Қазақстанда 24 желтоқсан коронавирус жұққан 736 адам, 23 желтоқсан коронавирус пневмониясына шалдыққан 154 адам анықталған. Қазір елде 23 мыңнан астам адам (U07.1 немесе КВИ+ бойынша 11 604, U07.2 немесе КВИ- бойынша 12 023) ауырып жатыр. 

#U07.1 Коронавирус ПТР тесті арқылы табылған жаңа кейстердің ең көбі – Алматы қаласы (95), Павлодар (93), Қостанай (65), Атырау (62), ШҚО, Алматы және СҚО (әрқайсы 61-ден), Ақмола (58) өңірлерінен. Өткен тәулікте 1302 адам ауруынан айғып шығып үйіне жіберілген, сондай-ақ 11 адам өмірден өткен.

#U07.2  Алдыңғы күні, яғни желтоқсанның 23-і коронавирус пневмониясына жататын 154 науқас және 3 өлім жағдайы тіркелген. Оған қоса, сәрсенбі күні 73 адам емделіп шыққан.

#Жалпы  ДенМин-нің ресми мәліметінше, емделіп жатқан 23 627 науқастың 4738-і ауруханада, 18 889-ы амбулаторлық бақылауда. Министрлік ресми хабарламаны жаңартты. Онда ауырып жатқан балалар туралы ақпарат алынып тасталған. Және коронавирус пневмониясының мерзіміне байланысты айлап қолданылған қателік түзетілмеген.

Ахуалы нашар 243 науқастың арасында 44 адамның жағдайы қатты қиындаған. Және 39  сырқат өкпені жасанды желдету аппаратымен тыныстап жатыр.

Қазақстанда коронавирус пневмониясы («КВИ-» – QT) бір күнге кешігіп жарияланғанына қарамастан, «өткен тәуліктегі» дерек деп беріледі. Мысалы, сәрсенбі күні таңда коронавирус сияқты сейсенбінің емес, дүйсенбі күнге тиесілі мәлімет беріледі. Бірақ неге екені белгісіз «алдыңғы» деп берудің орнына ресми ақпараттарда «өткен тәулікте» деп жазылады. Осыған дейін елдегі коронавирус жағдайы туралы ресми ақпарат көзі болып саналатын coronavirus2020.kz сайты мен Денсаулық сақтау министрлігінің ақпарат ресурстарында жарияланған деректер төрт айдан бері қате беріліп келгені жайлы ұстанымымызды бөлісіп, ақпарат құралдарына ескерткенбіз. Дегенмен әлі күнге дейін кейбір басылымдар екі күнге тиесілі деректі бір датаға теліп хабарлап келеді. Пандемия модераторы министрлік тек сенбі-жексенбіде ғана емес, мереке күндері де статистиканы толықтай жүргізуге қауқарсыз. Мәселен, желтоқсан айының 1, 16, 17, 18-і жән 19-ына тиесілі деректер еселеп кеміген. Күздің ортасында сол кездегі ДенМин-нің ресми-ерікті өкілі Бағдат Қожахметов екінші толқында демалыс күніне қарамастан статистиканы толық көлемде жүргізуге уәде берген еді. Бірақ іс жүзінде олай болмай шықты. Күніне жүзден оң нәтижелі коронавирус анықталып жатса да ведомство толық штатқа көшкісі жоқ.

Денсаулық сақтау министрлігінің баспасөз қызметінің хатшысы Әсел Артықшинова редакция тілшісіне 26 желтоқсаннан бастап коронавирус пневмониясының датасына қатысты қате беріліп келген формат түзетілген нұсқада жариялана бастайтынын хабарлады.

«Сіздердің редакция ескертпесі бойынша апта басында министрлік басшылығы ұсынымды мақұлдады. Енді ертеңнен бастап күнделікті хабарламаның жаңа үлгіде беріледі. Қазір мамандар толықтырып, дайындап жатыр. КВИ- диагнозына байланысты анықталған науқастардың санының қасына жақшаның ішінде дата нақты көрсетілетін болады. КВИ+ 25 желтоқсан делінсе, КВИ- 24 желтоқсанға тиесілі деп көрсетіледі», – деді ол.

The Qazaq Times редакциясы төмендегі кестені ең шынайы нұсқа деп санайды.

9 желтоқсан денсаулық сақтау вице-министрі, бас мемлекеттік санитар-дәрігері Ерлан Қиясов Қазақстанда коронавирус инфекциясын жұқтырудың шарықтау кезеңі туралы жаңа болжамын бөліскен. Оның айтуынша, екінші толқынның шарықтау кезеңі 2021 жылдың қаңтар және ақпан айларына сәйкес келеді.

13 наурыздан бері COVID-19 инфекциясын жұқтырғандар қатары 150 мыңға, 1 тамыздан бергі коронавирус пневмониясы 45 мыңға жеткен. ДДСҰ мәліметінше, Қазақстанда ауырғандардың саны 194,5 мыңнан, ал Ұлттық статистикада 195 мыңнан асқан. Дегенмен Үкімет коронавирус пен оның пневмониясын екі бөлек есептейді. Халықаралық ұйым туыстас дерттің қаупі бірдей екеніне баса назар аударса да Қазақстанның Денсаулық сақтау министрлігі коронавирус пен оның пневмониялық түріне екі түрлі көзқараспен қарайды. Оның анық дәлелі – КВИ+ диагнозы бойынша жаңа анықталған науқастар мен қайтқандар, айығып шыққандардың аймақтардағы көрсеткіші күнделікті жарияланады, ал КВИ- дерегі тек жиынтық мәнде беріледі. Коронавирус пневмониясының аймақтарға таралуы жөніндегі есеп министр о баста айтқандай күнделікті не аптасына емес, он күнде бір рет, оның өзінде ведомство сайтына файл форматында жүктеліп келеді.

Пандемия басталғалы жалпы вирус жұққандардың 3479-ы (КВИ+ / U07.1 – 2229, КВИ- / U07.2 – 486, ілеспе аурулардан – 764) қайтыс болған. Алайда Қазақстан билігі бойынан коронавирус табылса да, басқа аурулардың себебінен қайтыс болды делінген 764 адамды жалпы статистикаға қосып есептемейді. Сарапшылар бұған қарсы. Олардың айтуынша, коронавирустың жанама әсерінен қайтқандардың жартысынан астамының себебі қан айналымы жүйесінің аурулары болғандықтан, оған инфекция дерт қоздырушы фактор ретінде өлімге әкеп соқтырған.

Әзірге вирус таралу қатері жағынан Атырау облысы – қызыл аймақта, астана мен Алматы қаласы, СҚО, Ақмола, Қостанай, Павлодар өңірлері – сары аймақта тұр. Республика сары аумаққа енген.

Қоғамда биылғы 256 мың пневмония жағдайын есепке қоспай, жалпы статистиканы «маусым-шілде қырғынан» кейін жүргізе бастаған Үкіметтің есебіне күмәнмен қарайтындар көбейген.

Қазақстан вирус таралуы бойынша әлемде Worldometers дерекқоры және ДДСҰ тізімінде 49-шы орында тұр.

"The Qazaq Times"