Özbekstan eks-işki ister ministri Zakir Almatov.

Özbekstan eks-işki ister ministri 14 jıldan keyin Ändijan oqiğası jöninde swhbat berdi.

1991-2005 jıldar aralığında Özbekstan İİM bolğan Zakir Almatov 2018 jıldıñ aqpan ayında işki ister ministriniñ keñesşisi bolıp tağayındalğan. Ol Şavkat Mirzieev bilik basına kelgeli eks-prezident Islam Kärimovtıñ «qara tizimine» ilikkenderdiñ arasında alğaşqılardıñ biri bolıp aqtaldı jäne ülken sayasatqa qaytıp oraldı. Almatov bwğan deyin «Ändijan oqiğasına» baylanıstı «Vestnik Kavkaza» basılımına swhbat bergen. Jaqında Almtov kezekti ret «Ändijan oqiğasına» baylanıstı özbekstandıq «Qalampir» täuelsiz basılımına swhbat berdi.

Swhbatta eks-ministr 2005 jılı bolğan «Ändijan oqiğası» qızmettik mansabındağı eñ auır uaqıt ekendigin ayta kele, halıqaralıq qauımdastıq ökilderiniñ bolğan jağdayğa ädil bağa bermegendigine toqtaldı.

«Men europalıq jäne amerikalıq şeneunikterden swradım: «Sender meniñ ornımda bolsañdar ne ister ediñder?» – dep. Olar ayttı: «Sen istegendi qaytalar edik» - dep. Birde-bir el terroristermen kelissöz jürgizbeydi»  - dep mälimdedi Almatov.

2005 jılı bolğan qandı qırğında köz jwmğandardıñ naqtı sanın swrağan jurnalist swrağına Almatov: «Köz jwmğandar sanı Özbekstannıñ sırtında aytılğan boljamdardan älde qayda az. 1000 adam emes, 500 adam emes odan da az adam köz jwmdı» - dep jauap berdi. Bwdan bölek ol Ändijan oqiğasın aldın ala boljap, oğan tosqauıl qoya almağanına ökinetinin ayttı. Sarapşılar osı swhbattan keyin eks-ministrdiñ BAQ betterine jii şığa bastauına: «jasağan isteri üşin halıq aldında aqtaludıñ amalı» degen bağa berude. Olar öz sözderine dälel retinde jurnalist Babamwrat Abdullaevtıñ 2003 jılı jarıq körgen maqalasınan üzindi keltiredi. Onda Abdullaev sol kezdegi Wlttıq qauipsizdik komitetiniñ basşısı Rustam Inoyatov pen İİM Zakir Almatovtıñ Islam Kärimovtıñ közine tüsu üşin özara bäsekeleskenin aytadı. Bwdan bölek maqala avtorı Almatovtıñ biznes-magnattar Salim Abduvaliev pen Ğafur Ragimovtıñ biznes közqarastarın qorğağanı jöninde de birqatar dälelder keltiredi. Bir qızığı Almatov Abduvaliev pen Ragimovtıñ esimderin swhbat barısında da ataydı. Ol olardı «öz eliniñ patriotı, qayırımdı azamattar» - dep sipattaydı.

Jalpı, Özbekstanda osı uaqıtqa deyin «Ändijan oqiğası» jöninde swhbat berudi qoyıp, ol turalı söz qozğaudıñ özi mümkin emes boldı. Halıqaralıq sarapşılardıñ sözinşe, Şavkat Mirzieev atalmış oqiğağa tikeley qatısı bar Zakir Almatovtı ülken sayasatqa alıp kelip, BAQ ökilderine swhbat bergizu arqılı halıqaralıq qauımdastıq aldında Özbekstannıñ aşıq sayasatqa köşkendigin däleldeuge tırısuda jäne osı arqılı İşki ister ministrliginiñ halıq aldındağı bedelin köteruge talpınuda.

"The Qazaq Times"