Qazaqstandağı adam qwqığı jönindegi byuro men "Adam qwqığın qorğau jönindegi hartiya" wyımdarı Nwr-swltannan narazılardı wstau kezindegi policiya äreketin taldap, bağa beru üşin täuelsiz komissiya qwrudı talap etti.

11 mausımda jariyalanğan birlesken mälimdemede wyımdar "9-10 mausımda narazılıq akciyaları kezinde azamattardıñ qwqığı jappay bwzıldı. İİM wstalğandar sanın azaytıp körsetti" dep jazılğan.

Eki wyım hattı Qazaqstan bas prokuraturası men prezident janındağı adam qwqıqtarı jönindegi komissiya törağasına joldağandarın habarladı.

Qwqıq qorğauşılardıñ aytuınşa, 9 mausımda Almatıda policeyler sebebin tüsindirmesten kem degende 360 adamdı qalalıq policiya departamentine aparğan, jüzdegen adamdı uaqıtşa wstau izolyatorlarına jetkizgen.

Mälimdeme avtorları "Adam qwqıqtarı jönindegi hartiya" qorınıñ atqaruşı direktorı Jemis Twrmağambetova men Qazaqstandağı adam qwqığı jönindegi byuro jetekşisi Evgeniy Jovtistiñ aytuınşa, "policiya adamdardı wstağan kezde küş qoldanğan. Al 10 mausım tünde policiya departamentterinde wstalğandardıñ sotı advokatsız jabıq ötken".

Mälimdeme avtorları Qazaqstan biliginen narazılıq kezinde wstalğandardıñ tizimin, naqtı sanın, qayda ekenderin habarlaudı jäne "azamattardı sotsız sottağan" qızmetkerlerdi jazalaudı swraydı.

9 mausımda Nwr-swltan, Almatı, Şımkent, Aqtöbede policiya jüzdegen adamdı wstağan. Osı küni Almatı men Nwr-Swltanda saylauğa qarsı jüzdegen adam mitingige şıqqan. Qazaqstan biligi mitingini elde tıyım salınğan "Qazaqstannıñ demokratiyalıq tañdauı" qozğalısınıñ "radikaldı piğıldağı ökilderi" wyımdastırdı dep mälimdegen.

İşki ister ministrligi 9-10 mausımda Almatı men Nwr-swltanda 700-dey adam wstalğanın mälimdedi.

10 mausımda policiya Nwr-Swltan, Almatı, Şımkentte ondağan adamdı wstağan. Osı küni Nwr-Swltandağı baspasöz mäslihatında Qasım-Jomart Toqaev Almatı men el astanasında "birşama azamat öz pikirin bildiru, narazılıq jäne basqa mäselemen köşege şıqtı" dep mälimdedi, biraq qanşa adam jäne qanday talappen şıqqanın naqtılamadı.

Mausım ayınıñ 10-ı küni Ortalıq saylau komissiyası kezekten tıs prezident saylauınıñ tüpkilikti qorıtındısın jariyaladı. Onda Qasım-Jomart Toqaevtıñ 70,96%, Ämirjan Qosanovtıñ 16,23% dauıs alğandığı jöninde aytılğan.

"The Qazaq Times"