Nazarbaev: Astana, Almatı, Şımkent qalalarınıñ äkimderi özekti mäselelerdi baqılauda wstauı tiis

Oblıstar men Astana, Almatı, Şımkent qalalarınıñ äkimderi özekti mäselelerdi baqılauda wstauı tiis – dep mälimdedi Nwrswltan Nazarbaev.

Prem'er-ministr Asqar Mämin, prezident äkimşiligi basşısı Äset Isekeşov jäne prem'er-ministr orınbasarı Gülşara Äbdiqalıqovanıñ qatısuımen ötken äleuemttik sayasattı damıtuğa baylanıstı bas qosuda prezident Nazarbaev köp balalı analar men twrmısı tömen otbasılarğa qatıstı mälimdeme jasadı.

«Biz jaqında ğana ötken «Nwr Otan» partiyasınıñ qwrıltayında halıqqa äleumettik kömek körsetu jöninde talqıladıq. Men halıqtıñ äleumettik jağdayı tömen, az qamtılğan böligine kömektesu jöninde keñ kölemdi bastamalar wsındım. Bügin biz solardı jüzege asıru josparın qaraytın bolamız» - dedi Nazarbaev.

Prezidenttiñ sözinşe, äleumettik jağdayı tömen otbasılar men köp balalı analar memlekettiñ kömegin jaqın uaqıtta sezinui tiis.

«Köp balalı analar men jağdayı tömen otbasılar kömekti säuir ayınıñ 1-inen bastap aluı kerek» - dep mälimdedi memleket basşısı.

Bwdan bölek Nazarbaev oblıs äkimderi men memlekettik organ basşılarınıñ jwmısı tikeley halıqtıñ äleumettik jağdayı men ömir deñgeyine qarap bağalatının ayttı.

«Oblıstar men Astana, Almatı, Şımkent qalalarınıñ äkimderi jergilikti halıqtıñ özekti mäselelerin baqılauda wstap, qoyılğan mindetterdiñ şeşu joldarın qarastıruı kerek. Bwdan basqa, bastı bağıttardıñ biri äleumettik sayasattı damıtuğa bölingen qarajattıñ igeriluin qadağalau... Birinşi kezekte halıqtı jwmıspen qamtu qajet. Memlekettik apparattıñ bastı mindeti – orta jäne şağın biznesti damıtu, jaña jwmıs orındarın aşu. Bwl jwmıstı barlıq qalalarda, audandarda, auıldarda jürgizu kerek» - dedi prezident.

Esteriñizge salayıq, aqpan ayınıñ basında Astana qalasındağı bes büldirşinniñ ömirin qiğan qayğılı oqiğadan keyin, Respublika boyınşa köp balalı analar qarsılıq mitingisine şıqqan. Olar köp balalı otbasılarğa beriletin järdemaqı kölemin arttırudı, baspana mäselesin şeşudi t.b talap etken. Osıdan keyin köp wzamay prezident Nazarbaev Sağıntaev ükimetin otstavkağa jiberip, onıñ ornına Mämin ükimetin jasaqtağan.

"The Qazaq Times"