Foto: inform.kz

«Qazaq handığı. Almas qılış» tarihi dramasınıñ bas prodyuseri Arman Asenov  fil'mdi  qıtaylıq jäne amerikalıq  distrib'yutorlarınıñ  satıp alğısı keletindigin jetkizgen. Bwl turalı the-steppe.com habarlaydı.

«Kinokartina Gollivudta ötetin  «American Film Market»-te Qıtay, Latın Amerika jäne AQŞ-tıñ qızığuşılığın oyatqan. Bwl degeniñiz älem bizdiñ tarihımızğa qızığa bastadı degen söz. Keremet emes pe?! Bizdi qazir tamırı tereñ tarihı bar, jas, örşil el  retinde moyınday bastadı. Qazir kelissözder jürgizip jatırmız», – dedi prodyuser.

Fil'mniñ qoyuşı-rejisseri – Rüstem Äbdraşev. Fil'm körnekti jazuşı İliyas Esenberlinniñ «Köşpendiler» trilogiyasınıñ jelisi boyınşa tüsirilgen. Scenariyin jazğan – jazuşı Smağwl Elubay.

Tarihi drama HV ğasırdıñ orta twsındağı Qazaq handığınıñ körinisin körsetken. Şaybanitterdiñ kişi tarmağınan şığatın Äbilqayır öz biligin küşeytip, jeke handıq qwrğannan keyin,  köşpendilerge qatıgez, ayausız sayasat wstanğan bolatın. 1460 jılı Orda Ejenniñ wrpaqtarı – Kerey men Jänibektiñ aynalasına birikken on mıñdağan köşpendi aqsaqaldar keñesinde şeşim qabıldap, Äbilqayırdıñ handığınan bölinip, öz wlıstarın qwruğa bekindi. Swlandarğa qosılğan rulardıñ basşı-bileri qwrıltay ötkizedi. Eñ aldımen, jwdırıqtay jwmılğan ıntımaq kerek ekenin eskergen olar Kereydi han saylap, Qazaq handığınıñ qwrılğanın paş etedi.

Ş. Aymanov atındağı «Qazaqfilim» AQ baspasöz qızmetiniñ deregine süyensek, tüsirilim jwmıstarı Almatı jäne Almatı oblısında ötken. Tüsirilimniñ bir böligi «Qazaqfil'mniñ» pavil'ondarında qwrılğan dekoraciyalarda, sonımen qatar kinostudiyanıñ aumağında suretşiler twrğızğan Şaybanşahtıñ sarayında ötken. Fil'mdi jasauğa 500-den astam adam jwmıldırılğan, olardıñ 200-ge juığı tüsirilim tobınıñ müşeleri. Tüsirilimder bes ayğa sozılıp, 30 nısan paydalanılğan. 2017 jıldıñ 5 qañtar küninen bastap körermenge  wsınıldı.

«Kinonwsqanıñ prokattarı ayaqtalğannan keyin fil'mniñ alğaşqı sezonı teleekrandarğa şığadı. Ekinşi jäne üşinşi mausımın tüsirudi josparlap otırmız. Eger bizdiñ jospar jüzege asıp jatsa, osı köktemde tüsirilimin bastap ta ketpekpiz, yağni tağı 10 epizod tüsiriletin boladı», – deydi Arman Asenov.

«Qazaq handığı. Almas qılış» tarihi drama kinoteatrlarda üş apta köleminde körsetilip keledi. Rentrak jüyesi men Ticketon.kz mälimetine süyensek, fil'mniñ jalpı kassalıq kirisi – 87 581 330 teñge.

«The Qazaq Times»