ەردوعان: ماقساتىمىز ءسۇريانىڭ جەرىن باسىپ الۋ ەمەس، بوسقىنداردىڭ ەلىنە قايتۋىنا كومەكتەسۋ

جاقىندا تۇركيا قارۋلى كۇشتەرى ءسۇريانىڭ افرين ايماعىنا كىرىپ، «ءزايتۇن بۇتاعى» دەپ اتالاتىن اسكەري وپەراتسياسىن باستادى. كەشە تۇركيا پرەزيدەنتى رەجەپ تايىپ ەردوعان مالىمدەمەسىندە، «ءزايتۇن بۇتاعى» وپەراتسياسىنىڭ باستى ماقساتى ءسۇريانىڭ جەرىن باسىپ الۋ ەمەس، كەرىسىنشە سۇريالىق بوسقىنداردى ەلىنە قايتارۋعا كومەكتەسۋ ەكەنىن ايتتى. بۇل تۋرالى «شينلاڭ» اقپاراتتىق سايتى تۇرىك باسىلىمدارىنا سىلتەمە بەرە وتىرىپ حابارلادى.

تۇركيانىڭ «انادولى» اقپارات اگەنتتىگى ارقىلى تاراتىلعان مالىمدەمەدە، تۇركيا باسشىسى: «ءبىزدىڭ ماقساتىمىز ءسۇريانىڭ جەرىن باسىپ الۋ ەمەس، قايتا تۇركياعا باس ساۋعالاي كەلگەن 3,5 ملن ءسۇريا بوسقىندارىنىڭ وتانىنا قايتۋىنا كومەكتەسۋ»، – دەگەن. ول جانە جەرگىلىكتى تۇرعىندار ايماقتا تۇراقتىلىقتى قامتاماسىز ەتكەنى ءۇشىن تۇرىك ارمياسىنا راحمەت ايتقانىن ءبىلدىردى. ونىڭ ايتۋىنشا، تۇركيا ارمياسى ءسۇريا ازاماتتارىنىڭ مۇددەسىن قورعاۋ باعىتىندا افريندەگى تەررورلىق توپتاردىڭ كوزىن جويۋ ءۇشىن ارەكەت جاساۋدا.

ءسۇريانىڭ سولتۇستىگىندە كۇردتەر كوبىرەك قونىستانعان. ولاردىڭ «حالىقتىڭ ءوزىن ءوزى قورعاۋ قوسىنى» (YPG) دەپ اتالاتىن قارۋلى توبى ايماقتاعى سالماقتى كۇشتەردىڭ ءبىرى. انكارا بيلىگى وتكەن عاسىردىڭ 80 جىلدارىنان بەرى تۇركيادان اۆتونوميالىق دەربەستىك الۋدى سۇراپ كەلە جاتقان كۇرد جۇمىسشىلار پارتياسىمەن اتالعان قارۋلى توپتىڭ ىمىرالاستىعى بار دەپ سانايدى. بۇل توپتاردىڭ كۇشەيىپ، ەل ىشىندەگى قايشىلىقتار مەن قارسى توپتارمەن بىرىگىپ تۇركيانىڭ ۇلتتىق قاۋىپسىزدىگىنە قاتەر توندىرۋدەن الاڭداپ، اتالعان اسكەري قادامداردى جاسادى.

ونىڭ ۇستىنە ءسۇريادان باس ساۋعالاپ بارعان 3,5 ملن بوسقىن، بۇگىندە تۇركيانىڭ باس قاتىراتىن ماڭىزدى پروبلەمالارىنىڭ ءبىرى بولىپ وتىر. بوسقىنداردى ەلىنە قايتارۋ جانە ۇلتتىق قاۋىپسىزدىك پەن تەرريتوريا تۇتاستىعىن بەكەمدەۋ ءۇشىن تۇركيا بيلىگىنە بۇل اسكەري قادامنىڭ تابىستى بولۋى وتە ماڭىزدى. دەگەنمەن، سۇرياعا قارۋلى قوسىنمەن باسىپ كىرۋىن ايىپتاعان ەلدەر مەن حالىقارالىق ۇيىمدار دا كوپ.

“The Qazaq Times”