ءۇندىستان جوعارى سوتى ادامداردىڭ ءوز ەركىمەن ءولىمدى تاڭداۋىن زاڭداستىردى

ءۇندىستاننىڭ جوعارى سوتى جاڭا شەشىمىن جاريا ەتىپ، ايىقپاس دەرتكە شالدىعىپ جانى قينالعان ادامنىڭ ءوز ەركىمەن ولۋىنە رۇقسات ەتتى. ءۇندىستاننىڭ جوعارى سوتى اتالعان «ءوز ەركىمەن ءولۋدى زاڭداستىرۋ» تۋرالى شەشىمدە: «ادامدار ءوز ەركىمەن ولۋگە قۇقىلى»، – دەلىنگەن. بۇل تۋرالى BBC حابارلادى.

ايىقپاس دەرتتەن ازاپ شەگىپ، جانى قينالعان ادامنىڭ ءوز ەركىمەن ءولىمدى تاڭداۋىن ەۆتانازيا دەپ اتالادى. ياعني، ەۆتانازيا – اۋرۋ ازابىنا توزبەگەن ادامنىڭ ءوز ءومىرىن ساقتاپ تۇرعان اسپاپتى توقتاتۋ نەمەسە باسقا ارەكەت، الدە ءبىر قۇرالدىڭ كومەگىمەن ولىمگە بارۋى. بۇل تەك ايىقپاس ءارى اۋرۋدىڭ جان توزگىسىز ازابىنا ۇشىراعان ادامدارعا عانا قولدانىلادى.

ەۆتانازيا. فوتو: وتكرىتايا ازيا.

ءۇندىستان ەۆتانازيانى زاڭداستىرعان الەمدەگى بىردەن ءبىر ەل ەمەس. ەۆتانازيا ەڭ الدىمەن نيدەرلاندىدا زاڭداستىرىلعان. سونىڭ وزىندە بۇل اتالعان ەلدىڭ پارلامەنتىندە ۇزاق ۋاقىت تالقىعا تۇسكەن. كاتوليك جانە پروتەستانت شىركەۋلەرىنىڭ قارسىلىعىنا قاراماستان 2001 جىلى نيدەرلاندىدا اتالعان زاڭ قابىلدانىپ، ءبىر جىلدان كەيىن كۇشىنە ەنگەن. بۇل زاڭعا سايكەس، اۋىر ازاپتان جانى قينالعان ادامنىڭ ءوز ەركىمەن ومىردەن ۋاز كەشكەنى تۋرالى ءوتىنىشىن، الدىمەن ەتيكا بويىنشا كوميتەت قاراپ شىعىپ، بۇل پروتسەدۋرانى اتقارىپ تۇرعان دارىگەرگە رۇقسات ەتەدى. اۋرۋ ازابىنان قينالعان ادامداردىڭ ءوتىنىشىن ورىنداۋعا كومەكتەسەتىن ارنايى ەۆتانازيا قىزمەتى بار. دەگەنمەن، بۇل زاڭ سول ەلدە جاساپ جاتقان شەتەلدىكتەردى قامتىماعان.

ال، ەۋروپالىقتار اراسىندا ەۆتانازيا ءۇشىن شۆەيتسارياعا باراتىندار سانى جىلدان جىلعا ارتىپ كەلە جاتقانى ءمالىم بولعان. بىراق، بۇل ادامدار اراسىندا ومىردەن تۇڭىلگەن نەمەسە دەپرەسسياعا شالدىققاندار دا كەزدەسەدى. بىراق، ولاردىڭ ءولىمدى تاڭداۋىنا دارىگەرلەر مەن ارنايى قىزمەتكەرلەر جول بەرمەيدى. كەرىسىنشە ولاردىڭ ساۋىعىپ كەتۋىنە كومەكتەسەدى. ال، ەۆتانازيانىڭ تىزىمىنە كىرۋ ءۇشىن قات-قابات تەستتەر مەن سىناقتاردان ءوتىپ، دارىگەرلەر مەن پسيحولوگتاردىڭ سىنىنان سۇرىنبەي ءوتىپ، ءولىمدى شىنداپ قالاعانىن دالەلدەي العاندار عانا الىنادى.  ەۆتانازيانىڭ ەڭ سوڭعى باسقىشى جاندى الاتىن ءدارىنى بەرۋدەن بۇرىن دارىگەرلەر «بۇل ءدارى ءسىزدىڭ جانىڭىزدى الادى» دەگەن سوڭعى ەسكەرتۋدى جاسايدى. وسىعان دەيىن ءومىرىن شىنداپ قيعان ادامنىڭ زاڭدى قۇقىعىن ورىندايدى.

بەلگيادا دا وسىنداي زاڭ قابىلدانعان. بۇل ەلدەردىڭ اراسىنا ەندى ءۇندىستان قوسىلدى. بۇل كەزىندە الەمگە تانىمال بولعان ءۇندى فيلمدەرىنىڭ ءبىرى «Guzaarish»-تى ەسكە تۇسىرەدى. وندا اتاق پەن داڭقتى، بايلىق پەن ماراپاتتى بەلشەسىنەن كەشكەن تسيرك شەبەرىنىڭ تاعدىرى اڭگىمەلەنەدى. ءبىر رەت جازاتايىم وقيعادان ءومىر بويى سال بولىپ قالعان جىگىت ۇزاق ۋاقىت قايسارلىقپەن ءومىرىن جالعاستىرادى. وعان ءبىر اقىلدى كومەكشى ايەل قاراسادى. قانشاما ورتالاردا ءومىردى سۇيۋگە، قايسارلىقپەن ءومىردى جالعاستىرۋعا ادامداردى جىگەرلەندىرىپ، لەكتسيا سويلەگەن جىگىت سوڭىندا ءوز اۋرۋىنىڭ ازابىنا جانە ماحابباتتىڭ جانعا باتقان قۇسالىعىنا شىداماي، ءۇندىستان سوتىنان ەۆتانازياعا رۇقسات ەتۋىن سۇرايدى. ونىڭ سوتى سول كەزدەگى ءۇندىستاندى ءدۇر سىلكىندىرەدى. كۇللى ءدان مەن ميزامدار، ادامزاتتىڭ قولدان جاساعان قانشاما جوسىن-جورالعىسى جابىلىپ جىگىتتى سوتتا جەڭەدى. بىراق، جىگىت .... بۇل فيلمگە ۇندىستانداعى باي تاريحىنىڭ فيلوسوفياسى عانا ەمەس، تۇتاس ادامزات قوعامنىڭ تارتىسى كىرىستىرىلگەن.

ءۇندى ءفيلمى "گۋزاريش" فوتو: New On Netflix USA.

ارينە، ءبىر قاراعاندا ميعا كىرمەيتىن بۇل ءبىر زاڭ، قانشاما جىل ءۇندىستان سوتىنىڭ باسىن قاتىرىپ كەلدى. ولگەن ادام قايتىپ كەلە المايتىن بولعاسىن دا ءولىم ادامزاتتىڭ ەڭ ۇلكەن اقيقاتى. بۇل اقيقاتقا ءوزىن يتەرمەلەۋ ءبىزدىڭ قازىرگى بولمىسىمىزعا جات. بىراق، ەۆتانازيانى ادامنىڭ ءتول قۇقىعىنا بالايتىن ەلدەر سانى جىل سايىن كوبەيىپ كەلەدى.

“The Qazaq Times”