فوتو: اشىق دەرەككوزدەن الىندى

ۋكراينا وتىنىشىمەن جانە ەڭ مىقتى حالىقارالىق زاڭگەرلەردىڭ قاتىسۋىمەن گااگادا ءپۋتيندى جانە رەسەيدىڭ ساياسي جەتەكشىلەرىنىڭ ءبارىن سوتتايتىن ارنايى تريبۋنال قۇرىلادى. بۇل تۋرالى ورتالىق ازيا جاڭالىقتار قىزمەتى جازدى.

ساياساتكەرلەردى ۋكرايناعا قارسى قىلمىستارى ءۇشىن سوتتايدى. تريبۋنال قۇرۋ ءىسىن ون ءبىر ەل جاقتادى. سوت شامامەن ءبىر جىلدان سوڭ جۇمىس ىستەي باستايدى.

ارنايى تريبۋنال قۇرۋ جونىندەگى ۋكراين جۇمىس توبىنىڭ مۇشەسى ولەگ گاۆريشتىڭ ايتۋىنشا، تريبۋنال قۇرۋ جونىندەگى حالىقارالىق كەلىسىم دايىن بولىپ قالدى، وعان قوسىلعىسى كەلەتىن بىرنەشە ەل بار.

"حالىقارالىق قۇقىقتا وزگە ەلگە وكتەمدىك كورسەتۋ قىلمىستاردىڭ ەڭ ىرىسىنە جاتادى. وسىنىڭ ءوزى وكتەمدىك جاساۋعا قاتىسقانداردى سوتتاۋعا جەتكىلىكتى. ولار ۋكرايناداعى ارنايى اسكەري وپەراتسيا دەپ اتايدى، ءبىز اۋقىمدى باسقىنشىلىق دەپ قاراستىرامىز، ويتكەنى سوعىس 2014 جىلى باستالدى، ال اقپاندا باسىپ كىردى. بۇنىڭ ءبارىن رەسەيدىڭ قاۋىپسىزدىك كەڭەسى ماقۇلدادى. ونىڭ قۇرامىنا پۋتين، شويگۋ، لاۆروۆ، پاترۋشەۆ، بورتنيكوۆ، مەدۆەدەۆ جانە باسقالارى كىرەدى. بۇلار وسىنداي قىلمىس ءۇشىن جازالانۋى مۇمكىن العاشقى ۇمىتكەرلەر", - دەيدى گاۆريش.

ولاردىڭ كىناسى دالەلدەنسە، ارقايسى 30 جىلدان باستاپ ومىرلىك تۇرمە جازاسىن الادى. ارنايى تريبۋنالدى قۇرۋدى بالتىق ەلدەرىنىڭ ءبارى، پولشا، ۇلىبريتانيا، چەحيا، سلوۆاكيا، رۋمىنيا قولداپ وتىر.

"بۇل جەردە رەسەيدىڭ پىكىرى ماڭىزدى بولماي قالادى. تريبۋنال قۇرىلسا، كەلىسىمگە قوسىلعان مەملەكەتتەر رەسەيدىڭ قاتىسۋىنسىز-اق ولاردىڭ جەتەكشىلەرىن سوتتاي الادى. رەسەي جەتەكشىلەرى وسى ەلدەرگە بارسا، وندا كەلىسىمگە قوسىلعان ەلدەر ولاردى ۇستاپ، سوتتاي باستايدى", - دەيدى گاۆريش.