پۋتين مەن ەردوعان انكارادا كەڭەس وتكىزدى

رەسەي پرەزيدەنتى ۆلاديمير پۋتين كەشە رەسمي ساپارمەن انكاراعا بارىپ، تۇركيا پرەزيدەنتى رەجەپ تايىپ ەردوعاننىڭ قابىلداۋىندا بولدى. ەكى ەل باسشىلارىنىڭ بۇل كەزدەسۋى تۋرالى وسىدان ەكى اپتا بۇرىن بەلگىلى بولعان ەدى. كەزەكتى كەزدەسۋ بارىسىندا ەكى ەل اراسىنداعى ماڭىزدى تاقىرىپتار تالقىلاندى، دەپ حابارلادى «تۇرىك تەلە-راديو» قىزمەتىنىڭ رەسمي سايتى.

پۋتيننىڭ تۇركياعا ساپارى بارىسىنداعى ەڭ باستى تاقىرىپ، رەسەي، تۇركيا جانە يران اراسىندا ءسۇريا ماسەلەسىن تالقىلاۋ. ءۇش ەل بىرلەسە وتىرىپ، ءسۇريانىڭ قاقتىعىسسىز ايماقتارىنداعى جاعدايلاردى رەتكە سالۋدى قولعا الاتىنى بەلگىلى بولدى. مۇنداعى ماڭىزدى ماسەلەنىڭ ءبىرى الەپپودان قاشقان ازاماتتاردىڭ كوبىرەك جينالعان يدليب جاعدايى بولىپ وتىر.

كەزدەسۋ كۇن تارتىبىندە يراك كۇردتەرىنىڭ رەفەرەندۋم ءىسى دە ءسوز ەتىلدى. كۇردىستان اۆتونومياسىنىڭ تاۋەلسىزدىگىنە رەسەي دە قارسىلىق ءبىلدىردى. ەردوعان مەن پۋتين ءبىر اۋىزدان كۇردىستاننىڭ تاۋەلسىزدىككە جەتۋى وڭىردەگى «يسلام مەملەكەتى» ۇيىمىنان كەيىنگى ەكىنشى سوعىس تۋدىرۋشى بولادى دەپ قارادى.

تۇرىك ەلىنىڭ اقپاراتتىق قۇرالدارى حابارلاۋىنشا، پۋتين پەن ەردوعاننىڭ كەزدەسۋىندە بۇل ايتىلعانداردان وزگە، S-400 قورعانىس جۇيەسىن ساتۋ-ساتىپ الۋ ءىسى جانە رەسەي گازىن تۇركيا ارقىلى ەۋروپا ەلدەرىنە وتكىزۋ ماسەلەلەرى، سونداي-اق اككۋيۋ اتوم ەلەكتر ستانتسياسى قۇرلىسى قاتارلى ىستەر دە وتىرىستىڭ وزەكتى تاقىرىبىندا بولعان.

“The Qazaq Times”