حالىقتىڭ 95 پايىزى ازىق-تۇلىك تاپشىلىعىن كورىپ وتىر. فوتو: BBC

اۋعانستان كاتاسترافانىڭ الدىندا تۇر. ەلدەگى الەۋمەتتىك جاعداي كۇن سايىن ناشارلاپ، ەكونوميكا تولىقتاي كۇيرەگەن. بۇۇ ەسەبىنشە حالىقتىڭ 95 پايىزى ازىق-تۇلىكتىڭ تاپشىلىعىن تارتىپ وتىر، جالپى ەسەپتە 23 ملن اۋعانستاندىق اشتىققا ۇشىراۋدا.

اقش باستاعان بىرقاتار باتىس ەلدەرى قولداعان ۇكىمەت تامىز ايىندا قۇلاتىلىپ، «تاليبان» ۇيىمى بيلىكتى سوعىسسىز باسىپ الدى. اۋعان جەرىنە تالىپتەردىڭ ەكىنشى رەت بيلىك ورناتقانىنا 100 كۇننەن استى، بۇل تۇستا اۋعانستان اسا قاۋىپتى داعدارىستىڭ الدىندا تۇر.

مەكتەپ، ەمحانا، ۇكىمەتتىك جانە ءتۇرلى الەۋمەتتىك مەكەمەلەر دەرلىكتەي جۇمىسكەرلەرىنە ايلىق بەرە الماعانىنا بىرنەشە اي بولعان. بۇنداي جاعدايدى ءوز كوزىمەن كورگەن BBC-ءدىڭ ءجۋرناليسى يالدا حاكيم ەلدەگى جاعدايدى «قورقىنىشتى» دەپ سۋرەتتەيدى. ونىڭ ايتۋىنشا بىرقاتار ورتالىق قالالارداعى ەمحانالاردا دارىگەرلەر جالاقىسىز جۇمىس ىستەگەنىنە ۇزاق ۋاقىت بولعان. ولار جۇمىسقا بارىپ-كەلۋگە اقشالارى جوق بولسا دا جاياۋلاپ ءجۇرىپ ەرىكتى تۇردە جۇمىس ىستەپ كەلەدى.

حالىقارالىق ۇيىمداردان كەلەتىن كومەكتەردىڭ قىسقارۋىنان ەمحانالارداعى اۋرۋلاردىڭ جاعدايى تىپتەن قيىنداعان. ينفەكتسيانىڭ تارالۋى ءالى دە قارقىندى كۇيىندە تۇر. از تاماقتانۋدان اۋرۋعا قارسىلىق قۋاتى ازايعان سىرقات ادامدار شاراسىز كۇيدە، مىنە وسىنىڭ ءبارى يالدا حاكيمنىڭ ارنايى رەپورتاجىندا ايتىلدى.

ەلدەگى قازىرگى جاعدايعا بايلانىستى تالىپتەر باتىس ەلدەرى مەن حالىقارالىق قاۋىمداستىقتى ايىپتايدى.  ايتالىق، «تاليبان» وكىلدەرىنىڭ ءبىرى سۋحالي شاحين باتىس ەلدەرىنىڭ ارەكەتى اۋعانستاندى وسىنداي مۇشكىل كۇيگە ءتۇسىردى دەپ سانايدى. ول سوزىندە: «ەگەر ولار بۇل ەل كۇيرەۋ الدىندا، الەۋمەتتىك داعدارىس الدىندا نە اشارلىق الدىندا تۇر دەپ جاتقان بولسا وندا وسى بويىنشا شارا كورۋلەرى، تراگەديانىڭ الدىن الۋعا ارەكەت ەتۋ سولاردىڭ جاۋاپكەرشىلىگىندە»، –دەگەن.

ارينە، ءتالىپ وكىلىنىڭ ايتىپ جاتقانىن تولىقتاي تەرىسكە شىعارۋ قيىن. بەلگىلى دەڭگەيدە اۋعانستاننىڭ قازىرگىدەي كۇيگە تۇسۋىنە ونداعى ءتۇرلى پروتسەستەرگە ارالاسقان ەلدەردىڭ جاۋاپكەرشىلىگى بار. قالاي دەگەن كۇندە دە قازىر اۋعانستاندا ميللونداعان بەيبىت تۇرعىن اشتىق الدىندا، ۇلكەن ۇمىتسىزدىك پەن تورىعىستىڭ ىشىندە جاساپ جاتىر.

The Qazaq Times