بىشكەكتە وپپوزيتسيالىق ساياساتكەر تەكەباەۆ ادۆوكاتىنىڭ ۇيىنە شابۋىل جاسالدى

قىرعىزستاندا قاماۋداعى وپپوزيتسيالىق ساياساتكەر ومىربەك تەكەباەۆتىڭ ادۆوكاتى قانات حاسانوۆتىڭ ۇيىنە شابۋىل جاسالدى.

قاراشا ايىنىڭ 7-ءسى كۇنى تاڭعى ساعات تورتتە سەگىز جىلعا سوتتالعان وپپوزيتسيالىق ساياساتكەر، «اتا مەكەن» پارتياسىنىڭ جەتەكشىسى ومىربەك تەكەباەۆتىڭ قورعاۋشىسى قانات حاسانوۆتىڭ ۇيىنە بەلگىسىز ادامدار شابۋىل جاساعان. ولار كوپ قاباتتى ۇيدە تۇراتىن حاسانوۆ پاتەرىنە ءبىرىنشى قاباتتاعى تەرەزە ارقىلى كىرىپ، تەكەباەۆ ىسىنە قاتىستى قۇجاتتاردى قولدى ەتكەن. وسى وقيعادان كەيىن حاسانوۆ ءوزىنىڭ Facebook پاراقشاسىنا: «مەن بۇل جاعدايدىڭ ساياسي استارى بار دەپ ويلامايمىن. بىراق ولار ۇيدەگى تەلەديدار نەمەسە باسقا قۇندى زاتتاردى الۋدىڭ ورىنىنا تەكەباەۆ ىسىنە قاتىستى قۇجاتتاردىڭ كوشىرمەسى جيناقتالعان پاپكانى قولدى ەتىپتى» - دەپ جازعان.

ەستەرىڭىزگە سالايىق، بۇعان دەيىن قاراشا ايىنىڭ 5-نەن 6-سىنا قاراعان ءتۇنى تاعى ءبىر «اتا مەكەن» پارتياسىنىڭ مۇشەسى، وپپوزيتسيالىق ساياساتكەر ايدا ساليانوۆانىڭ ءىنىسى ۇلان ساليانوۆتىڭ ۇيىنە بەلگىسىز ادامدار شابۋىل جاساپ، ءۇي يەسىن اتىپ كەتكەن بولاتىن. اۋىر جاراقات العان ۇلان ساليانوۆ جەرگىلىكتى اۋرۋحانالاردىڭ بىرىندە كوز جۇمعان. وسى وقيعادان كەيىن قىرعىزستاندا تانىمال قۇقىق قورعاۋشى دينارا وشۋراحۋنوۆا «اتامباەۆ بيلىكتەن جيىركەنىشتى تۇردە كەتىپ بارادى» دەپ مالىمدەگەن. ال «اتا مەكەن» پارتياسى وكىلدەرى اتالمىش وقيعانىڭ ساياسي استارى بار ەكەندىگىن ايتقان.

بۇدان بولەك قىرعىزستان باس پروكۋراتۋراسى بىرنەشە كۇن بۇرىن سايلاۋ كەزىندە بيلىك پارتياسىنىڭ وكىلى سوورونباي جەەنبەكوۆكە باستى قارسىلاس بولعان ومىربەك بابانوۆتىڭ ۇستىنەن قىلمىستىق ءىس قوزعاعان. بۇل جەردە دە ومىربەك بابانوۆتىڭ ءوزى جانە جاقتاستارى بۇل ءىستىڭ ساياسي استارى بار ەكەندىگىن جانە سايلاۋدان كەيىن وسىنداي جاعداي بولاتىنىن الدىن الا بىلگەندىكتەرىن ايتقان بولاتىن. وسى ۋاقىتقا دەيىن قىرعىزستاندا سوڭعى ءبىر اپتادا بولعان جاعدايلارعا بايلانىستى ەل پرەزيدەنتى المازبەك اتامباەۆ ەشقانداي مالىمدەمە جاساماعان. بىراق پرەزيدەنت اكىمشىلىگى ءباسپاسوز قىزمەتى «قاراشا ايىنىڭ 15-ءسى كۇنى المازبەك اتامباەۆ قورىتىندى ءباسپاسوز ءماسليحاتىن وتكىزەدى» دەگەن اقپارات تاراتقان.

“The Qazaq Times”