الماتى قالاسىنداعى جەتكىزۋ قىزمەتىمەن اينالىساتىن كومپانيالاردىڭ كۋرەرلەرى باعدارشامنىڭ رۇقسات بەلگىسىن كۇتىپ تۇر. 25 قازان 2021 جىل. فوتو: QT / كۇلتەگىن اسپانۇلى

الماتى قالاسىندا سارسەنبى كۇنى Glovo كومپانياسىنىڭ جۇمىسشىلارى ەرەۋىل وتكىزەر بۇرىن بىرنەشە بەلسەندى ۇستالعانى حابارلاندى.

ولاردىڭ اراسىندا كۋرەرلەردىڭ تىركەلمەگەن كاسىپوداق جەتەكشىسى جەڭىس ورىناليەۆ تە بار. بۇل جونىندە Vlast سايتى جازدى. اقپاراتقا قاراعاندا، كۋرەرلەردى پوليتسيا المالى اۋداندىق پوليتسيا باسقارماسىنا جەتكىزگەن.

«بەلسەندىلەردى تاڭەرتەڭگى ساعات 11:30 شاماسىندا ۇستاپ اكەتكەنىن بىلەمىز، بىراق ناقتى قاي جەردە – ۇيىندە مە الدە اكىمدىككە بارعان كەزدە ۇستادى ما، ول جاعى بەلگىسىز. ءبىزدىڭ تەلەفوندارىمىز تىڭدالدى ما دەگەن كۇدىك پايدا بولدى. قۇقىق قورعاۋ ورگاندارى ءاردايىم ءبىزدىڭ اكتسيالارىمىز جونىندە حاباردار» دەدى كۋرەرلەردىڭ ءبىرى Vlast سايتىنا.

ءباسپاسوز قىزمەتىنەن الدەبىر اقپارات الۋ قيىن پوليتسيا دەپارتامەنتى ادەتتەگىدەي وقيعاعا دەر كەزىندە تۇسىنىكتەمە بەرمەدى. كومپانيا جۇمىسشىلارى ۇستالعانداردى قولداۋ ءۇشىن پوليتسيا باسقارماسىنا باراتىنىن دا ايتقان.

وسىعان دەيىن Glovo كۋرەرلەرىنىڭ سارسەنبىدە، 27 قازاندا الماتى اكىمدىگى الدىنا جينالىپ، 20 تالابىن جەتكىزەتىنى جونىندە حابار تاراعان.

Glovo سەرۆيسىنىڭ قىزمەتكەرلەرى العاشقى نارازىلىق اكتسياسىن شىلدە ايىنىڭ باسىندا وتكىزگەن. سودان كەيىن ولار ەڭبەك جاعدايىن جاقسارتۋدى جانە جالاقىنى كوتەرۋدى تالاپ ەتتى. دەسە دە ونداعان كۋرەرمەن كەزدەسكەن قالالىق كاسىپكەرلىك باسقارماسىنىڭ باسشىلىعى مەن كومپانيا وكىلدەرى تالاپقا ساي شەشىم شىعارماعان.

The Qazaq Times