Foto: Reuters

BWW-nıñ Bas hatşısı Antoniu Gutteriş M'yanma biliginen Rakhayn ştatında twratın Rohindja mwsılmandarına qarsı qantögisti toqtatudı talap etti. Bwl turalı Äl-Jazira aqparattıq agenttigi jazdı.

Küni keşe ğana 25 tamızdan beri eldegi jappay jazalau şarasınan bas sauğalap, Bangladeş jağalauına jetken mwsılmandardıñ sanı 73 mıñ - 90 mıñ dep körsetilgenimen, bügin şekara sırtınan tınıştıq izdegender 125 mıñğa jetti degen habar taradı.

BWW-nıñ balalarmen jwmıs wyımı UNICEF wsınğan bayandamada Bangladeştegi bosqındar lagerindegi mwsılmandardıñ 80 payızı balalar men äyelder ekeni körsetilgen. Sonday-aq M'yanma biliginiñ eline gumanitarlıq kömek kirgizbeui sebebinen, Rakhayn ştatınıñ oñtüstigindegi 28 mıñ bala taza auız su men azıq-tülik, däri-därmek pen alğaşqı kömekke mwqtaj bolıp otırğan körinedi.

BWW-nıñ bosqındarmen jwmıs isteytin UNHCR agenttigi Rohindjalıqtarmen tildesip, olardıñ mwnda öte qiın jağdayda, birneşe kün qatarınan as-su işpesten jetkenin aytadı. Qazirgi tañda barlıq älemdik basılımdardıñ bastı taqırıptarına aynalğan M'yanmadağı mwsılmandarğa qarsı äreketterdiñ toqtatıluı men Bangladeştegi 100 mıñnan astam bosqınnıñ bolaşağı şeşilmey otır.

“The Qazaq Times”