قازاقستاندا 27 جەلتوقسان كوروناۆيرۋس جۇققان 736 ادام، 26 جەلتوقسان كوروناۆيرۋس پنەۆمونياسىنا شالدىققان 27 ادام انىقتالعان. دەنساۋلىق ساقتاۋ مينيسترلىگى ستاتسيتيكاداعى باستى قاتەسىن مويىنداپ تۇزەتتى. قازىر ەلدە 22 مىڭنان استام ادام (U07.1 نەمەسە كۆي+ بويىنشا 10 358, U07.2 نەمەسە كۆي- بويىنشا 12 122) اۋىرىپ جاتىر. 

#U07.1 كوروناۆيرۋس پتر تەستى ارقىلى تابىلعان جاڭا كەيستەردىڭ ەڭ كوبى – اتىراۋ (133), الماتى قالاسى (83), پاۆلودار (65), قوستاناي (62), سقو، الماتى وبلىسى جانە استانادان (ارقايسى 57-دەن). وتكەن تاۋلىكتە 821 ادام اۋرۋىنان ايعىپ شىعىپ ۇيىنە جىبەرىلگەن، سونداي-اق 10 ادام ومىردەن وتكەن.

#U07.2  الدىڭعى كۇنى، ياعني جەلتوقساننىڭ 26-سى كوروناۆيرۋس پنەۆمونياسىنا جاتاتىن 27 ناۋقاس تىركەلگەن. وعان قوسا، سەنبى كۇنى 54 ادام ەمدەلىپ شىققان.

#جالپى  دەنمين-ءنىڭ رەسمي مالىمەتىنشە, ەمدەلىپ جاتقان 22 480 ناۋقاستىڭ 5058-ءى اۋرۋحانادا، 17 422-ءسى امبۋلاتورلىق باقىلاۋدا. مينيسترلىك رەسمي حابارلامانى جاڭارتتى. وندا اۋىرىپ جاتقان بالالار تۋرالى اقپارات الىنىپ تاستالعان. جانە كوروناۆيرۋس پنەۆمونياسىنىڭ مەرزىمىنە بايلانىستى ايلاپ قولدانىلعان قاتەلىك تۇزەتىلمەگەن.

احۋالى ناشار 245 ناۋقاستىڭ اراسىندا 48 ادامنىڭ جاعدايى قاتتى قيىنداعان. جانە 42 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

قازاقستاندا كوروناۆيرۋس پنەۆمونياسى («كۆي-» – QT) ءبىر كۇنگە كەشىگىپ جاريالانعانىنا قاراماستان، «وتكەن تاۋلىكتەگى» دەرەك دەپ بەرىلىپ كەلگەن. مىسالى، بەس ايدان بەرى، دۇيسەنبى كۇنى تاڭدا كوروناۆيرۋس سياقتى جەكسەنبىنىڭ ەمەس، سەنبى كۇنگە تيەسىلى مالىمەت بەرىلىپ وتىردى. بىراق مينيسترلىكتىڭ سالعىرتتىعى سەبەپتى  «الدىڭعى» دەپ بەرۋدىڭ ورنىنا رەسمي اقپاراتتاردا «وتكەن تاۋلىكتە» دەپ جازىلادى. وسىعان دەيىن ەلدەگى كوروناۆيرۋس جاعدايى تۋرالى رەسمي اقپارات كوزى بولىپ سانالاتىن coronavirus2020.kz سايتى مەن دەنساۋلىق ساقتاۋ مينيسترلىگىنىڭ اقپارات رەسۋرستارىندا جاريالانعان دەرەكتەر بىرنەشە ايدان بەرى قاتە بەرىلىپ كەلگەنى جايلى ماتەريالدار جاريالاپ، اقپارات قۇرالدارىنا ەسكەرتكەنبىز. وتكەن اپتادا مينيسترلىكتىڭ ءباسپاسوز قىزمەتى رەداكتسيا ەسكەرتپەسى بويىنشا ستاتيستيكاداعى قاتە تۇزەتىلىپ، جاڭا فورمادا بەرىلەتىنىن حابارلاعان.

پاندەميا مودەراتورى – مينيسترلىك تەك سەنبى-جەكسەنبىدە عانا ەمەس، مەرەكە كۇندەرى دە ستاتيستيكانى تولىقتاي جۇرگىزۋگە قاۋقارسىز. ماسەلەن، جەلتوقسان ايىنىڭ 1, 16, 17, 18-ءى ءجان 19-ىنا تيەسىلى دەرەكتەر ەسەلەپ كەمىگەن. كۇزدىڭ ورتاسىندا سول كەزدەگى دەنمين-ءنىڭ رەسمي-ەرىكتى وكىلى باعدات قوجاحمەتوۆ ەكىنشى تولقىندا دەمالىس كۇنىنە قاراماستان ستاتيستيكانى تولىق كولەمدە جۇرگىزۋگە ۋادە بەرگەن ەدى. بىراق ءىس جۇزىندە ولاي بولماي شىقتى. 

دۇيسەنبى مينيسترلىك رەسۋرستارىندا رەداكتسيا بايقاعان قاتەنىڭ ورنى تولىقتىرىلىپ، كوروناۆيرۋس پنەۆمونياسى (كۆي-) كەيستەرىنىڭ تىركەلگەن ناقتى داتاسى قوسىمشا بەلگىمەن جاريالاندى.

