Qazaqstanda 27 jeltoqsan koronavirus jwqqan 736 adam, 26 jeltoqsan koronavirus pnevmoniyasına şaldıqqan 27 adam anıqtalğan. Densaulıq saqtau ministrligi statsitikadağı bastı qatesin moyındap tüzetti. Qazir elde 22 mıñnan astam adam (U07.1 nemese KVI+ boyınşa 10 358, U07.2 nemese KVI- boyınşa 12 122) auırıp jatır. 

#U07.1 Koronavirus PTR testi arqılı tabılğan jaña keysterdiñ eñ köbi – Atırau (133), Almatı qalası (83), Pavlodar (65), Qostanay (62), SQO, Almatı oblısı jäne astanadan (ärqaysı 57-den). Ötken täulikte 821 adam auruınan ayğıp şığıp üyine jiberilgen, sonday-aq 10 adam ömirden ötken.

#U07.2  Aldıñğı küni, yağni jeltoqsannıñ 26-sı koronavirus pnevmoniyasına jatatın 27 nauqas tirkelgen. Oğan qosa, senbi küni 54 adam emdelip şıqqan.

#Jalpı  DenMin-niñ resmi mälimetinşe, emdelip jatqan 22 480 nauqastıñ 5058-i auruhanada, 17 422-si ambulatorlıq baqılauda. Ministrlik resmi habarlamanı jañarttı. Onda auırıp jatqan balalar turalı aqparat alınıp tastalğan. Jäne koronavirus pnevmoniyasınıñ merzimine baylanıstı aylap qoldanılğan qatelik tüzetilmegen.

Ahualı naşar 245 nauqastıñ arasında 48 adamnıñ jağdayı qattı qiındağan. Jäne 42 sırqat ökpeni jasandı jeldetu apparatımen tınıstap jatır.

Qazaqstanda koronavirus pnevmoniyası («KVI-» – QT) bir künge keşigip jariyalanğanına qaramastan, «ötken täuliktegi» derek dep berilip kelgen. Mısalı, bes aydan beri, düysenbi küni tañda koronavirus siyaqtı jeksenbiniñ emes, senbi künge tiesili mälimet berilip otırdı. Biraq ministrliktiñ salğırttığı sebepti  «aldıñğı» dep berudiñ ornına resmi aqparattarda «ötken täulikte» dep jazıladı. Osığan deyin eldegi koronavirus jağdayı turalı resmi aqparat közi bolıp sanalatın coronavirus2020.kz saytı men Densaulıq saqtau ministrliginiñ aqparat resurstarında jariyalanğan derekter birneşe aydan beri qate berilip kelgeni jaylı materialdar jariyalap, aqparat qwraldarına eskertkenbiz. Ötken aptada ministrliktiñ baspasöz qızmeti redakciya eskertpesi boyınşa statistikadağı qate tüzetilip, jaña formada beriletinin habarlağan.

Pandemiya moderatorı – ministrlik tek senbi-jeksenbide ğana emes, mereke künderi de statistikanı tolıqtay jürgizuge qauqarsız. Mäselen, jeltoqsan ayınıñ 1, 16, 17, 18-i jän 19-ına tiesili derekter eselep kemigen. Küzdiñ ortasında sol kezdegi DenMin-niñ resmi-erikti ökili Bağdat Qojahmetov ekinşi tolqında demalıs künine qaramastan statistikanı tolıq kölemde jürgizuge uäde bergen edi. Biraq is jüzinde olay bolmay şıqtı. 

Düysenbi ministrlik resurstarında redakciya bayqağan qateniñ ornı tolıqtırılıp, koronavirus pnevmoniyası (KVI-) keysteriniñ tirkelgen naqtı datası qosımşa belgimen jariyalandı.

28 jeltoqsan jariyalanğan mälimet. Foto: QR DSM

Degenmen aqparat ministrligi eş özgerissiz «ötken täulik» esebinde berdi. Eki resursta da özgeriske baylanıstı tüsinikteme berilmegen.

Aqparattıñ aq-qarasın ajıratuğa asıqpaytın aqparat ministrliginiñ resursı. Foto: www.coronavirus2020.kz

Osı jöninde bügin Ortalıq Kommunikaciyalar qızmetinde ötken brifingte densaulıq saqtau ministrliginiñ ökilderi statistikanıñ kemşiligi tüzetilgenin rastadı.

«Bwrın biz aurular turalı aqparattı ay sayın jinauşı edik. Tamız ayınan bastap statistikağa közqarasımızdı özgerttik. Sol kezden bastap statistika twraqtılığı üşin esep kündelikti formatqa köşirildi. Koronavirus pnevmoniyası ekinşi täulikte jinaqtap, erteñine barlıq resurstarğa jariyalaymız. YAğni bügin, 28-i jarıq körgen aqparat 26 jeltoqsanğa tiesili», – dedi vice-ministr Marat Şoranov.

The Qazaq Times redakciyası tömendegi kesteni eñ şınayı nwsqa dep sanaydı.

9 jeltoqsan densaulıq saqtau vice-ministri, bas memlekettik sanitar-därigeri Erlan Qiyasov Qazaqstanda koronavirus infekciyasın jwqtırudıñ şarıqtau kezeñi turalı jaña boljamın bölisken. Onıñ aytuınşa, ekinşi tolqınnıñ şarıqtau kezeñi 2021 jıldıñ qañtar jäne aqpan aylarına säykes keledi.

13 naurızdan beri COVID-19 infekciyasın jwqtırğandar qatarı 152 mıñnan, 1 tamızdan bergi koronavirus pnevmoniyası 45 mıñnan asqan. DDSW mälimetinşe, Qazaqstanda auırğandardıñ sanı 196 mıñnan assa, al Wlttıq statistikada 198 mıñğa juıqtağan. Degenmen Ükimet koronavirus pen onıñ pnevmoniyasın eki bölek esepteydi. Halıqaralıq wyım tuıstas derttiñ qaupi birdey ekenine basa nazar audarsa da Qazaqstannıñ Densaulıq saqtau ministrligi koronavirus pen onıñ pnevmoniyalıq türine eki türli közqaraspen qaraydı. Onıñ anıq däleli – KVI+ diagnozı boyınşa jaña anıqtalğan nauqastar men qaytqandar, ayığıp şıqqandardıñ aymaqtardağı körsetkişi kündelikti jariyalanadı, al KVI- deregi tek jiıntıq mände beriledi. Koronavirus pnevmoniyasınıñ aymaqtarğa taraluı jönindegi esep ministr o basta aytqanday kündelikti ne aptasına emes, on künde bir ret, onıñ özinde vedomstvo saytına fayl formatında jüktelip keledi.

Pandemiya bastalğalı jalpı virus jwqqandardıñ 3565-i (KVI+ / U07.1 – 2259, KVI- / U07.2 – 490, ilespe aurulardan – 816) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 764 adamdı jalpı statistikağa qosıp eseptemeydi. Sarapşılar bwğan qarsı. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Äzirge virus taralu qateri jağınan Atırau oblısı – qızıl aymaqta, astana men Almatı qalası, SQO, Aqmola, Qostanay, Pavlodar öñirleri – sarı aymaqta twr. Respublika sarı aumaqqa engen.

Qoğamda biılğı 256 mıñ pnevmoniya jağdayın esepke qospay, jalpı statistikanı «mausım-şilde qırğınan» keyin jürgize bastağan Ükimettiñ esebine kümänmen qaraytındar köbeygen.

Qazaqstan virus taraluı boyınşa älemde Worldometers derekqorı jäne DDSW tiziminde 49-şı orında twr.

"The Qazaq Times"