Foto: Caravan.kz

Bügin äleumettik jelilerde azamattıq belsendi Säule Äbildahanqızınıñ wstalğandığı jöninde aqparat taradı. Osığan baylanıstı biz Äbildahanqızı men advokat Abzal Qwspanğa habarlasıp, mäseleniñ män-jayın bildik.

Säule hanım «The Qazaq Times» portalınıñ tilşisine eki maşinamen policiya qızmetkerleri özin Naurızbay audanınıñ İİD alıp bara jatqandığın jäne öziniñ üstinen Arğınova Güldana esimdi azamatşanıñ arız jazğandığı jöninde ayttı.

Advokat Abzal Qwspan "Säule Äbildahanqızınıñ üstinen qozğalğan qılmıstıq istiñ sayasi astarı bar" dep esepteydi.

«Säule Parijge barğanğa deyin onıñ üstinen eşqanday arız tüspedi. Ol sonda barıp kelgenen keyin arız jazuşılar köbeydi. Bwnıñ sayasi astarı bar dep esepteymin. Men qazir basqa qaladamın. Biraq Säuleni qorğauğa meniñ advokattarım baradı. Men özim de aldağı uaqıtta sonda baramın» - dep mälimdedi Abzal Qwspan.

Esteriñizge salayıq, mamır ayında Säule Äbildahanqızı bir top oppoziciya ökilderimen birge Franciya astanası Parij qalasına barıp, Qazaqstannıñ eks-prem'er-ministri Äkejan Qajıgeldin men Atırau oblısınıñ bwrınğı äkimi Bergey Rısqalievpen kezdesken. Kezdesu barısında Qazaqstandağı bilik tranziti, prezident saylauı JSDP «Aqiqat» partiyasınıñ alda kele jatqan parlament saylauına dayındığı jöninde talqılaular bolğan.

"The Qazaq Times"