28 جەلتوقسان جاريالانعان مالىمەت. فوتو: قر دسم

دەگەنمەن اقپارات مينيسترلىگى ەش وزگەرىسسىز «وتكەن تاۋلىك» ەسەبىندە بەردى. ەكى رەسۋرستا دا وزگەرىسكە بايلانىستى تۇسىنىكتەمە بەرىلمەگەن.

اقپاراتتىڭ اق-قاراسىن اجىراتۋعا اسىقپايتىن اقپارات مينيسترلىگىنىڭ رەسۋرسى. فوتو: www.coronavirus2020.kz

وسى جونىندە بۇگىن ورتالىق كوممۋنيكاتسيالار قىزمەتىندە وتكەن بريفينگتە دەنساۋلىق ساقتاۋ مينيسترلىگىنىڭ وكىلدەرى ستاتيستيكانىڭ كەمشىلىگى تۇزەتىلگەنىن راستادى.

«بۇرىن ءبىز اۋرۋلار تۋرالى اقپاراتتى اي سايىن جيناۋشى ەدىك. تامىز ايىنان باستاپ ستاتيستيكاعا كوزقاراسىمىزدى وزگەرتتىك. سول كەزدەن باستاپ ستاتيستيكا تۇراقتىلىعى ءۇشىن ەسەپ كۇندەلىكتى فورماتقا كوشىرىلدى. كوروناۆيرۋس پنەۆمونياسى ەكىنشى تاۋلىكتە جيناقتاپ، ەرتەڭىنە بارلىق رەسۋرستارعا جاريالايمىز. ياعني بۇگىن، 28-ءى جارىق كورگەن اقپارات 26 جەلتوقسانعا تيەسىلى»، – دەدى ۆيتسە-مينيستر مارات شورانوۆ.

The Qazaq Times رەداكتسياسى تومەندەگى كەستەنى ەڭ شىنايى نۇسقا دەپ سانايدى.

9 جەلتوقسان دەنساۋلىق ساقتاۋ ۆيتسە-ءمينيسترى، باس مەملەكەتتىك سانيتار-دارىگەرى ەرلان قياسوۆ قازاقستاندا كوروناۆيرۋس ينفەكتسياسىن جۇقتىرۋدىڭ شارىقتاۋ كەزەڭى تۋرالى جاڭا بولجامىن بولىسكەن. ونىڭ ايتۋىنشا، ەكىنشى تولقىننىڭ شارىقتاۋ كەزەڭى 2021 جىلدىڭ قاڭتار جانە اقپان ايلارىنا سايكەس كەلەدى.

13 ناۋرىزدان بەرى COVID-19 ينفەكتسياسىن جۇقتىرعاندار قاتارى 152 مىڭنان، 1 تامىزدان بەرگى كوروناۆيرۋس پنەۆمونياسى 45 مىڭنان اسقان. ددسۇ مالىمەتىنشە، قازاقستاندا اۋىرعانداردىڭ سانى 196 مىڭنان اسسا، ال ۇلتتىق ستاتيستيكادا 198 مىڭعا جۋىقتاعان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. حالىقارالىق ۇيىم تۋىستاس دەرتتىڭ قاۋپى بىردەي ەكەنىنە باسا نازار اۋدارسا دا قازاقستاننىڭ دەنساۋلىق ساقتاۋ مينيسترلىگى كوروناۆيرۋس پەن ونىڭ پنەۆمونيالىق تۇرىنە ەكى ءتۇرلى كوزقاراسپەن قارايدى. ونىڭ انىق دالەلى – كۆي+ دياگنوزى بويىنشا جاڭا انىقتالعان ناۋقاستار مەن قايتقاندار، ايىعىپ شىققانداردىڭ ايماقتارداعى كورسەتكىشى كۇندەلىكتى جاريالانادى، ال كۆي- دەرەگى تەك جيىنتىق ماندە بەرىلەدى. كوروناۆيرۋس پنەۆمونياسىنىڭ ايماقتارعا تارالۋى جونىندەگى ەسەپ مينيستر و باستا ايتقانداي كۇندەلىكتى نە اپتاسىنا ەمەس، ون كۇندە ءبىر رەت، ونىڭ وزىندە ۆەدومستۆو سايتىنا فايل فورماتىندا جۇكتەلىپ كەلەدى.

پاندەميا باستالعالى جالپى ۆيرۋس جۇققانداردىڭ 3565-ءى (كۆي+ / U07.1 – 2259, كۆي- / U07.2 – 490, ىلەسپە اۋرۋلاردان – 816) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 764 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

ازىرگە ۆيرۋس تارالۋ قاتەرى جاعىنان اتىراۋ وبلىسى – قىزىل ايماقتا، استانا مەن الماتى قالاسى، سقو، اقمولا، قوستاناي، پاۆلودار وڭىرلەرى – سارى ايماقتا تۇر. رەسپۋبليكا سارى اۋماققا ەنگەن.

قوعامدا بيىلعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى «ماۋسىم-شىلدە قىرعىنان» كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

قازاقستان ۆيرۋس تارالۋى بويىنشا الەمدە Worldometers دەرەكقورى جانە ددسۇ تىزىمىندە 49-شى ورىندا تۇر.

"The Qazaq Times"