Almatıdağı jazuşılar odağında ötken plenum. Foto: Ädebiet portalı.

Qazaqstan Jazuşılar odağında «Wlı dalanıñ jeti qırı jäne qazaq ädebieti» attı I  plenumı ötti. Atalğan otırısta QR prezidenti Nwrswltan Nazarbaevtıñ «Wlı dalanıñ jeti qırı» attı maqalası, sonday-aq jazuşılar qauımınıñ aldağı mäseleleri bastı taqırıp boldı.

Qazaqstan Jazuşılar odağınıñ basqarma törağası Wlıqbek Esdäulet öz bayandamasında prezidenttiñ maqalası turalı, män-mañızı turalı toqtala kelip, Qazaqstan Jazuşılar odağı «Aziya elderi qalamgerleriniñ I plenumı» attı halıqaralıq konferenciya wyımdastırğalı otırğanın ayttı.  «Bwl şın mäninde 1973 jılğı Aziya-Afrika jazuşılarınıñ V konferenciyasınan keyingi orasan bas qosu bolmaq», – dedi Wlıqbek Esdäuletov. Ol bwl auqımdı jobağa bilik tarabınan da küşti qoldau bolıp jatqanın da aytıp ötti.

Jazuşılar odağınıñ basqarma törağası jasağan bayandamada «Söz patşası» attı poetikalıq jaña teatrdıñ aşılatını turalı jañalıq ta aytıldı. Jaña körkemdik jetekşisi Ğ.Müsirepov atındağı teatrdıñ rejisseri Beybit Kamaranov bolmaq. «Söz patşası» 2019 jıldıñ bas şeninde Ämirhan Balqıbektiñ ruhına arnalğan «Qasqır qwday bolğan kez» attı poetikalıq  dramamen şımıldıq aşpaq. Betaşar drama aqın Baqıt Bedelhannıñ qalamınan tuğan.

Wlıqbek Esdäuletov sözinde: «Qazaqstan Respublikası Bilim jäne ğılım ministrligine barlıq oquşılarğa arnalğan ädebi oqulıqtarğa saraptama jasap, oqulıqtardı Jazuşılar odağınıñ maqwldauınan keyin ğana bekitu turalı wsınıs dayındap otırmız. Sonday-aq, Qazaqstan Jazuşılar odağı janınan än mätinderin qadağalaytın "Körkemdik keñes" qwrıladı. Körkemdik keñes «änniñ estisin elep, essizin elekten ötkizip, qazaq ruhaniyatınıñ tamırına qan jügirtip, wlttıq ideologiyamızdıñ jañaşa jañğıruındağı wstanımımızdı wstap qaludı közdeydi», – dedi.

Qazaq qalamgerlerin wlttıñ öneri, ädebieti, bilim beru salalarında qadağalauşılıq rölin arttırğan bwl bastamalar közqaraqtı jwrttı quantadı dep senemiz.

“The Qazaq Times”