Ş.Aymanov atındağı «Qazaqfil'm» kinostudiyasına iskerlik maqsatta türkiyalıq «TRT» teleradiokompaniyasınıñ Astanadağı  direktorı Abdulhamit Avşar keldi. Kezdesude korporaciya basşılığı atınan kinostudiyanıñ kartinaların türik telearnasında körsetu maqsatında aluğa nietti ekenin bildirdi, -  dep habarlaydı QR Mädeniet jäne sport ministrligi.

«TRT» teleradiokorporaciyası – birneşe radiostanciyalardıñ negizinde 1964 jılı qwrılğan. Bügingi tañda korporaciyağa ondağan halıqaralıq jäne aymaqtıq tele jäne radio arnalar kiredi. Bwl kompaniyanıñ radio jäne tele arnaları älemniñ birneşe tilderinde jüredi. Köptegen elderde ökildigi bar korporaciyanıñ bölimşesi Qazaqstanda da aşılğan.

-Bizdiñ «TRT Avaz» telearnası aptasına bir ret türkitildes elderdiñ kinoların körsetudi josparlap otır. Osı orayda Qazaqstandağı türli janrdağı kino öndiruşi bastı studiya «Qazaqfil'mge» kelip otırmız. Bastı maqsatımız — fil'mderiñiz arqılı sizderdiñ tarihtarıñız ben mädenietteriñizdi körsetetin tuındılardı tañdap alu, - dedi kezdesu barısında Abdulhamit Avşar.

Öz kezeginde «Qazaqfil'm» kinostudiyasınıñ audiovizualdı jobalar basşısı Oljabay Mwsabekov kinostudiya öndirgen fil'mder katalogın beruge dayın ekenin jetkizdi:

- 2009 jılğa deyin tüsirilgen fil'mder plenkada saqtalğan. Alayda Qazaq ğılımi-zertteu mädeniet institutınıñ kömegimen sandıq jüyege ötkizdik. Eski jäne jaña fil'mderdi sizderge qajetti formatta beruge dayınbız.

Kezdsu barısında türkiyalıq qonaqqa kinostudiya boyınşa ekskursiya jürgizilip, «Qazaqfil'mniñ» kinoöndiristik mümkinşiligi jäne tehnikalıq jabdığı tanıstırıldı.

“The Qazaq Times”