Advokat Abzal Qwspan men sayasattanuşı Dos Köşim Quat Ahmetovtı qoldauğa arnalğan baspasöz jiınan qatısıp otır. Almatı. 8 qırküyek 2021 jıl. Foto: QT/ Asan Anarbaywlı

8 qırküyek küni "Til Maydani" Youtube arnasınıñ avtorı, qazaq tilinde qızmet körsetudi talap etkeni üşin üstinen qılmıstıq is qozğalıp, elden ketken Quat Ahmetovtıñ jaqtastarı Almatıda baspasöz jiının ötkizip, arnayı mälimdeme jasadı. Olar Ahmetovtıñ sayasatker nemese şeneunik emes eken eskertip, onı qudalau qisınsız dedi. 

"Quat Ahmetov elden ketuge mäjbür boldı. Ol eşteñe büldirgen joq, eşqanday zañdı bwzğan joq. Arıs pen Tarazdağı jarılısqa da, eldegi jemqorlıq pen jağımpazdıqqa da, kerek deseñiz, ädiletsiz saylauğa da qatısı joq. Ol – bizder siyaqtı qarapayım azamattıñ biri. Onıñ bar kinäsi – memlekettik tilde qızmet körsetudi talap etu jäne Qazaqstan Respublikasınıñ zañdarına säykes, barlıq jerde eki tildegi mätinniñ boluın talap etu. Bwl – tek Quat Ahmetovtıñ talabı emes, öziniñ ana tilinde aqparat alğısı keletin milliondağan qazaqtildi azamattardıñ talabı" dedi sayasattanuşı Dos Köşim.

Tamızdıñ ayağında elden ketip, Ukrainada twrıp jatqan Ahmetovtıñ advokatı Abzal Qwspannıñ aytuınşa,  belsendiniñ üstinen qılmıstıq is qozğalğan-qozğalmağanı äli belgisiz.

"Bas prokuratura osı oqiğağa baylanıstı Qılmıstıq kodekstiñ 174-babı ("Äleumettik, wlttıq, rulıq, näsildik, tektik-toptıq nemese dini alauızdıqtı qozdıru") boyınşa qılmıstıq is qozğadı. Bwl naqtı fakt boyınşa. Al naqtı Quattıñ özinen üstinen qılmıstıq is qozğalğan-qozğalmağanı belgisiz. Fakt boyınşa qılımıstıq is qozğalğanın estigen bette Quattı elden şığarıp jiberuge tura keldi.  Negizi Quat elge qaytıp keludi qalap otır. Onıñ jalğız şartı bar: joğarı lauazımdı bilik ökilederi nemese qwqıq qorğau organdarı tarapınan Quat Ahmetovke qatıstı eşqanday qılmıstıq is qozğalmağanı jaylı mälimdeme jasalsa jetip jatır. Elde onıñ kelmet jasına tolmağan tört balası, qart anası qaldı. Olar quattıñ kömegine zäru" deydi advokat Abzal Qwspan.

Ol "Til Maydani" Youtube arnasında jariyalanğan videolarda eşqanday wlarazdıqdı qozdıru äreketeri joq ekenine senimdi. Sondıqtan bwl qozğalıs öz jwmısın jalğastıru kerek dep esepteydi.

"Wltımızdıñ, memleketimizdiñ Tilin tiriltu, şın mäninde qajettilikke aynaldırudıñ jalğız jolı – onı barlıq salada qoldanu; barlıq jerde qazaq tilinde söyleu, barlıq jerde qazaq tilinde jazu. Quat Ahmetovti qoldaudıñ jalğız jolı – Quattıñ, «Til maydannıñ» jwmısın odan äri jalğastıru. Bwl – «Men – qazaqpın» degen ärbir adamnıñ qasietti mindeti!" dedi Abzal Qwspan.

"Til Maydani" Youtube arnasınıñ avtorı, belsendi Quat Ahmetov 31 tamızdan beri Kievte twrıp jatır. 24 tamızda reseylik "RIA Novosti" aqparat agenttigi Qazaqstannıñ bas prokuraturasına siltep, Ahmetovtiñ sauda orındarın aralap, qazaqşa qızmet körsetudi talap etetin videoları boyınşa wlt arazdığın qozdıru babımen is qozğalğanın habarlağan.

Ahmetov bwğan deyin de sauda orındarı men memlekettik mekemelerge barıp, qızmetkerlerine qazaq tilinde qızmet körsetuin swrap video tüsirgen. Key qızmetkerler qazaqşa söyleuge mindetti emes ekenin aytsa, keybiri keşirim swrağan.

The Qazaq Times