Segiz jılğa sottalğan oppoziciyalıq sayasatker Ömirbek Tekebaev.Foto: 24.kg

Qırğızstanda qamaudağı oppoziciyalıq sayasatker Ömirbek Tekebaevtıñ advokatı Qanat Hasanovtıñ üyine şabuıl jasaldı.

Qaraşa ayınıñ 7-si küni tañğı sağat törtte segiz jılğa sottalğan oppoziciyalıq sayasatker, «Ata Meken» partiyasınıñ jetekşisi Ömirbek Tekebaevtıñ qorğauşısı Qanat Hasanovtıñ üyine belgisiz adamdar şabuıl jasağan. Olar köp qabattı üyde twratın Hasanov päterine birinşi qabattağı tereze arqılı kirip, Tekebaev isine qatıstı qwjattardı qoldı etken. Osı oqiğadan keyin Hasanov öziniñ Facebook paraqşasına: «Men bwl jağdaydıñ sayasi astarı bar dep oylamaymın. Biraq olar üydegi teledidar nemese basqa qwndı zattardı aludıñ orınına Tekebaev isine qatıstı qwjattardıñ köşirmesi jinaqtalğan papkanı qoldı etipti» - dep jazğan.

Esteriñizge salayıq, bwğan deyin qaraşa ayınıñ 5-nen 6-sına qarağan tüni tağı bir «Ata Meken» partiyasınıñ müşesi, oppoziciyalıq sayasatker Aida Salyanovanıñ inisi Wlan Salyanovtıñ üyine belgisiz adamdar şabuıl jasap, üy iesin atıp ketken bolatın. Auır jaraqat alğan Wlan Salyanov jergilikti auruhanalardıñ birinde köz jwmğan. Osı oqiğadan keyin Qırğızstanda tanımal qwqıq qorğauşı Dinara Oşurahunova «Atambaev bilikten jiirkenişti türde ketip baradı» dep mälimdegen. Al «Ata Meken» partiyası ökilderi atalmış oqiğanıñ sayasi astarı bar ekendigin aytqan.

Bwdan bölek Qırğızstan Bas prokuraturası birneşe kün bwrın saylau kezinde bilik partiyasınıñ ökili Sooronbay Jeenbekovke bastı qarsılas bolğan Ömirbek Babanovtıñ üstinen qılmıstıq is qozğağan. Bwl jerde de Ömirbek Babanovtıñ özi jäne jaqtastarı bwl istiñ sayasi astarı bar ekendigin jäne saylaudan keyin osınday jağday bolatının aldın ala bilgendikterin aytqan bolatın. Osı uaqıtqa deyin Qırğızstanda soñğı bir aptada bolğan jağdaylarğa baylanıstı el prezidenti Almazbek Atambaev eşqanday mälimdeme jasamağan. Biraq prezident äkimşiligi baspasöz qızmeti «qaraşa ayınıñ 15-si küni Almazbek Atambaev qorıtındı baspasöz mäslihatın ötkizedi» degen aqparat taratqan.

“The Qazaq Times”