«الماس قىلىش» ءفيلمىن اقش پەن قىتاي ديستريبيۋتەرلەرى ساتىپ العىسى كەلەدى

«قازاق حاندىعى. الماس قىلىش» تاريحي دراماسىنىڭ باس پروديۋسەرى ارمان اسەنوۆ  فيلمدى  قىتايلىق جانە امەريكالىق  ديستريبيۋتورلارىنىڭ  ساتىپ العىسى كەلەتىندىگىن جەتكىزگەن. بۇل تۋرالى the-steppe.com حابارلايدى.

«كينوكارتينا گولليۆۋدتا وتەتىن  «American Film Market»-تە قىتاي، لاتىن امەريكا جانە اقش-تىڭ قىزىعۋشىلىعىن وياتقان. بۇل دەگەنىڭىز الەم ءبىزدىڭ تاريحىمىزعا قىزىعا باستادى دەگەن ءسوز. كەرەمەت ەمەس پە؟! ءبىزدى قازىر تامىرى تەرەڭ تاريحى بار، جاس، ءورشىل ەل  رەتىندە مويىنداي باستادى. قازىر كەلىسسوزدەر جۇرگىزىپ جاتىرمىز»، – دەدى پروديۋسەر.

ءفيلمنىڭ قويۋشى-رەجيسسەرءى – رۇستەم ابدراشەۆ. فيلم كورنەكتى جازۋشى ءىلياس ەسەنبەرليننىڭ «كوشپەندىلەر» تريلوگياسىنىڭ جەلىسى بويىنشا تۇسىرىلگەن. ستسەناريىن جازعان – جازۋشى سماعۇل ەلۋباي.

تاريحي دراما حV عاسىردىڭ ورتا تۇسىنداعى قازاق حاندىعىنىڭ كورىنىسىن كورسەتكەن. شايبانيتتەردىڭ كىشى تارماعىنان شىعاتىن ابىلقايىر ءوز بيلىگىن كۇشەيتىپ، جەكە حاندىق قۇرعاننان كەيىن،  كوشپەندىلەرگە قاتىگەز، اياۋسىز ساياسات ۇستانعان بولاتىن. 1460 جىلى وردا ەجەننىڭ ۇرپاقتارى – كەرەي مەن جانىبەكتىڭ اينالاسىنا بىرىككەن ون مىڭداعان كوشپەندى اقساقالدار كەڭەسىندە شەشىم قابىلداپ، ابىلقايىردىڭ حاندىعىنان ءبولىنىپ، ءوز ۇلىستارىن قۇرۋعا بەكىندى. سۇلاندارعا قوسىلعان رۋلاردىڭ باسشى-بيلەرى قۇرىلتاي وتكىزەدى. ەڭ الدىمەن، جۇدىرىقتاي جۇمىلعان ىنتىماق كەرەك ەكەنىن ەسكەرگەن ولار كەرەيدى حان سايلاپ، قازاق حاندىعىنىڭ قۇرىلعانىن پاش ەتەدى.

ش. ايمانوۆ اتىنداعى «قازاقفيلىم» اق ءباسپاسوز قىزمەتىنىڭ دەرەگىنە سۇيەنسەك، ءتۇسىرىلىم جۇمىستارى الماتى جانە الماتى وبلىسىندا وتكەن. ءتۇسىرىلىمنىڭ ءبىر بولىگى «قازاقفيلمنىڭ» پاۆيلوندارىندا قۇرىلعان دەكوراتسيالاردا، سونىمەن قاتار كينوستۋديانىڭ اۋماعىندا سۋرەتشىلەر تۇرعىزعان شايبانشاھتىڭ سارايىندا وتكەن. ءفيلمدى جاساۋعا 500-دەن استام ادام جۇمىلدىرىلعان، ولاردىڭ 200-گە جۋىعى ءتۇسىرىلىم توبىنىڭ مۇشەلەرى. تۇسىرىلىمدەر بەس ايعا سوزىلىپ، 30 نىسان پايدالانىلعان. 2017 جىلدىڭ 5 قاڭتار كۇنىنەن باستاپ كورەرمەنگە  ۇسىنىلدى.

«كينونۇسقانىڭ پروكاتتارى اياقتالعاننان كەيىن ءفيلمنىڭ العاشقى سەزونى تەلەەكراندارعا شىعادى. ەكىنشى جانە ءۇشىنشى ماۋسىمىن ءتۇسىرۋدى جوسپارلاپ وتىرمىز. ەگەر ءبىزدىڭ جوسپار جۇزەگە اسىپ جاتسا، وسى كوكتەمدە ءتۇسىرىلىمىن باستاپ تا كەتپەكپىز، ياعني تاعى 10 ەپيزود تۇسىرىلەتىن بولادى»، – دەيدى ارمان اسەنوۆ.

«قازاق حاندىعى. الماس قىلىش» تاريحي دراما كينوتەاترلاردا ءۇش اپتا كولەمىندە كورسەتىلىپ كەلەدى. Rentrak جۇيەسى مەن Ticketon.kz مالىمەتىنە سۇيەنسەك، ءفيلمنىڭ جالپى كاسسالىق كىرىسى – 87 581 330 تەڭگە.

«The Qazaq Times»