27 qañtarda senat bwrınğı prezident Nwrswltan Nazarbaevtıñ ökiletin qısqartudı maqwldadı. Bwl turalı Ortalıq Aziya jañalıqtar qızmeti jazdı.

Beysenbi küni senat osı tüzetudi qoldap, oğan qosa zañ jobasına tağı bir tüzetu wsındı. "Zañdı talqılau barısında tağı bir norma engizilip otır.

Ol – "Twñğış prezident turalı" zañnan memlekettiñ işki jäne sırtqı sayasatına baylanıstı bastamalardı elbasımen kelisiluge tiis degen norma alıp tastalıp otır. Sondıqtan da senat zañnamağa engizilgen özgeristerdi twjırımdamalı türde qoldap, bir özgerispenen mäjiliske qaytarıp otır" dedi senat deputatı Läzzat Süleymen.

5 qañtarda Qazaqstanda jappay narazılıq örşigen twsta prezident Qasım-Jomart Toqaev Qauipsizdik keñesiniñ törağalığın qolğa alatının mälimdegen. Sol kezde Nazarbaevqa jaqın delingen birqatar joğarı lauazımdı twlğalar qızmetten alınğan. Bwdan soñ aqparat qwraldarı men äleumettik jelilerde Nazarbaev pen Toqaev arasında bilikke talastıñ örşigeni jöninde boljamdar aytıla bastağan.

Alayda bwrınğı prezidenttiñ baspasöz hatşısı Aydos Ükibay "Qauipsizdik keñesi törağalığın tapsıru turalı şeşimdi Nazarbaevtıñ özi qabıldağanın" aytıp, sendiruge tırısqan. Qazaqstandı otız jılday basqarğan Nazarbaev 2019 jılı naurızda prezidenttikten ketken edi. Biraq ol 2022 jıldıñ 5 qañtarına deyin Qauipsizdik keñesiniñ ömirlik basşısı retinde bilikke ıqpal etip otırğan. Keybir sarapşılar qañtarda elde bolğan narazılıq pen tärtipsizdik Nazarbaevtıñ ıqpalın älsiretti dep sanaydı.

Bwğan deyin mäjilis Nazarbaevtıñ Qauipsizdik keñesi jäne Qazaqstan halqı assambleyasın ömir boyı basqaru qwqığınan ayıratın özgeristi maqwldağan edi.

Qazir Nazarbaevtıñ qolında "elbası" statusı ğana qaldı. Zañ boyınşa, bwl status onı jäne onıñ otbasın qılmıstıq qudalaudan qorğaydı. 19 qañtarda Qazaqstanda Nazarbaevtı tiispeuşilik märtebesinen ayırudı közdeytin peticiyağa qol jinau bastalğan.