فوتو: Zakon.kz

وبلىستار مەن استانا، الماتى، شىمكەنت قالالارىنىڭ اكىمدەرى وزەكتى ماسەلەلەردى باقىلاۋدا ۇستاۋى ءتيىس – دەپ مالىمدەدى نۇرسۇلتان نازارباەۆ.

پرەمەر-مينيستر اسقار ءمامين، پرەزيدەنت اكىمشىلىگى باسشىسى اسەت يسەكەشوۆ جانە پرەمەر-مينيستر ورىنباسارى گۇلشارا ابدىقالىقوۆانىڭ قاتىسۋىمەن وتكەن الەۋەمتتىك ساياساتتى دامىتۋعا بايلانىستى باس قوسۋدا پرەزيدەنت نازارباەۆ كوپ بالالى انالار مەن تۇرمىسى تومەن وتباسىلارعا قاتىستى مالىمدەمە جاسادى.

«ءبىز جاقىندا عانا وتكەن «نۇر وتان» پارتياسىنىڭ قۇرىلتايىندا حالىققا الەۋمەتتىك كومەك كورسەتۋ جونىندە تالقىلادىق. مەن حالىقتىڭ الەۋمەتتىك جاعدايى تومەن، از قامتىلعان بولىگىنە كومەكتەسۋ جونىندە كەڭ كولەمدى باستامالار ۇسىندىم. بۇگىن ءبىز سولاردى جۇزەگە اسىرۋ جوسپارىن قارايتىن بولامىز» - دەدى نازارباەۆ.

پرەزيدەنتتىڭ سوزىنشە، الەۋمەتتىك جاعدايى تومەن وتباسىلار مەن كوپ بالالى انالار مەملەكەتتىڭ كومەگىن جاقىن ۋاقىتتا سەزىنۋى ءتيىس.

«كوپ بالالى انالار مەن جاعدايى تومەن وتباسىلار كومەكتى ءساۋىر ايىنىڭ 1-ىنەن باستاپ الۋى كەرەك» - دەپ مالىمدەدى مەملەكەت باسشىسى.

بۇدان بولەك نازارباەۆ وبلىس اكىمدەرى مەن مەملەكەتتىك ورگان باسشىلارىنىڭ جۇمىسى تىكەلەي حالىقتىڭ الەۋمەتتىك جاعدايى مەن ءومىر دەڭگەيىنە قاراپ باعالاتىنىن ايتتى.

«وبلىستار مەن استانا، الماتى، شىمكەنت قالالارىنىڭ اكىمدەرى جەرگىلىكتى حالىقتىڭ وزەكتى ماسەلەلەرىن باقىلاۋدا ۇستاپ، قويىلعان مىندەتتەردىڭ شەشۋ جولدارىن قاراستىرۋى كەرەك. بۇدان باسقا، باستى باعىتتاردىڭ ءبىرى الەۋمەتتىك ساياساتتى دامىتۋعا بولىنگەن قاراجاتتىڭ يگەرىلۋىن قاداعالاۋ... ءبىرىنشى كەزەكتە حالىقتى جۇمىسپەن قامتۋ قاجەت. مەملەكەتتىك اپپاراتتىڭ باستى مىندەتى – ورتا جانە شاعىن بيزنەستى دامىتۋ، جاڭا جۇمىس ورىندارىن اشۋ. بۇل جۇمىستى بارلىق قالالاردا، اۋدانداردا، اۋىلداردا جۇرگىزۋ كەرەك» - دەدى پرەزيدەنت.

ەستەرىڭىزگە سالايىق، اقپان ايىنىڭ باسىندا استانا قالاسىنداعى بەس ءبۇلدىرشىننىڭ ءومىرىن قيعان قايعىلى وقيعادان كەيىن، رەسپۋبليكا بويىنشا كوپ بالالى انالار قارسىلىق ميتينگىسىنە شىققان. ولار كوپ بالالى وتباسىلارعا بەرىلەتىن جاردەماقى كولەمىن ارتتىرۋدى، باسپانا ماسەلەسىن شەشۋدى ت.ب تالاپ ەتكەن. وسىدان كەيىن كوپ ۇزاماي پرەزيدەنت نازارباەۆ ساعىنتاەۆ ۇكىمەتىن وتستاۆكاعا جىبەرىپ، ونىڭ ورنىنا ءمامين ۇكىمەتىن جاساقتاعان.

"The Qazaq Times"