بايدەن اكىمشىلىگى ۇكىمەت قۇرامىن ەندى عانا جاساقتاپ، قىزمەتكە جاڭادان كىرىسىپ جاتىر. سوعان قاراماستان ۋشينگتون ءوزىنىڭ ءداستۇرلى مىنەزىن تانىتىپ،  ەڭ الدىمەن ەۋروپالىق وداقتاستارىمەن قىسقا-نۇسقا سويلەسىپ، كەلىسىمدەردى پىسىقتاپ شىعا سالدى دا، بىردەن ءۇندى-تىنىق مۇحيتى ايماعىنداعى ء(ۇتما) وداقتاستارىن قىتايدىڭ سىن-قاتەرىنە قارسى جۇمىلدىرۋعا كىرىستى. بايدەننىڭ باس ديپلوماتى بولىپ ەنتوني بلينكەن بەكىتىلە سالىسىمەن جاپونيا جانە وڭتۇستكى كورەيا ءسىم باسشىلارىنا قوڭىراۋ شالدى.

اقش-تىڭ داڭا مەملەكەتتىك حاتشىسى مەن جاپونيا سىرتقى ىستەر ءۋازىرى ء(مينيسترى) توشيميتسۋ موتەگيگە تىنىق مۇحيتتىڭ باتىس جاعالاۋىنىڭ اشىقتىعىن، تۇراقتىلىعىن، ورنىقتىلىعى جانە بەيبىتشىلىگىن قورعاۋ ءۇشىن ورتاق جۇمىس ىستەۋگە ۋادەلەستى. ال، وڭتۇستىك كورەيانىڭ سىرتقى ىستەر ءمينيسترى كان كىن-ۆاعا قوڭىراۋ شالعاندا اقش-كورەيا قاتىناسى ءوڭىر تۇراقتىلىعىنىڭ باستى كەپىلى ەكەنىن ايتىپتى.

بلينكەن ايماقتاعى وداقتاستارىنىڭ ءسىم باسشىلارىمەن سويلەسىپ جاتقاندا، ياعني، 26 قاڭتاردا پەنتاگوننىڭ جاڭا باسشىسى وستين اۋستراليانىڭ قورنعانىس ءمينيسترى ليندي رەينولدس حانىمعا قوڭىراۋ شالدى. پەنتاگوننىڭ مالىمدەمەسىندە ەكى قورعانىس ءمينيسترى ءۇندى-تىنىق مۇحيتى ايماعىنداعى قاۋىپسىزدىك سىن-قاتەرلەرىنە ورتاق جاۋاپ بەرۋگە دايىن.

مينيستر وستين بۇعان دەيىن جاپونيا مەن وڭتۇستىك كورەيانىڭ قورعانىس مينيسترىمەن تەلەفون ارقىلى سويلەسىپ، اقش-تىڭ جاپونيا مەن وڭتۇستىك كورەيا اراسىنداعى سەنىمدى وداقتاستىق قاتىناستاردى تاعى ءبىر رەت راستاعان.

بايدەن دە ەۋروپالىق وداقتاستارىنان تارتىپ، قىتايدىڭ شىعىسىنداعى وداقتاستارىنىڭ جەتەكشىلەرىنە قوڭىراۋ شالىپ، وداقتاستارىمەن سىرتقى ساياساتتاعى كەيبىر ورتاق ۇستانىمداردى پىسىقتاعان. بۇل ارەكەتتەردەن بايدەن ۇكىمەتىنىڭ قىتايعا قانداي اشىق پوزيتسيا ۇستانۋدى ءالى دە ءجىتى تالقىلاپ جاتقانىن بايقاۋعا بولادى. ارينە، قازىرگىدەي قايشىلىقتى كەزدە قىتايمەن قانداي قارىم-قاتىناس ءتۇرىن تاڭداۋ بايدەن بيلىگى ءۇشىن وڭاي بولمايدى.

قىتاي ليدەرى شي جينپيڭ (سي تسزينپين) «داۆوس كۇن ءتارتىبى» دۇنيەجۇزىلىك ەكونوميكالىق فورۋمى كەزىندە اقش-تىڭ بۇرىنعى ترامپ اكىمشىلىگىن قىتايعا قارسى «حالىقارالىق توسقاۋىل ۇيىمداستىردى» دەپ سىنعا الىپ، ءارى مۇنداي ارەكەت الەمدى ءبولىنۋ مەن قاقتىعىسقا الىپ كەلەتىنىن ايتقان بولاتىن.

اق ءۇي ءباسپاسوز وكىلى ءبىر كۇن بۇرىن جۋرناليستەرگە بەرگەن جاۋابىندا «ەڭ جاقسى ءادىل – وداقتاستارىمەن بىرگە جۇمىس ىستەۋ» ەكەنىن، ءارى بەيجىڭنىڭ مۇنداي پوزيتسياسى بايدەن بيلىگىنىڭ قىتايعا باعىتتاعان ستراتەگياسىن وزگەرتە المايتىنىن ايتقان.

“The Qazaq Times”