قازاقستان جازۋشىلارىنىڭ I پلەنۋمى: جازۋشىلار وداعى تىڭ باستامالاردى قولعا الدى

قازاقستان جازۋشىلار وداعىندا «ۇلى دالانىڭ جەتى قىرى جانە قازاق ادەبيەتى» اتتى I  پلەنۋمى ءوتتى. اتالعان وتىرىستا قر پرەزيدەنتى نۇرسۇلتان نازارباەۆتىڭ «ۇلى دالانىڭ جەتى قىرى» اتتى ماقالاسى، سونداي-اق جازۋشىلار قاۋىمىنىڭ الداعى ماسەلەلەرى باستى تاقىرىپ بولدى.

قازاقستان جازۋشىلار وداعىنىڭ باسقارما توراعاسى ۇلىقبەك ەسداۋلەت ءوز بايانداماسىندا پرەزيدەنتتىڭ ماقالاسى تۋرالى، ءمان-ماڭىزى تۋرالى توقتالا كەلىپ، قازاقستان جازۋشىلار وداعى «ازيا ەلدەرى قالامگەرلەرىنىڭ I پلەنۋمى» اتتى حالىقارالىق كونفەرەنتسيا ۇيىمداستىرعالى وتىرعانىن ايتتى.  «بۇل شىن مانىندە 1973 جىلعى ازيا-افريكا جازۋشىلارىنىڭ V كونفەرەنتسياسىنان كەيىنگى وراسان باس قوسۋ بولماق»، – دەدى ۇلىقبەك ەسداۋلەتوۆ. ول بۇل اۋقىمدى جوباعا بيلىك تارابىنان دا كۇشتى قولداۋ بولىپ جاتقانىن دا ايتىپ ءوتتى.

جازۋشىلار وداعىنىڭ باسقارما توراعاسى جاساعان باياندامادا «ءسوز پاتشاسى» اتتى پوەتيكالىق جاڭا تەاتردىڭ اشىلاتىنى تۋرالى جاڭالىق تا ايتىلدى. جاڭا كوركەمدىك جەتەكشىسى ع.مۇسىرەپوۆ اتىنداعى تەاتردىڭ رەجيسسەرى بەيبىت كامارانوۆ بولماق. «ءسوز پاتشاسى» 2019 جىلدىڭ باس شەنىندە ءامىرحان بالقىبەكتىڭ رۋحىنا ارنالعان «قاسقىر قۇداي بولعان كەز» اتتى پوەتيكالىق  درامامەن شىمىلدىق اشپاق. بەتاشار دراما اقىن باقىت بەدەلحاننىڭ قالامىنان تۋعان.

ۇلىقبەك ەسداۋلەتوۆ سوزىندە: «قازاقستان رەسپۋبليكاسى ءبىلىم جانە عىلىم مينيسترلىگىنە بارلىق وقۋشىلارعا ارنالعان ادەبي وقۋلىقتارعا ساراپتاما جاساپ، وقۋلىقتاردى جازۋشىلار وداعىنىڭ ماقۇلداۋىنان كەيىن عانا بەكىتۋ تۋرالى ۇسىنىس دايىنداپ وتىرمىز. سونداي-اق، قازاقستان جازۋشىلار وداعى جانىنان ءان ماتىندەرىن قاداعالايتىن "كوركەمدىك كەڭەس" قۇرىلادى. كوركەمدىك كەڭەس «ءاننىڭ ەستىسىن ەلەپ، ەسسىزىن ەلەكتەن وتكىزىپ، قازاق رۋحانياتىنىڭ تامىرىنا قان جۇگىرتىپ، ۇلتتىق يدەولوگيامىزدىڭ جاڭاشا جاڭعىرۋىنداعى ۇستانىمىمىزدى ۇستاپ قالۋدى كوزدەيدى»، – دەدى.

قازاق قالامگەرلەرىن ۇلتتىڭ ونەرى، ادەبيەتى، ءبىلىم بەرۋ سالالارىندا قاداعالاۋشىلىق ءرولىن ارتتىرعان بۇل باستامالار كوزقاراقتى جۇرتتى قۋانتادى دەپ سەنەمىز.

“The Qazaq Times”