سولتۇستىك كورەيا حالقى اشارشىلىق قاۋپىندە قالدى. بۇل تۋرالى بۇۇ-نىڭ ارنايى ەكسپەرتتەرى دابىل قاعۋدا. ەلدەگى بۇۇ-نىڭ ادام قۇقىعى جونىندەگى بايانداماشىسى كدحر-نىڭ اۋىر ەكونوميكالىق داعدارىسقا تاپ بولعانىن العا تارتىپ، يادرولىق باعدارلاماعا بايلانىستى سالىنعان حالىقارالىق سانكتسيانى الىپ تاستاۋعا شاقىرعان.

توماس وحەا سولتۇستىك كورەياداعى بۇۇ-نىڭ ادام قۇقىعى جونىندەگى بايانداماشىسى. ول ەكونوميكالىق سانكتسيا مەن حالىقارالىق شەكتەۋلەر سولتۇستىك كورەياداعى ازىق-تۇلىك تاپشىلىعىن تۋدىرىپ، ناتيجەسىندە حالىقتىڭ جاپپاي اشارشىلىققا ۇشىراۋ قاۋپى ءتونىپ تۇرعانىن مالىمدەدى.

سولتۇستىك كورەيا ازىق-تۇلىك، اۋىلشارۋاشىلىق تىڭايتقىشتارى جانە جانار جاعار ماي ساتىپ الۋدا قىتايمەن ساۋداعا مەيلىنشە تاۋەلدى. Covid-19 ۆيرۋسىنىڭ تارالۋىن توقتاتۋ ماقساتىندا بيلىك ەلدىڭ شەكاراسىن جاۋىپ تاستاعان، بۇل قىتايمەن ساۋدانى مۇلدە تۇرالاتقان.

تەك قانا بيلىكتى كوتەرمەلەۋگە قىزمەت ەتەتىن رەسمي اقپارات قۇرالى  «ورتالىق اقپارات اگەنتتىگىنىڭ» ءوزى ەڭ جوعارى كوسەم كيم جوڭ ۋننىڭ دا ەلدىڭ اۋىر جاعدايعا تاپ بولعانىن مويىنداعانىن ايتقان ەدى. وسىدان-اق، ەلدەگى اۋىر الەۋمەتتىك جاعدايدى باعامداۋعا بولادى.

ەلدەگى اۋىر ەكونوميكالىق جاعدايعا بايلانىستى بۇۇ ەكسپەنرتتەرى حالىقارالىق سانكتسيالاردى جەڭىلدەتىپ، گۋمانيتارلىق كومەكتەردىڭ بەرىلۋىنە مۇمكىندىك قالدىرۋىن سۇراۋدا.

اقش پەن كحدر اراسى ءالى دە «ال قايتەسىڭ» كۇيىندە تۇر. بايدەن اكىمشىلىگى سولتۇستىك كورەيامەن سويلەسۋدى قالايتىنىن، بىراق سانكتسيالار توقتاۋدان بۇرىن پيوڭياڭ يادرولىق باعدارلاماسىنان باس تارتۋى كەرەك دەگەن قاتىپ سەمگەن شارتىندا تۇر. اقش پەن وڭتۇستىك كورەيانى ءوزىن جويۋدى كوزدەيتىن جاۋ دەپ بىلەتىن پيوڭياڭ بيلىگى بۇعان مۇلدە كەلىسپەيتىنى 70 جىلدان بەرى تۇسىنىكتى جايتى.

جابىق رەجيمدە ەل بيلەپ وتىرعان كيم بولسا بىرەر اپتا بۇرىن اقش-تى تاعى دا ايىپتاپ، شيەلەنىستى ۋشىقتىرىپ كەلەدى دەدى. ەلدەگى اۋىر الەۋمەتتىك، ەكونوميكالىق جاعدايعا قاراماستان كجپ بيلىگى ءوزىن ءوزى قورعاۋ قابىلەتىن كۇشەيتۋ ءۇشىن بالليستيكالىق زىمىرانداردان تارتىپ ءتۇرلى اسكەري تەحنيكالارىن دامىتۋدى جالعاستىرۋ ۇستىندە.

The Qazaq Times