وڭتۇستىك كورەيانىڭ ۇشاعىن جارىپ جىبەرگەن سولتۇستىك كورەيا تىڭشىسى ءالى ءتىرى ءجۇر

1988 جىلعى وليمپيادا ويىندارى كەزىندە سولتۇستىك كورەيانىڭ تىڭشىسى وڭتۇستىك كورەيانىڭ ۇشاعىن جارىپ جىبەرگەن ەدى. وڭتۇستىك كورەيانىڭ قاۋىپسىزدىك كۇشتەرى تىڭشىنى تۇتقىنداعان جانە ءولىم جازاسىن بەرگەن. تەرگەۋ كەزىندە ايەل تىڭشى كيم جوۋ ءيردىڭ بۇيرىعىمەن بۇل قادامعا بارعانىن، وعان جۇكتەلگەن مىندەت 1988 جىلعى سەۋل وليمپياداسىنا توسقاۋىل قويۋ ەكەنىن ايتقان. قاستاندىقتان 115 وڭتۇستىك كورەيالىق قازا تاپتى.

1988 جىلعى سەۋل وليمپياداسى قارساڭىندا جارىلعان ۇشاق قالدىقتارى. فوتو; Qatar Day.

سولتۇستىك كورەيا جىبەرگەن ارنايى قىزمەتكەردىڭ اتى كيم حيون حۋ. تۇتقىنداۋ كەزىندە كيم حيون حۋ مەن تاعى ءبىر سولتۇستىك كورەيالىق ارنايى قىزمەتكەر بولعان. ەكەۋى دە قولعا تۇسەر الدىندا وزدەرىمەن الىپ جۇرەتىن ۋلى سۇيىقتىقتى جۇتقان. بىراق كيم حيون حۋ امان قالعان. كەيىن وڭتۇستىك كورەيا پرەزيدەنتى كيم حيون حۋدى سولتۇستىك كورەيا ۇشقارى يدەولوگياسىنىڭ قۇربانى رەتىندە،  ولىم جازاسىنا كەشىرىم بەرگەن.

كەشىرىم العان قىلمىسكەر. فوتو: BBC.

ول BBC تىلشىسىنە بەرگەن سۇحباتىندا: «سول كەزدە ماعان وڭتۇستىك-سولتۇستىك كورەيانىڭ بىرىگۋىنە نەگىزگى ءرول وينايسىڭ دەدى. مەن بۇنى قاتتى ماقتانىش ەتتىم. بىراق مەنى ادام ولتىرۋگە جۇمساپ جاتقانىن ءتۇسىندىم. مەنىڭ ارەكەتىمنەن جازىقسىز ادامدار ولمەك»، – دەگەن. ول جاقىندا بولعان سولتۇستىك كورەيا ليدەرلەرىنىڭ شەكارادان ءوتىپ، وڭتۇستىك كورەيادا وتەتىن قىسقى وليمپيادا ويىندارى جونىندە كەلىسسوزدەر وتكىزگەنىن كوردى. بىراق، كيم حيون حۋ بۇل ارەكەتتەردى جاساندىلىق دەپ قارايدى.

سولتۇستىك كورەيانىڭ بۇرىنعى تىڭشىسى كيم حيون حۋ. فوتو: BBC.

ول بۇل تۋرالى ايتقان پىكىرىندە: «ارينە بۇل ءبىر پوپۋليستىك قادام ەكەنى راس. دەگەنمەن، سولتۇستىك كورەيا يادرولىق قارۋدى دامىتۋدى كوزدەيدى، ولار كەلىسسوز ارقىلى وزگەرۋى مۇمكىن ەمەس، مەنىڭشە سولتۇستىك كورەيا تەك قىسىم مەن كۇش ارقىلى عانا وزگەرەدى»، – دەگەن.

قازىرگى كەزدە كيم حيون حۋ كۇيەۋىمەن ەل كوزىنەن جاسىرىن ءومىر ءسۇرىپ كەلەدى. ونىڭ كۇيەۋى دە وڭتۇستىك كورەيانىڭ ارنايى قىزمەتكەرى. ول ءتىپتى ءوزى ولتىرگەن جازىقسىز جانداردىڭ تۋىس-تۋعاندارىمەن دە كەزدەسكەن. ول سوزىندە: «جارىلىستى ۇيىمداستىرۋشى رەتىندە مەن كۇنامدى ءومىر بويى ءوز موينىما الىپ، ءومىر بويى سول كۇنامدى جۋىپ وتەمىن»،  – دەيدى.

“The Qazaq Times”