وڭتۇستىك كورەيا ءوز ارمياسىنىڭ قولباسشىلىق قۇقىعىن اقش-تان قايتارىپ الماق

اقش ۇكىمەتىنىڭ رەسمي وكىلدەرىنىڭ مالىمەتىنە قارعاندا، وڭتۇستىك كورەيا اقش يەلىگىندەگى كورەيا ارمياسىنىڭ سوعىس كەزىندەگى باسقارۋ قۇقىعىن قايتارىپ بەرۋىن تالاپ ەتۋدە. بۇنىڭ سەبەبىن سەۋل تارابى كورەي تۇبەگىندەگى سوعىس جاعدايىنا الدىن الا دايىندالۋ دەپ تۇسىندىرگەن. الايدا، قۇراما شتات وڭتۇستىك كورەيا ارمياسىنىڭ سوعىسقا ءالى دايىن ەمەس ەكەنىنەن الاڭدايدى. بۇل تۋرالى «WSJ» باسىلىمىنىڭ رەسمي سايتى حابارلادى.

سولتۇستىك كورەيانىڭ ارتىپ كەلە جاتقان قاتەرىنە بايلانىستى، كورەيا ارمياسىنىڭ «سوعىس ۋاقىتىندا جاۋىنگەرلىك قولباسشىلىق» ماسەلەسى اقش پەن وڭتۇستىك كورەيا اراسىندا شيەلەنىستى تۋدىردى.

اقش قورعانىس ءمينيسترى جيم مەتتيس بۇگىن وڭتۇستىك كورەياعا ساپارلاي بارادى. كەزدەسۋ كەزىندە تالقىلاناتىن باستى تاقىرىپتىڭ ءبىرى دە وسى ماسەلە بولعالى تۇر. ەكى ەلدىڭ وكىلدەرى بەرگەن مالىمەتتە مەتتيستىڭ وڭتۇستىك كورەيا مەن سولتۇستىك كورەيا شەكاراسىنا باراتىنى ايتىلعان.

وڭتۇستىك كورەيا قالىپتى ۋاقىتتا وز ارمياسىن باسقارا الادى. بىراق 1950 جىلدارداعى سوعىستان باستاپ كۇشىنە ەنگەن كەلىسىمگە سايكەس، كورەي تۇبەگىندەگى اۋقىمدى قاقتىعىستان بولعان جاعدايدا كورەياداعى امەريكالىق اسكەرلەر مەن كورەيالىق اسكەريلەرگە قولباسشىلىق ەتۋ قۇقىعى اقش-تا بولادى. قازىرگى كەزدە وڭتۇستىك كورەيا جەرىندە اقش-تىڭ 28 مىڭ 500 قارۋلى اسكەرى بار.

وڭتۇستىك كورەيا ۇكىمەتى سوعىس كەزىندەگى ارمياعا قولباسشىلىق ەتۋ قۇقىعىن وزدەرى قايتارىپ الاتىن-المايتىنىن، جيم مەتتيس ساپارىنان كەيىن بەلگىلى بولادى دەپ وتىر.

“The Qazaq Times”