Evtanaziya. Foto: Informburo.kz.

Ündistannıñ Joğarı sotı jaña şeşimin jariya etip, ayıqpas dertke şaldığıp janı qinalğan adamnıñ öz erkimen öluine rwqsat etti. Ündistannıñ joğarı sotı atalğan «öz erkimen öludi zañdastıru» turalı şeşimde: «Adamdar öz erkimen öluge qwqılı», – delingen. Bwl turalı BBC habarladı.

Ayıqpas dertten azap şegip, janı qinalğan adamnıñ öz erkimen ölimdi tañdauın Evtanaziya dep ataladı. YAğni, evtanaziya – auru azabına tözbegen adamnıñ öz ömirin saqtap twrğan aspaptı toqtatu nemese basqa äreket, älde bir qwraldıñ kömegimen ölimge baruı. Bwl tek ayıqpas äri aurudıñ jan tözgisiz azabına wşırağan adamdarğa ğana qoldanıladı.

Evtanaziya. Foto: Otkrıtaya Aziya.

Ündistan evtanaziyanı zañdastırğan älemdegi birden bir el emes. Evtanaziya eñ aldımen Niderlandıda zañdastırılğan. Sonıñ özinde bwl atalğan eldiñ parlamentinde wzaq uaqıt talqığa tüsken. Katolik jäne protestant şirkeuleriniñ qarsılığına qaramastan 2001 jılı Niderlandıda atalğan zañ qabıldanıp, bir jıldan keyin küşine engen. Bwl zañğa säykes, auır azaptan janı qinalğan adamnıñ öz erkimen ömirden uaz keşkeni turalı ötinişin, aldımen etika boyınşa komitet qarap şığıp, bwl proceduranı atqarıp twrğan därigerge rwqsat etedi. Auru azabınan qinalğan adamdardıñ ötinişin orındauğa kömektesetin arnayı evtanaziya qızmeti bar. Degenmen, bwl zañ sol elde jasap jatqan şeteldikterdi qamtımağan.

Al, europalıqtar arasında evtanaziya üşin Şveycariyağa baratındar sanı jıldan jılğa artıp kele jatqanı mälim bolğan. Biraq, bwl adamdar arasında ömirden tüñilgen nemese depressiyağa şaldıqqandar da kezdesedi. Biraq, olardıñ ölimdi tañdauına därigerler men arnayı qızmetkerler jol bermeydi. Kerisinşe olardıñ sauığıp ketuine kömektesedi. Al, evtanaziyanıñ tizimine kiru üşin qat-qabat testter men sınaqtardan ötip, därigerler men psihologtardıñ sınınan sürinbey ötip, ölimdi şındap qalağanın däleldey alğandar ğana alınadı.  Evtanaziyanıñ eñ soñğı basqışı jandı alatın därini beruden bwrın därigerler «Bwl däri sizdiñ janıñızdı aladı» degen soñğı eskertudi jasaydı. Osığan deyin ömirin şındap qiğan adamnıñ zañdı qwqığın orındaydı.

Bel'giyada da osınday zañ qabıldanğan. Bwl elderdiñ arasına endi Ündistan qosıldı. Bwl kezinde älemge tanımal bolğan ündi fil'mderiniñ biri «Guzaarish»-tı eske tüsiredi. Onda ataq pen dañqtı, baylıq pen marapattı belşesinen keşken cirk şeberiniñ tağdırı äñgimelenedi. Bir ret jazatayım oqiğadan ömir boyı sal bolıp qalğan jigit wzaq uaqıt qaysarlıqpen ömirin jalğastıradı. Oğan bir aqıldı kömekşi äyel qarasadı. Qanşama ortalarda ömirdi süyuge, qaysarlıqpen ömirdi jalğastıruğa adamdardı jigerlendirip, lekciya söylegen jigit soñında öz auruınıñ azabına jäne mahabbattıñ janğa batqan qwsalığına şıdamay, Ündistan sotınan evtanaziyağa rwqsat etuin swraydı. Onıñ sotı sol kezdegi Ündistandı dür silkindiredi. Külli dän men mizamdar, adamzattıñ qoldan jasağan qanşama josın-joralğısı jabılıp jigitti sotta jeñedi. Biraq, jigit .... bwl fil'mge Ündistandağı bay tarihınıñ filosofiyası ğana emes, twtas adamzat qoğamnıñ tartısı kiristirilgen.

Ündi fil'mi "Guzariş" Foto: New On Netflix USA.

Ärine, bir qarağanda miğa kirmeytin bwl bir zañ, qanşama jıl Ündistan sotınıñ basın qatırıp keldi. Ölgen adam qaytıp kele almaytın bolğasın da ölim adamzattıñ eñ ülken aqiqatı. Bwl aqiqatqa özin itermeleu bizdiñ qazirgi bolmısımızğa jat. Biraq, evtanaziyanı adamnıñ töl qwqığına balaytın elder sanı jıl sayın köbeyip keledi.

“The Qazaq Times”