ساقتاۋدى ناسيحاتتاۋى ءتيىس.

مەملەكەتتىك دەپارتامەنتتىڭ مالىمدەمەسىندە ايتىلۋىنشا، فورد ۆەتنام مەن تايلاند ساپارى كەزىندە يادرولىق ەنەرگيانى بەيبىت ماقساتتا پايدالانۋ ماسەلەسىن تالقىلايدى.

اتالعان ەلدەر وڭتۇستىك شىعىس ازياداعى ماڭىزدى ويىنشىلاردىڭ قاتارىنا جاتادى. ءارى، سولتۇستىك كورەيانىڭ بۇل ەلدەرمەن بولعان قارىم-قاتىناسى جاقسى. كحدر-نى تولىقتاي يادرولىق قارۋدان باس تارتۋعا كوندىرۋ ءۇشىن بۇل ەلدەردىڭ سولتۇستىك كورەياعا سالىنعان سانكتسيانى ءوز قالپىندا ساقتاپ تۇرۋى كەرەك. بۇل پيوڭياڭ بيلىگىنە دەگەن قىسىمدى ارتتىرا بەرەدى.

ايتا كەتەيىك، سوڭعى جىلدارى اقش پەن ۆەتنام اراسىنداعى بايلانىس جوعارى دەڭگەيگە كوتەرىلدى. ۆەتنام بولسا وڭتۇستىك قىتاي تەڭىزىندەگى تەرريتوريالىق داۋ-دامايدىڭ قاتىسۋشىسى.

“The Qazaq Times”